Aalisartut: - Eqalussuit ikilisarneqartariaqarput

Eqalussuit qaleralinniarluni aalisarnermut annertuumik akornutaasut Avannaata Kommuniani kommunalbestyrelsimi amerlanerussuteqartut isumaqarput.

Taamaattumik eqaluissuit aalisarfinni ikilisarneqarnissaat siunertaralugu, katillugit 300.000 koruuninik aningaasaliisoqassasoq kommunalbestyrelsimit februarimi akuersissutigineqarpoq.

Aaqqissuussineq taanna naapertorlugu eqalussuit 1.000-it pisarineqassapput, uummataalu ataaseq 300 koruunilerlugu kommunimunt tunineqartassasoq siunniunneqarpoq. Suliniut taanna Inatsisartuni Aalisarnermut Piniarnermut Nunalerinermullu Ataatsimiititaliamit tapersersorneqarpoq, eqalussuit qimminut nerukkaatissatut inunnullu nerisassiassatut tunisassiarineqarsinnaanissaat periarfissarsiuunneqartariaqartoq isumaqarfigineqarluni.

Kisiannili Aalisarnermut Piniarnermut Nunalerinermut Imminullu Pilersornermut Naalakkersuisoqarfiup paasissutissiinera naapertorlugu, eqalussuarnik ikilisaanissaq inatsisitigut tunngavissaqanngimmat, suliniut Avannaata Kommunianit unitsinneqarpoq. Eqalussuit amerlassusaat navianartorsiortinneqarsinnaasoq   aammalu ikilisaaneq Kalaallit Nunaata tusaamaneqarneranut innarliisinnaasoq, avatangiisinik illersuiniaqatigiiffik Oceans North Kalaallit Nunaat (ONKN) suliniummut isornartorsiuilluni ilaatigut aamma allappoq. 

Eqalussuilli ikilisarneqartariaqartut aalisartut suli isumaqarput. 

Isummamik allannguinngitsoq

Eqalussuit ikilisarneqarnissaannik kissaateqarneq Kullorsuarmi aalisartut piniartullu peqatigiiffianniik aallaaveqarpoq. Taannalu tunngavigalugu Avannaata Kommuniani kommunalbestyrelsimi Aalisarnermut Piniarnermullu Ataatsimiititaliap siulittaasua Ole Møller, Naleraq, oqaluuserisassanngortitsisuuvoq. Kisiannili eqalussuarnik nungusaanissaq inatsisitigut tunngavissaqanngitsoq paasinarsimmat, suliaq kommunimit taamaatinneqartoq, Ole Møller paasissutissiivoq. 

- ONKN-ip aamma Naalakkersuisoqarfiup taamatut oqariartuuteqarnerat eqalussuit ikilisarneqartariaqarnerat pillugu isummannut allannguinngilaq. Kalaallit Nunaata imartaa eqalussuarpassuaqarpoq, aningaasaliissutillu 300.000 korunniinnaat atorlugit eqalussuit nungutaanissaat navianartorsiortinneqarnavianngilaq.

- Ukiut siuliini iluatsilluartumik eqalussuarnik ikilisaasoqartarnikuuvoq, tamannalu eqalussuit nungutaanerannik kinguneqarsimanngilaq. Maannakkullu suliniut eqalussuit aalisarfinni ikilisarneqarnissaannik taamaallaat siunertaqarpoq.

- Eqalussuit ikilisarneqarsinnaannginnerannik oqariartuuteqarneq ilungersunarpoq, taanna oqarpoq.

Ole Møller Uummannami najugaqarpoq ukiorpassuarnilu aalisarnermik inuussutissarsiuteqarluni.

Akuersaarneqarsinnaanngitsoq

Jens Peter Kielsen Qaqortumi aalisartut piniartullu peqatigiiffianni siulittaasuunermi saniatigut, Kalaallit Nunaanni Aalisartut Piniartullu Kattuffianni, KNAPK-mi, siulittaasumut tulliuvoq. 

Kujataani sinerissap qanittuani aalisarnermut eqalussuit annertoorujussuarmik ajornartorsiutaasut, taassuma oqaatigaa. Eqalussuit ikilisarneqarnissaat pillugu suliniut inatsisitigut aporfeqarnera akuersaarneqarsinnaanngitsoq, KNAPK-p siulittaasuata tullia isumaqarpoq.

- Silap pissusiata allanngoriartornera aalisartunut annertuumik eqquivoq. Taassuma saniatigut eqalussuarpassuit piniutinik nalitoqisunik annaasaqartarnermut peqqutaapput.

- Taamaattumik suliniaqatigiiffiit ONKN-itut ittut aalisartut atugaannut kissaataannullu isornartorsiuleraangata kamannartaqaat.

- Eqalussuit ikilisarneqarnissaat pillugu Avannaata Kommuniata suliniutaa unitsinnagu tapersersorneqartariaqarpoq. Kommune Kujallermilu taamatut iliuuseqartoqarnissaa aamma kissaatiginarpoq, Jens Peter Kielsen oqarpoq.

Eqalussuit ikilisarneqarnerat ilutigalugu qimminut nerukkaatissatut, inunnullu nerisassatut tunisassiarineqartalernissaat pillugu isuma tapersornartoq, taanna aamma isumaqarpoq.