Aalisarnermut inatsimmi paragraf 35-mi,
pisassiissutit tamakkerneqarnissaat pillugu, pisassiissummik piginnittoq
ukiumut pisassiissutigineqartunit minnerpaamik 75 procentinik aalisarnissamut
pisussaaffeqartoq allassimavoq.
Tamanna aalisartut ilaasa PNNP-mik
(Pisassiissutit niuerutigineqarsinnaasut Nammineq Pigisat) aaqqissuussinermut
nuuttut ilaatigut aalisarnermut inatsisip atuutilernerata kingorna qaammatini
siullerni erseqqinnerusumik paasisaqarfigerusussimavaat, Sivert Amondsen,
sinerissamut qanittumi aalisartunut piniartunullu siunnersuisarfimmi,
KONFIFA-mi siunnersorti ilisimatitsivoq.
Aalisarnermut inatsimmi paragraf 35-mi,
pisassiissutit tamakkerneqarnissaat pillugu, pisassiissummik piginnittoq
ukiumut pisassiissutigineqartunit minnerpaamik 75 procentinik aalisarnissamut
pisussaaffeqartoq allassimavoq.
Tamanna aalisartut ilaasa PNNP-mik
(Pisassiissutit niuerutigineqarsinnaasut Nammineq Pigisat) aaqqissuussinermut
nuuttut ilaatigut aalisarnermut inatsisip atuutilernerata kingorna qaammatini
siullerni erseqqinnerusumik paasisaqarfigerusussimavaat, Sivert Amondsen,
sinerissamut qanittumi aalisartunut piniartunullu siunnersuisarfimmi,
KONFIFA-mi siunnersorti ilisimatitsivoq.
Aalisarnermilli inatsimmik
isornartorsiuinerit annikillingaatsiarsimarpasittut siunnersorti aammattaaq
erseqqissaavoq.
Malittarisassat erseqqissarneqartut
Aalisarnermut inatsit nutaaq ukioq manna
januaarip aallaqqaataani atuutilersoq sinerissap qanittuani
aalisartorpassuarnut arlalitsigut paatsiveerussutigineqarpoq, taakkumi
malittarisassanut nutaanut arlalinnut naleqqussartariaqarsimapput, ilaatigut
pisassiissutigineqartut 75 procentiinik aalisartariaqarneq pillugu
malittarisassanut.
Aalisartoq PNNP naapertorlugu aalisartartoq
pisassiissutinik pissarsiguni pisassiissutigineqartut aalisarnissaannut
pisussaaffeqarpoq.
Naalakkersuisut naapertorlugit aalisarnermi
pisuussutit sapinngisamik ukiut tamaasa atorluarneqartariaqarput, taamaammallu
PNNP naapertorlugu aalisarnermi 75 procentimik aalisartussaatitaanermik
pisussaaffeqarneq atuutilersinneqarpoq. Tassa imaappoq aalisartup ukiumut
pisassiissutit minnerpaamik 75 procentii aalisartariaqarai. Ukiuni pingasuni
tulleriinni 75 procentiinik aalisarsimanngikkaanni aalisarnermut inatsit
naapertorlugu pisassiissutigineqartut nalimmassarneqassapput,
taamaaliortoqanngikkunillu pisassiissutit atorneqarsinnaanngitsut
Naalakkersuisunit tiguneqarlutik pisariaqartitsisunut
neqeroorutigineqartassapput.
Pisassiissutit aalisarsinnaasanut
naleqqussarneqartarniassammata pisassiissutinik amerlavallaanik peqartut
amigaateqartunut tunisisarnissaat, taamaalillutillu pisassiissutigineqartut
ukiut tamaasa tamakkiisumik atorneqarsinnaanissaat taama malittarisassaliortoqarnerani
siunertaasoq Aalisarnermut, Piniarnermut Nunalerinermullu Naalakkersuisoqarfik
oktobarimi nalunaarpoq.
- Ukiut pingasut
tulleriisiinnarlugit 75 procentimik pisaqartoqarsimanngikkaangat tamanna
taamaallaat atuuttoq erseqqissassallugu pingaaruteqarpoq. Assersuutigalugu
ukiuni marlunni tulleriiginnartuni 75 procentimik aalisarsinnaanngikkaanni,
ukiulli pingajuanni 75 procentimik annertunerusumilluunniit aalisarsimagaanni
pisassiissutit utertinneqassanngillat, Aalisarnermut, Piniarnermut
Nunalerinermullu Naalakkersuisoqarfimmit nalunaarummi allassimavoq.
Aammattaaq inatsisit
eqaannerulersinneqarput, assersuutigalugu napparsimasimagaanni,
ajutoorsimagaanni imaluunniit sivisuumik amutsivimmiisitsisimagaanni
pisassiissutit 75 procentii ukiut pingasut ingerlanerini
aalisarneqarsimanngippata pisassiissutinik annaasaqartoqassanngilaq,
naalakkersuisoqarfik ilisimatitsivoq.
Isornartorsiuineq annikillisoq
Sivert Amondsen siunnersuisarfimmit
KONFIFA-meersoq naapertorlugu aalisarnermut inatsisip atuutilersinneqarnerata
kingorna aalisartut qaammatini arfinilinni siullerni isumatsassimasut
saaffiginnittartut amerlaqaat.
- Pingaartumik aalisartut
qaleralinniarneq pillugu PNNP-mik aaqqissuussinermut nuussimasut uagutsinnit
siunnersorneqarnissartik pisariaqartilluinnarsimavaat. Sammisat paasiumasat
ilagaat pisassiissutinik 75 procentimik aalisarnissamik pisussaaffik. Amerlanersaasali
maannakkut tamanna qanoq isumaqarnersoq ilisimagunarpaat, taamaammallu
kinguneri ernummatigisariaqassanngilaat,taanna oqarpoq.
Sinerissap qanittuani aalisartut
amerliartuinnartut inatsisip atuutilernerata kingorna paggatassiissutinik
aalisarniarlutik aalajangersimasut maanna aappaagumiit PNNP-mik
aaqqissuussinermut nuunnissartik kissaatigalugu nalunaaruteqartartut
siunnersorti nangilluni oqarpoq.
- Aalisartut aalisarnermut
inatsimmut nutaamut isornartorsiuingaarsimasut qaammatini kingullerni
ikileriarpasipput. PNNP-mik
aaqqissuussineq paggatassiissutinik aalisarnermit ilaatigut aningaasatigut
iluaqutissartaqarnerusoq paasineqarsimasoq tamatumunnga pissutaasinnaavoq, taanna oqarpoq.
Qalerallit saarulliillu tunitsivinni akiisa
qaffasinnerat aalisarnermut inatsisip isornartorsiorneqarnerata qaammatini
kingullerni appariarujussuarneranut Siverth Amondsen naapertorlugu
pissutaaqataagunarpoq.
