Aatsitassarsioqatigiiffik 2027-mi upernaakkut piiaaffiliorneq aallartissasoq naatsorsuutigaalu umiarsuarmik akunnittarfiusussamik pisisoq

Australiamiut-amerikamiullu suliffeqarfiutaat Critical Metals Corp., Tanbreez Mining Greenland aqqutigalugu Killavaat Alannguanni toqqaannanngitsumik akuersissutinik tigusiniarluni Naalakkersuisunit apriilimi akuersissuteqartoq, akuersissutigisamini ilusilersuinermik misiliillunilu qillerinernik aallartitsivoq, Thomas "Tyt" Mogensen, Tanbreez Mining Greenlandimi pisortatut apriilimi toqqarneqartoq oqaluttuarpoq.

– Geoteknikkikkut misissuinerit piiaaffissamik ilusilersuinermi atorneqartussat tamaasa maanna aallartippagut.

- Misissuisarfiit siulliit nappaanersioqqammerpagut, taakkua piiaaffissaq assigaat minneruinnarlutik, taakkualu atorlugit aatsitassat aserorteriffigineqartut, saviminermik immikkoortiterinerit kiisalu eudialyte-mik arfvedsonitimillu akulerutsitsinerit takuneqarsinnaallutillu uppernarsarneqarsinnaapput. Tamatuma saniatigut feldspatitut amiakkuutitaqarpugut, taakkulu piiaaffimmit igitassaqannginniassagatta tuniniarsinnaanerlutigit misissuleruttorparput, Tyt Mogensen oqarpoq inissarlu aamma apeqqutaasoq nangilluni oqaatigaa.

- Piiaaffissami inissaq killeqarmat igitassagut annikinnerpaatinniarpagut.

Nunaqavissut sulisorineqartut

Suliffeqarfik maannakkut Killavaat Alannguanni inunnik 60-inik sulisoqarpoq. Tamatuma saniatigut sanaartortitsisut 60° Nord, Critical Metals Corp.-imit 70 procentimik pigineqartut, piiaaffissami inuttatik 130-it missaanniilersillugit amerlisimavaat.

- Ujarassiuut, qillerisut, peqqissaasut igasullu sulipput, Thomas „Tyt“ Mogensen oqarpoq, sulisullu affaata missaanniittut najugaqavissuusut affai nunanit allaneersut taassumattaaq nassuiaatigaa.

– Nunaqavissut sapinngisamik amerlanerpaat sulilersinniarlugit anguniagaraarput. Aammali inuit aneerasaartitsiviliorsinnaajunnaarlugit biiliminniluunniit aaqqitassanik aaqqitsitsisinnaajunnaarlugit sulisinnaasut tamaasa sulilersinnianngilagut. Tassa suliassat suliarinissaat, nunaqavissut inuussutissarsiornerinik tapersersuineq piginnaanngorsaanerlu oqimaaqatigiissartariaqarput.

Suliffeqarfittaaq assartuinermut nassiussinermullu tunngatillugu pilersuisunit nunaqavissunit ikiorneqartarpoq.

- Taamaammat aningaasat nunaqavissunut atorniarlugit sapinngisatsinnik iliuuseqarpugut,“ Thomas „Tyt“ Mogensen oqarpoq, taassumalu suliffeqarfiup ukioq manna misissuinernut 70-90 millionit koruunit akornanni aningaasartuutigissagai naatsorsuutigaa.

Umiarsuaq akunnittarfik unnuiffissatut

Umiarsuup akunnittarfiup Ocean Endeavourip, upernaaq sakkutuunut Nuummi unnuiffiusup, pisiarineqarnera pilersaarusiornermut ilaavoq.

Umiarsuaq 165-inik initalik upernaaru atorneqarsinnaaniassagami Spaniami amutsivimmi maanna iluarsaanneqarpoq. Ingerlatseqatigiiffittaaq Qaqortumi qullersaqarfiliussalluni sulisunullu ineqarfiliussalluni pilersaarusiorpoq.

Critical Metals Corp. 2029-mi tunisassiulernissaq siunertaralugu 2027-mi apriilimi piiaaffiliornissaq aallartinniassagamikku akuersissutit tamaasa pigilernissaat naatsorsuutigaat. Saffiugassat tunisassiareqqinnissaat Rumæniami ingerlanneqassasoq naatsorsuutigineqarpoq.