Aatsitassarsiorneq inuiaqatigiinnut iluaqutaassaaq
Aatsitassarsiortitseqatigiiffiup Kujataani suliniuteqarnerata iluaqutaanissaa Nalunaq A/S-ip pisortallu akornanni isumaqatigiissutikkut nutaakkut qulakkeerneqassaaq
Nalunami piiaaffik qulimiguulimmit isigalugu.
Assi: Naalakkersuisut
Naalakkersuisut, Kommune Kujalleq aamma aatsitassarsiortitseqatigiiffik Nalunaq inuiaqatigiinni piujuartitsineq pillugu isumaqatigiissuteqarput, taannalu 2026-mi januaarip aallaqqaataannit atuutilerpoq.
Isumaqatigiissutikkut ilaatigut pisussaaffiliisoqarluni kuultisiorfiup inuiaqatigiinnut nunamullu tamarmut iluaqutaanissaa qulakkeerneqassasoq.
– Nuannaarutigalugulu tulluusimaarutigaara isumaqatigiissummik tamatta akuerisinnaasatsinnik atsioqatigiissuteqaratta. Kujataani aatsitassarsiornerup ineriartortinnissaa tapersersorlugulu tapersersorparput qanittumillu suleqatigiinneq qilanaareqaarput, borgmester Malene Vahl Rasmussen (D) oqarpoq.
Isumaqatigiissutip immikkoortuisa ilaat ukuupput:
• Nunaqavissunik sulisussanik sulisoqarnissaq: 2026-mi piiaaffimmi sulisussat 40 procentii tassaassapput nunaqavissut. Tamanna 2027-mi 45 procentinut aamma 2028-mi ukiunilu tulliuttuni tamani 50 procentit angullugit annertusineqassalluni. Tamanna naammassineqanngikkaangat procentimik ataatsimik anguneqannginneri tamaasa 100.000 koruunit Aatsitassarsiornermi«» Aningaasaateqarfimmut akilerneqartassapput.
• Najukkami piginnaasaqarnerulernissamut aningaasaliineq: Ingerlatseqatigiiffik imminut pisussaaffilerpoq minnerpaamik ukiumut 250.000 koruunit najukkami sulisunut pikkorissartitsinernut, sulinermik misiliinernut ilinniaqqinnernullu atortassallugit. Tamanna piviusunngortinneqanngikkaangat nikingassutaasoq Aatsitassarsiornermi Aningaasaateqarfimmut akilerneqartassaaq.
• Kalaallit pilersuisuinik atuineq: Ingerlatsinermut missingersuutit minnerpaamik 10 procentii suliffeqarfinnut nunaqavissunut atorneqartassapput.
• Nunaqavissunut kuultinik tuniniaasarneq: Qaammatit pingasukkaarlugit inunnut Nunatsinni najugaqartunut kuultimik 500 gramimik oqimaassusilik tuniniarneqartassaaq.
– Kalaallit Nunaanni ineriartornermik pitsaasumik pilersitsinissamut nunaqavissunit soqutigisaqaqatigiinnit tapersersorneqarnerput qujamasuutigaarput. Kalaallit Nunaata pisuussutinik periarfissaqarneranik atuiuarnissaq aamma oqartussaasunik sunniuteqarluartumik suleqateqartuarnissarput aalajangiusimavarput, Nalunaq A/S-imi pisortaaneq Eldur Olafsson oqarpoq.
