Aatsitassarsiornikkut suliniutit Nanortalimmi suliassaqarnerulersitsisut

Kujataani aqerluusassamik aamma kuultimik ujaasinerit najukkami inuussutissarsiutinut arlalinnut sunniuteqaqataalerput. Brugsenip aamma South Greenland Boat Charter 44-p Nanortalimmiittut suliassaqarnerulerlutik oqaatigaat, ilaatigut tunisaqarnerusalerlutik, isertitaqarnerulerlutik aamma najukkami sulisunik amerlanerusunik atorfinitsitsinissamut periarfissaqalerlutik.

– Tamanna uatsinnut pisiniarfimmut ingerlatatsinnut pitsaasumik kinguneqarpoq. Amaroq Mineralsimik Nalunami kuultisiorfimmik ingerlatsisumik ullumikkut pitsaasumik isumaqatigiissuteqarpugut aamma GreenRoc Strategic Materialsimi aqutsisut suleqatigilersinnaanerannik oqaloqatigivavut, taakku Amitsumi aqerluusassamik ujaasinissamut akuersissutaateqarput, suliniutaallu aallartilluariarpat suleqatigiillualersinnaassaagut, Nanortalimmi Brugsenimi qullersaq Ulrik Fjord Schultz oqarpoq imalu itisiliilluni:

– Amaroq nerisassiornissaminnut atortussanik tamanik ullumikkut uagutsinnut niuerniartarpoq. Tamannalu pingaaruteqarluni, tassami ukioq kaajallallugu kuultimik ujaasiffimmi inuit 140-t sulisarmata. Sapaatip akunneranut ataasiarluta nioqqutissanik nutaanik kuultimik ujaasiffimmut nassiussisarpugut – soorlu ilaatigut nassiunneqartarlutik manniit karsit 14-it aamma vindruuat karsit 20-t. Taava aamma amerlasuunngorlugit tunisisartunut amerlasuunik inniminniisarpugut, sikorsuit takkutinnginnerini assartortakkatsinnik. Sulisut marlunnik ilaneqartut

Amaroq Mineralsimit pisiarineqartartut Nanortalimmi Brugsenimi kaaviiaartitat tamarmiusut 5-10 procentiisa akornanniipput.

– Tamatuma uatsinnut kinguneraa, Nanortalimmi Brugsenimi sulisunik marlunnik amerlanerusunik atorfinitsitsisinnaalernerput, Ulrik Fjord Schultz oqarpoq.

Nanortalimmit kuultimik ujaasiffiusumut akuersissuteqarfiusumut Nalunamukarneq nalunaaquttap akunnerata affaata missaanik angallammik sivisussuseqartarpoq, qeqertamullu Amitsumut GreenRoc Strategic Materialsip akuersissuteqarfigisaa minutsit 15-20-t missaannik umiatsiamik tikinneqarsinnaalluni.

Ullut tamaasa Nalunamukartartut

South Greenland Boat Charter 44-p, Nanortalimmeersup, angallataatimik Targat marluk ukiuni kingullerni atorumaneqarnerulernerat aamma maluginiarpaa.

Ingerlatseqatigiiffik, Nanortalimmi Brugseni assigalugu, Amaroq Mineralsimik sivisuumik suleqateqarpoq, ullumikkullu ukiup ingerlanerani angallatini naalakkanik pingasunik sisamanilluunniit sulisoqartarluni, taakkulu saniatigut pingasunik inuttaqartarlutik, ukioq kaajallallugu sulisorineqartartunik. Taakkulu piiaaffissatut pilersaaruteqarfiusut aamma Kujataani illoqarfiit akornanni ullut tamaasa angallassisarlutik.

– Aap, Kujataani suliassaqarnerulernera malugisinnaavarput, pingaartumik Nalunami piiaaffissatut pilersaarummut atatillugu. Suliffeqarfitsinnit Amaroq Minerals ukiuni qulingiluangajanni suleqatigisimasarput immikkut ukkatarivarput. Maannakkut ingerlataannut atatillugu ullut tamangajaasa angallassisarpugut – sulisunik, atortunik pilersuinermullu atatillugu assartuisarluta, piginnittoq Poul-Erik Frederiksen oqarpoq.

Immami minittornerit pitsaasut Tamatuma saniatigut South Greenland Boat Charter 44, GreenRoc Strategic Materialsimik ukioq manna aamma suleqateqalerpoq.

– Suliniuteqartoqarnerulerneratigut nunaqavissunik amerlanerusunik sulisoqarsinnaanitsinnik periarfissinneqarpugut ukiorlu kaajallallugu ingerlatsisinnaalerluta. Tamanna nunap immikkoortuanut tamarmut minittornernik pitsaasunik pilersitsivoq, suliffeqarfiimmi arlallit piiaaffissanik suliniuteqartoqarnerulerneratigut suliassaqalermata aningaasarsiorfissaqalerlutillu. Nalinginnaasumik Kujataani nutaamik neriulluartoqaqqilerpoq, tamaanimi ineriartortoqarlunilu aningaasaliisoqartalermat, Poul-Erik Frederiksen oqarpoq.

Suleqatigiinnerput siunissami annertusissallugu neriuppugut, Poul-Erik Frederiksen oqarpoq nangillunilu oqaatigalugu suliniuteqarnerulernertik nunap immikkoortuani tamarmi immami minittornertut pitsaasutut ittunik pilersitsisoq.

Aatsitassarsiortitseqatigiiffiit kaaviiaartitaat amerleriartut

Nanortalimmiinnaanngitsoq aatsitassarsiorfissatut pilersaarutinik marlunnik pineqartunik iluaquteqartoqarpoq. Qaqortumi Sermeq Helicopters-imi qulimiguulimmik attartorusuttoqarnerulernera aamma maluginiarneqarpoq.

Qulimiguulimmik ingerlatsisartup Pilu Nielsenip qulimiguulimmik ingerlatsiviutini ukiut arfinillit matuma siorna aallartippaa, qulimiguulik ataaseq ingerlataralugu marlunnillu qulimiguulimmik ingerlatsisartoqarluni. Ullumikkut 12-13-inik qulimiguulinnik ingerlatsisartoqarpoq allaffissornermilu sulisunik pingasunik-sisamanik sulisoqarluni.

– Aatsitassarsiornermik ingerlatseqatigiiffinnit kiffartuussinitsinnik soqutiginninneq annertusisimasoq ersarissumik misigisimavarput. GreenRoc Strategic Materials aamma Amaroq Minerals kisimik pineqanngillat, kisianni aamma aatsitassarsiornermik ingerlatseqatigiiffiit allat akuersissuteqarfigisaminnut misissuiartortarput. Tamanna sumiiffimmi kaaviiaartitanik suliffissanillu amerlisitsivoq, Pilu Nielsen oqarpoq, taassumalu maluginiarpaa pingaartumik assartuinerup nalaani suliassat amerlisimasut.

– Aasaq tamakkerlugu inniminnerneqarluarpugut, tamatumanilu tunngaviusumik amerlanerusunik angallassisinnaagaluarluta. Nutaartaasoq tassaavoq, ukiukkut aamma suliaqarnerusalernerput. Suliassaqarnerulernerput aatsitassarsiornermik suliniutinik taamaallaat pissuteqarani, aammali allanit attartorneqartarluta soorlu ilisimatusartunit asimi misissuiartortunit. Tamakku saniatigut takornariat aningaasaateqarluartut aamma amerlanerusut takkuttalerput, tamakkumi Kujataani angallanneqarnissamut periarfissaqartoq pasisimavaat. Angallassisarnitta affaanni aatsitassarsiortitseqatigiinnik angallassinerusarpugut, affaallu inuussutissarsiortunik allanik angallassinerusarlutik, Pilu Nielsen oqarpoq.

Piffissami ilungersunartumi isumalluartoqalersoq

Nanortalimmi Brugsenimi qullersaq Ulrik Fjord Schultz uterfigigutsigu, taassuma oqaatigaa, aatsitassarsiortitseqatigiiffiit Kujataani misissuisut, Kujataani illoqarfinnut ilungersunartorsiorfiuleruttortunut isumalluarnermik pilersitseqataasut.

 piffissami illoqarfinnut kujataaniittunut ajornartorsiorfiusumi isumalluarnartumik sunniuteqartut.

– Kommuni aningaasaqarnermigut ilungersunartorsiormat isertuussassaanngilaq, neriuppungali aatsitassarsiortitseqatigiiffiit suliassanik soqutiginartunik nunap immikkoortuani tamaani suli suliassaqartitsiinnarumaartut, Ulrik Fjord Schultz oqarpoq.