Air Greenland Billundimut timmisartuussiunnaartoq

Billundip Nuullu akornanni aasaanerani timmisartuussinerit atorluarneqartut unitsinneqarput.

Air Greenlandip niuernermut pisortaa Chris Shern Sermitsiamut taama paasissutissiivoq.

Timmisartuutileqatigiiffik Jettime Air Greenland sinnerlugu timmisartumik Boeing 737-800-mik 189-inik ilaasoqarsinnaasumik, timmisartuussisarsimavoq, Air Greenlandilli Airbus A320neo Unaaq, Jettimep timmisartuinit mikinerulaartoq, upernaaru tiguguniuk Air Greenlandip Danmarkimi timmisartuussisarnini Københavnip mittarfianut Kastrupimut katersussavai.

- Unaaq Airbus A330-800neo Tuukkaq assigalugu Københavnimut inissinneqassaaq. Timmisartut, timmisartortartut timmisartumilu saqisut Københavnimi ataatsimoortinnissaat iluaqutissanik annertunerusunik pissarsissutigissavarput, Chris Shern nassuiaavoq.

- Københavnimit nammineq timmisartuutitsinnik amerlanerujussuariarluta timmisartuussisalissaagut – taamaalillunilu Københavni nunanit tamalaaneersunut Kalaallit Nunaannut attaveqarfittut pingaaruteqartutut inissisimalissaaq. Nunani tamalaaneeresut Københavnimiit Kalaallit Nunaannut ajornaatsumik angalasinnaanertik ilisimassavaat.

SAS peqatigalugu timmisartuusseqatigiinnissamik isumaqatigiissut

Taamaattoqarnera Jyllandimi timmisartuussinermi sullitat sumiginnarneqarnissaannik isumaqanngilaq.

- SAS peqatigalugu timmisartuusseqatigiinnissamik taasatsinnik isumaqatigiissuteqarpugut, taama iliornikkut nittartakkatsinni Billundimit Kalaallit Nunaanni ornigassanut billetinik ataatsimoortumik pisisoqarsinnaajuassaaq. Jyllandimi sullitat Aalborgimit Nuummut toqqaannartumik timmisartuussinissamut periarfissaqassapput, tassanili isumaqatigiissutit tamarmik suli inissinneqanngillat.

Jyllandimiit Kalaallit Nunaannut angalanissaq atuisartunut ajornarnerulissasoq Chris Shernip nassuerutigaa – ingammik Billundimut angalanermi, akuersissut OSS-imik taaneqartartoq, Greenland Airportsip Nuummi mittarfimmit suli pisimanngisaa tamassumunnga pissutaavoq.

Taamaammat Nuummiit Billundimut angalasut Københavnimi nassatatik tigoqqaartariaqarpaat, Billundimullu SAS-ip timmisartuanut ilaasinnaanngunnginnerminni ataasiarlutik isumannaallisaanermi misissorteqqeqqaartariaqarput.

- Tamanna ajornartorsiutaasoq nalunngilarput – taamaammallu OSS-imik akuersissutip piviusunngortinnissaa sulissutigaarput. Tamannattaaq piffissami sivikitsumi atuutissasoq naatsorsuutigaarput, piaartumillu aaqqiivigineqarnissaa pingaartipparput, Chris Shern oqarpoq, qaquguli tamassuma pinissaa ullulerumanngilaa.

- Jyllandimuttaaq angalasartut aasaanerani Nuummiit Aalborgimut timmisartuussineq suli periarfissaraat, tassami Jyllandimi angalasut suli pingaartippagut. Maannamulli Jyllandimi ingerlatsinigut Aalborgimut katersuutissavagut.

Angalasorpassuaqartoq

Air Greenlandip 2023-mi aasakkut Billundimit Kangerlussuarmut timmisartuussisalernini nalunaarutigereermagu niuernikkut misissueqqissaartoqarpoq.

Jyllandip qeqqani Danmarkillu kujataani, sumiiffimmi Billundip mittarfiata eqqaaniittumi, kalaallit 8000-t danskillu 400.000-ngajaat arlaatigut Kalaallit Nunaannut attuumassuteqartut misissueqqissaarnerup takutippaa.

- Kalaallit Nunaannut utimullu angalasartut 2019-imi misissoqqissaaratsigit piffissami Kangerlussuup Københavnillu akornanni timmisartortartut ilarpassui Jyllandimut ingerlaqqittartut paasivarput, Air Greenlandimi nittarsaassinermut attaveqatigiinnermullu pisortaq Katja Vahl, tassani aqqummi 2023-mi marsip 29-ani siullermeerluni timmisartuussisoqarmat Billundip silataani natersuarmi aappalaartumi oqalugiarnermini oqarpoq.

Aalborg ajugaasoq

Taamaalilluni Billundip Kalaallit Nunaatalu akornanni toqqaannartumik timmisartuussisarnerit maanna unitsinneqarput. Jyllandimi kalaallit timmisartumik angalasartut pillugit unammillernermi Aalborg ajugaasutut inissittuuvoq.

Aalborgip Nuullu akornanni 2025-imiilli toqqaannartumik timmisartuussisoqartarpoq. Aarhusimi angalatitsiviup Ruby Rejserip Air Greenlandillu akornanni suleqatigiinnermi ukioq siulleq timmisartuusseqatigiinnermik taaneqartumi sapaatip-akunneranut marloriarluni timmisartuussisoqartarpoq. Aasakkut timmisartuussineq ukioq manna sapaatip akunneranut ataasiarluni pisarpoq, angalasut amerlanersaat Ruby Rejserip eqimattakkaarlutik angalasartuinit atorneqartarput. Timmisartuussisarneq Jettimep Billundimut timmisartuussisarnera assigalugu Danmarkimi timmisartortitseqatigiiffimmit Airsevenimit Boeing 737-800-mik ingerlanneqartarpoq.

Air Greenland maanna aasakkut ingerlaarfiup siunissaa pillugu timmisartortitseqatigiiffinnik Aalborgimit isumaqatigiissuteqarnissamut isumaqatiginninniarpoq.

- Aalborgimut timmisartuussisarnissaq pillugu isumaqatiginninniarpugut. Taamaammat Aalborgimiit Kalaallit Nunaata tungaanut timmisartuussinerput ingerlaannassasoq maannakkorpiaq allamik oqarsinnaanngilanga. Qanoq annertutigisumik ingerlanneqarnissaa suli aalajangersarneqanngilaq, Chris Shern oqarpoq.

Kastrupimmi mittarfissuani uippajaarnissaraluaq taakkunani pinngitsoortinneqarsinnaammat Billundimut Aalborgimullu ingerlaarfiit tamarmik kalaallinit meerartalinnit utoqqarnillumi atorluarneqartorujussuupput.