Air Greenland teknikkikkut ajornartorsiuteqareerluni silarluttareersorlu Tunumi timmisartuusseqqilerpoq
Air Greenlandip Tunumi timmisartuussinissaraluit sapaatit-akunnerini arlalinni taamaatittariaqartarnikuunerat angalasunut “kipiluttunarsinnaanerat” ajuusaarutigaa. Pissutsit qaqugu nalinginnaaleqqissanersut suli oqaatigineqarsinnaanngillat.
Qulimiguulimmik H125-mik Narsarsuarmiit Tasiilamut mittoqarsimasoq, Air Greenland ilisimatitsivoq.
Assi: Air Greenland
Air Greenland nittartakkamini marlunngornermi nalunaaruteqarpoq. Tunumi angallassineq sapaatit-akunnerini arlalinni ajornartorsiutigineqareersoq nalunaaruteqartoqarpoq.
Qulimiguulik H125 Narsarsuarmiit Tasiilamut marlunngornermi mittoq, tamatumalu kinguneranik piffissami sivisuumi aalajangersimasumik timmisartuussisoqarsimannginnerata kingorna sumiiffimmi qulimiguulimmik timmisartuussisoqaqqilertoq, timmisartortitseqatigiiffik ilisimatitsivoq
Air Greenland naapertorlugu Greenland Copter suleqatigalugu marlunngornerit tamaasa Tasiilap Kulusuullu akornanni timmisartuussisoqartarsimavoq, Dash-8-lu atorlugu Nuup Kulusuullu akornanni timmisartuussisoqartarpoq.
Timmisartortitseqatigiiffik ullut tulliuttut pillugit ima allappoq:
- Pingasunngornermi apriilip 15-ianni: Nuup Kulusuullu akornanni timmisartuussinerit marluk ingerlanneqassapput.
- Sisamanngornermi apriilip 16-ianni: Nunaqarfinnut timmisartuussinerit aallarteqqinneqarnissaat naatsorsuutigineqarpoq.
- Sapaatit akunnerini kingullerni taamaatitsisarnerit ilaasutsinnut kipiluttunarsinnaanerat ajuusaarutigaarput, Air Greenland allappoq.
Teknikkikkut ajornartorsiutit silallu timmiffiusinnaannginnera
Qulimiguuliup teknikkikkut ajornartorsiornera, piffissani aalajangersimasuni timmisartuussinermi pissutsit ajortut allallu unammilligassat timmisartortitseqatigiiffimmit aqunneqarsinnaanngitsut pissutigalugit timmisartuussisinnaannginnernut pissutaasu, timmisartortitseqatigiiffik paasissutissiivoq.
Air Greenlandip qaqugu pissutsit nalinginnaasumik ingerlaqqilissanersut, aamma ilaasut nassiussallu eqqugaasut tamarmik apuuffissaminnut qaqugu apuukkumaarnersut oqaatigisinnaanngilaa.
- Nittartagarput nutaanik paasissutissaqaleraangat ataavartumik nutartertassavarput, Air Greenland allappoq.
Tunumi unammilligassat pillugit Sermitsiap Air Greenland sapaatip-akunnerani matumani attaveqarfigaa, akissutillu utaqqillugit. Ilaatigut angalasut qassit eqqorneqarnersut qanorlu sivisutigisumik pissutsit taamaassimanersut apeqqutigaarput.
