Air Greenlandip Greenland Handling pilersippaa

Timmisartuutileqatigiiffiit allat Kalaallit Nunaannut timmisartuussisaraluartut, timmisartoq mikkaagat Air Greenlandip isumagisarpaa – ilaasut nalunaarsorneqartarnerat, ilaasussat, nassatat, timmisartup piareersarneqarnera il.il. Tamannalu ingerlatseqatigiiffimmi nutaamit allanngortinneqanngilaq.

Ingerlatseqatigiiffik nutaaq Greenland Handling A/S-imik taaguuteqarpoq, nunamilu sullissinermut akisussaaffiit aaqqissuussaanermi namminerisaminik Nuummi Ilulissanilu ilaasunik, timmisartunik nassiussanillu kiisalu Qaqortumi, Sisimiuni Upernavimmilu ilaasunik sullissisussaq.

Isumaqatigiissutit nutaat ukiortaami

Nunami sullissinermut isumaqatigiissutit 2026-mut atuuttut ukiup naanissaata tungaanut allannguuteqarnatik, ingerlaannassapput. Tamatumalu kingorna Greenland Handling, timmisartuutileqatigiiffinnut ataasiakkaanut isumaqatigiissusiussalluni.

Nunami sullissineq tassaavoq timmisartut ilaasullu mittarfimmiisillugit suliaqartartoq, soorlu timmisartumut ikinissaq, ilaasussat timmisartumut ikinissaat, nassatanik assartukkanillu isumaginninneq, ilaasunik ikiuineq timmisartullu tulliata aallarnissaanut piareersaaneq.

- Timmisartut tikiffiini aallarfiinilu suliassat tamaasa suliariniarlugit ingerlatseqatigiiffik pilersinneqarpoq, Air Greenlandimi pisortaaneq Jakob Nitter Sørensen nassuiaavoq.

- Nunami sullissineq ingerlatseqatigiiffiup pingaarnerpaatissavaa, timmisartuussisartullu amerliartuinnartut tapersersussallugit. Ineriartornerup malitsigisaanik annerusumik piginnaasaqarnissaq, immikkut piginnaanngorsarneq aaqqissuussaasumillu timmisartortitseqatigiiffik nunamilu sulisut avissaartinneqarnissaat piumasaqaataavoq.

- Kalaallit Nunaanni silaannakkut angallannermi attaveqaatit ukiuni qulikkuutaani arlalinni, allanngoriartornerpaaffianiippugut. Angallassinerit amerliartornerisa kingunerisaanik suliffeqarfimmik nukittuumik immikkut ilisimasalimmik, nunami sullissinermik sulialinnik, pisariaqartitsineq annertusivoq. Greenland Handlingip ineriartornermut tamatumunnga piareersarnitsinnut timmisartuutileqatigiiffiullu kiffartuussisullu immikkoortinneqarnerat erseqqissumik qulakkeerlugu sulissuteqassaaq.

Sulisut 140-t

Ingerlatseqatigiiffik nutaaq Nuummi, Ilulissani Qaqortumilu 140-nit amerlanerusunik sulisulik Air Greenlandip ingerlatseqatigiiffiani inissisimanini pissutigalugu sulisunut, piginnaanernut atortunullu aningaasaliiuarnissaminut periarfissaqalerpoq.

Ingerlatseqatigiiffik nutaaq Kunuunnguaq H. Overgaardimit, Air Greenlandimi niuernermut ingerlatsinermullu tunngasunik ukiuni 16-ini kingullerni suliaqartumit, siuttuuffigineqassaaq.

Air Greenlandip piginnaaneri ataatsimut katersorneqarsinnaasut ineriartortinneqarsinnaasutut isigai.

- Ingerlatseqatigiiffimmik nutaamik pilersitsinikkut suliassat taakku ineriartorteqqissinnaanngorpavut, pingaarnertut suliassaraarput timmisartortitseqatigiiffinnut ilaasunullu pitsaasumik sullissinissaq, Kunuunnguaq H. Overgaard oqarpoq.