Akunnittarfik nutaanik 60-nik ineerartalik Qaqortumi sanaartorneqangajalersoq

Takornariat aatsaat taamak amerlatigalutik Kalaallit Nunaannut tikittalerput. Tamanna aamma minnerunngitsumik Kujataani, pingaartumillu Kujataata illoqarfiisa annersaanni Qaqortumi malunnarpoq. 

- Kujataa tassaavoq nunap immikkoortortaa takornariaqarnikkut inerisaaffigineqarnissaminut periarfissaqarnerpaaffiusoq. Qaqortumi unnuisarfiit amerlineqarnissaat pisariaqarluinnarpoq nukingernartuullunilu, Martin Heilmann Kristensen, Kammak Companymi pisortaq aamma piginnittuuneq Sermitsiamut oqarpoq. 

Nunatsinni akunnittarfittaarniarluni suliniutit ukiuni makkunani amerliartuinnavipput. Taassumalu niuernikkut suleqatigisani Martin Gjøvad peqatigalugu neriuutigaat akunnittarfimmik nutaamik 60-nik initalimmik illoqarfimmi ammaasinnaassallutik. Pilersaarutaavoq akunnittarfik Qaqortup qulimiguulinnut mittarfikuata nalaani sanaartorneqassasoq.

Suliniummik ingerlatsisuupput Kammak Company aamma Inu:it, taakkulu Martin Heilmann Kristensenimt aamma Martin Gjøvad-imit siuttuuffigineqarput. 

Akunnittarfik, ingerlatseqatigiiffiit taakku marluk aningaasaliiffigisaat, Martin Heilmann Kristensen naapertorlugu asseqanngitsumik inissisimaffeqassaaq. Taannami sissap qulinnguaniissaaq. Taamaalillutik unnuisut tamarmik ineeqqanit tamanit immamut isikkiveqassapput. Kommune Kujallermi kommunalbestyrelsip peqatigiilluta suliniuterput akuersissutigeqqammerpaa aamma illoqarfiup immikkoortortaani sannartugassanut pilersaarusiaq tassungalu tapiliussaq ilanngullugit akuersissutigalugit, taamaattoqarneratigullu akunnittarfikmik sanaartortitsinissarput periarfissaqalerpoq, taanna oqarpoq.

 Akunnittarfik taanna eqimattakkaartunik immikkoortortaqartussaavoq. Ineeqqat marluuttarissat tamarmik 20-25 kvadratmeteriusussaasut saniatigut neriniartarfik, ataatsimiittarfik aamma sulisunut immikkoortortaqarfiit tassaniissapput, taannalu 4.400 kvadratmeterinik annertussuseqassaaq.

Illussanik titartaasartut nersornaasigaasut titartaasuupput

Akunnittarfissaq JAJA Architectsikkunnit Københavnimiittunit ilusilersorneqarsimavoq. Suliffeqarfik taanna Danmarkimi illussanik titartaasarfiit nutaanersaasa isumalluarnartullu ilagaat, taannalu Danmarkimi nunanilu allani unammisitsinerni arlalinni ajugaasarnermigut nersorniarneqalereersimavoq.  

JAJA Architects immikkut maluginiarneqartarpoq piujuartitsinissaq aallaavigalugu sanaartornermik ingerlatsisoqarnissaa sulissutigigamiuk. Tamanna maluginiarneqarluni nersornaasissutaavoq titartaasarfiup taassuma ineriartortitaa MiniCO2 orpinnik illuliaq ajugaammat ”Ukiup illua qisummik sanaaq mingutsitsinikitsoq” aamma Børsen Bæredygtig Casemik (Børsenip piujuartitsinissamik assersuutaa, aaq.) 2024-mi nersorniarneqarluni. 

Jan Tanaka, illussanik titartaasartoq aamma JAJA Architectsimi piginneqataasoq tassaavoq Qaqortumi akunnittarfissap titartaasua. 

- Aallaavigaarput Kalaallit Nunaanni pinngortitamut attaveqarnermik misigisimatitsilluni aamma sanaartornermi atortussiat piujuartitsinissamik siunertallit sapinngisamik annerpaamik atorneqarnissaat. Qisunnik aamma atortussianik kissartunik, sapinngisamik annikinnerpaamik mingitsitsisunik, soorlu betonimit mingutsitsinikinnerusunik atuinissaq, tamatumalu ilutigisaanik illup qaaqqusisuunissaanik inussiarnerpalaartuunissaanillu ilusilersuinissarput, illussanik titartaasartoq Jan Tanaka JAJA Architectsineersoq akunnittarfittaassamik suliniuteqarneq pillugu Sermitsiamut oqarpoq. 

Kujataani takornariaqarnerup annertusarneqarnissaanut periarfissaqarluartoq

Kujataani takornariaqarnermik annertusaanissamut periarfissarissaartoqarpoq, aap, Qeqertarsuup Tunuanitut annertutigilernissaminut periarfissaqarpoq, taamak isumaqarpoq Kammak Companymeersoq Martin Heilmann Kristensen. 

Taassuma assersuutinik taaguivoq Kujataa takornariat takorusutaannik peqarluarneranut ersersitsilluni. Ilaatigut puilasut kissartut, sermit iigartartut, asimi pisuffissat, aliikkutaralugu aalisarnerit aamma illoqarfiit Kujataaniittut pingasut, taakkulu nunaqarfittai takornarianut tikikkuminartut.

- Kujataa Kalaallit Nunaanni pinngortitamik pinnerluinnartumik takusassarpassuaqarpoq. Taamaattumik aamma takornarianut unnuiffissat neriniarfissallu suli amerlanerujussuit pisariaqartinneqarput. Aamma tamatuma ilutigisaanik aatsitassarsiornermik ingerlataqartut unnuiffissanik pisariaqartitsipput. 

- Takornariarpassuarnut allanullu Qaqortumut aqqusaartunut siniffissat ikippallaarput. Tamannalu pissutaavoq suliniutitta aallartinneranut, Martin Heilmann Kristensen oqarpoq. 

-  Takornariat allallu tikeraartut Qaqortumut takkuttut tamarmik inissaqartinneqarnissaat eqqarsaatigalugu siniffiit naammanngillat. Taamaattumik pilersaarut aallartipparput, Martin Heilmann Kristensen oqarpoq.

Kommune nersualaarpaa

Martin Gjødvadip Kommune Kujalleq nersualaarpaa, misigisimavormi ajunngilluinnartumik suleqatigiillutik. 

- Suliniutit taamaattut pillugit pisortat qanoq suleriaaseqarnersut siunnersorluarpaatigut, suliamillu ingerlatsinertik pillugu paasissutissilluartarpaatigut. 

- Ikiorpaatigut qulakkeerniarlugu qinnuteqaaterput eqqortumik qanoq immersussaneripput, taamaalilluta qinnuteqaasiornitsinni kukkusinnaanerput pinngitsoortinniarsinnaalerlutigu. 

- Taamatuttaaq kommunalbestyrelsi toqqaannartumik oqaloqatigisinnaasimavarput, utoqqarnut pisinnaanerusunut angerlarsimaffiliornissamut tunngatillugu Kommune Kujalliup nammineq kissaatigisai ilaatigut eqqartorneqarlutik. Tamannarpiarlu, tassa ammasumik oqaloqatigiillutalu eqqartueqatigiinnerput aqqutigalugu periarfissat assigiinngitsut allatut aaqqinneqarsinnaanerat ilanngullugu oqaluuserigatsigit, naggataatigut uagut qinnuteqaaterput taakkulu kissaataat imminnut naapiffeqartilerpagut, pisariaqartitsinerit tamarmik naapigiarneqarsinnaanngorlutik. Taamaammat assorsuaq kommune nersualaarpara, taanna oqarpoq. 

Akunnittarfiit amerlanerusut Qaqortumi pilersinnissaat sulissutigineqartoq

Manna tikillugu Qaqortumi unnuisarfiit annersarisaat aamma Kujataani akunnittarfiit ataatsimiinnernillu ingerlatsiviusinnaasut annersarisaat tassaavoq akunnittarfik sisamanik ullorialik Hotel Qaqortoq Qaqortumiittoq. 

Taanna Topas Travelimit pigineqarpoq. Tassanilu ineeqqat unnuiffissiat 45-it ataasiuttarianut, marluuttarianut aamma inissiat unnuiffissiat ipput. 

Pitsi Høegh, takornarialeriffimmi Greenland Sagalandsimi pisortaasoq piginneqataasorlu, ernini marluk peqatigalugit pilersaaruteqarput Qaqortup Qaqortullu mittarfiata akornanni akunnittarfimmik 100-nik ineerartalimmik sanaartortitsiniarlutik. 

Heidi Mortensen Møller, akunnittarfik Inuit Housemik aamma Café Heidimik ingerlatsisuusoq, akunnittarfimmik nutaamik 60-nik unnuiffissanik ineeralimmik sanaartortitsiniarluni pilersaaruteqarpoq. Aamma taanna mittarfiup illoqarfiullu akornanni aqqutaanissasoq pilersaarutaavoq.