Akunnittarfilerinerup silarsuaanni sulinermiit ilaquttat pingaarnerusut

Christian Loiborg Tang ataatami Helge Tangip Nuummi ilaqutariit akunnittarfiutaannik Hotel Hans Egede A/S-imik, HHE-tut ilisimaneqartumik, kingornussisussatut ukiut marlungajaat matuma siorna toqqarneqarpoq.

Akunnittarfiutilik Helge Tang 2024-mi januaarip aallartinnerani ernerminut ingerlatitseqqippoq, taannalu Hotel Hans Egedemi pisortap tulliatut toqqarlugu. Jørgen S. Bay-Kastrup pisortaaneruvoq.

Ilaqutariit suliffeqarfiutaanni kinguaariit nikinnerat malunnartinniarlugu ukiumi tassani marsip qaammataani nalliuttorsiornermi, Helge Tang siulersuisuni siulittaasutut sulinissani pingaarnersiorlugu suliaminit tunuarterpoq.

Ullumikkulli 33-nik ukiulik Christian Loiborg Tang atorfimminit tunuarniuteqarluni, inuppassuit ilisarisimasaminnik attaveqarfiginnittarfianni, isumassarsianik avitseqatigiittarfianni suliffimminnillu ineriartortitsiniarsariffianni, LinkedInikkut nalunaarpoq.

- Ilaqutariittut suliffeqarfipput sivisuumik suleqataaffigineratigut ilikkagaqarfigilluareerlugu Hotel Hans Egede A/S-imi ukiup naanerani suliunnaassaanga. - Inuuninni pingaaruteqarluinnarpoq – inuttut suliffittullu – HHE-mi ukiuni kingullerni sulininni misilittagarilersimasakka, attaveqaatikka aammalu angusat amerlasuut tulluusimaarutigaakka. Ilaquttat qanimut suleqatigineranni periarfissanik katersiviullunilu unamminartoqarpoq, tamaasalu qujamasuutissaqarfigaakka, Christian Loiborg Tang allappoq.

Allamut ingerlariaqqinnissani sivisuumik eqqarsaatigilluareerlugu aalajangersimalluni, ilanngullugu eqqaavaa.

- Ilaquttama ulluinnarni piffissaqarluarfiginissaat kissaatigaara – taamatullu isiginnittariaatsit nutaat, sulinermi periarfissat nutaat, piginnaasakka misilittakkamalu nutaamik allatut atorneqarnissaanik periarfissarsiorumallunga.

- Suleqatigisimasakka tamaasa qutsavigaakka – suleqatit, sullittarsimasat, suleqatigisartakkallu. Siunissap qanoq isikkoqarumaarnissaa pissanganartoqartippara, Linkedinimi allannini taama naggaserpaa.

LinkedInimi oqaaseqaaterpassuit atuarlugit Tang juniorip nuannarineqarluarnera qularutissaanngilaq.

- Aalajangerneq sapiitsoq annertooq, Christian. Pissanganarpoq alloriarfissat tulleq qanoq issanersoq, oqaaseqartarfimmi ilaat allappoq.

Christian Loiborg Tang ukiorpaalunni akunnittarfinni ilinniartinneqarpoq, ataataalu ernermi suliffeqarfissuarmi ukiuni arlaqanngitsuni sulisimanerata kingorna akisussaaffeqarnerulernissaanut piffissanngortoq isumaqarpoq:

- Ukiuni aggersuni kinguaariit nikikkiartornerini, aamma illit suliassanik amerlanerusunik suliassinneqarnissannut, suleqatigilluartakkavut suleqatillu pikkorissut suleqatigalugit pilersitatsinnik ineriartortitseqqinnissat takussallugu qilanaarpunga, Helge Tang, ukioq manna apriilimi 75-iliisoq, ernerminut 2024-mi marsimi oqalugiarnermini oqarpoq.

Atorfik nutaaq

Christian Loiborg Tangip Hotel Hans Egedemit akunnittarfilerinermi iluatsilluartumiit ilaquttani salliutinniarlugit aalajangernera tupaallaatigineqarsinnaavoq. Taanna Tusassimi tuniniaanermut pisortatut februaarip aallaqqaataani 2026-mi aallartissaaq.

Sermitsiap pisortaq, periusissiornermik aqutsinermillu cand.merc.-itut ilinniarsimasoq, akunnittarfileriunnaarniarluni tupaallannartumik aalajangernera pillugu itisiliisinniarlugu attaveqarfigaa.

- Ukiumut ullut 365-it sulisarpunga, taamaattumik akunnittarfimmi neriniartarfinnilu pisortaaneq imaannanngilaq. Suliffik piareersimaffigiuaannartussaavara.

- Ullaakkut arfineq-pingasunut sulillunga aallartikkuma ualikkut tallimat arfernullu missaanni angerlartarpunga, nassuiaavoq.

- Utoqqartatsinnukarpunga, ataatanut. Nutaamik misileerusullunga oqarfigaara, taassumalu isumaqatigaanga. Taamaattumik ilaquttat suliffeqarfimmi qaffasissumik atorfeqarneq ajugaaffigigaat qularnanga oqaatigisinnaavara.

- Ukiuni kingullerni naapitama amerlasuut meerartaassaguma piffissami maannamiinnissara, meeqqamalu nuannaarutiginissaat eqqaamassaginga oqarfigisarpaannga. Akunnerit amerlavallaat sulinermut atornagit.

Imminut qanoq ilisaritissinnaavit?

- Ullutsinnut malinnaasutut imminut taasinnaavunga, piffissami maannamiillunga ilaquttannut meeqqannullu tunniusimallunga.

- Assersuutigalugu meeqqannik nangilersuisarpunga, erruisarlunga, sapinngisaralu tamaat ilaquttama ilaginissaannut tunniusimallunga, Christian Loiborg Tang oqaluttuarpoq.

Nangipporlu:

- Qaatuleriasaassaatit meeqqat peqatigerpiarsimanagilluunniit soraarninngorlutit. Inuttullu sunit tamanit sapigaqanngitsutut iliorlunga, meeqqannut suliffinnullu akunnittarfilerisutut piffissarujussuaq atorlugu, ataatsikkoortitsisinnaananga nassuerutigisariaqarsimavara.

Nulianilu Amanda Loiborg Tang, 2019-imi katissimasani peqatigalugu, marlunnik mikisunik meeraqarput.

- Naalungiarput inunngoqqammerpoq. Ualinerani sisamanut soraarlunga meeqqat suli eqeersimaartut angerlartarnera uannut nuannerluinnartuuvoq, pisortaq oqarpoq.

Nutaamik atorfittaarpit?

- Aap, atorfinittussanngorpunga. Misilittakkat nutaat, misileraanerillu allat peqqinnartuupput. Tusassimi nittarsaassinermi immikkoortortami tuniniaanermi ukiup tulliani februaarip aallaqqaataani pisortanngussaanga. Atorfik qullersat ataanni inissisimavoq, Christian Loiberg Tang oqarpoq.

23 millionit koruuningajannik sinneqartooruteqarneq

Ukiuni 2024-mi 2025-milu pisortamut tullersortaanermini nuannisangaatsiarsimanini isertuutinngilaa.

- Ulapissimaqaagut killissaa tikillugu. Akunnittarfimmik aqutsisutut soraarnissara uannut oqitsuinnaanngilaq.

- Taamaattorli qulanngilluinnarpunga. Uannut pingaarutilimmik aalajangerpunga. Ilaqutariinneq toqqarpara, nuannaaqaagullu, oqarpoq.

HHE-p akunnittarfilerineq neriniartarfilerinerlu pingaarnertut ingerlatsivigai, taakkuuppullu Hotel Hans Egede aamma Hotel Hans Egede A/S-ip Polarbo ApS-imit attartugaa akikinnerumaaq HHE Express.

Aammattaaq suliffeqarfiup Samuel Kleinschmidt aqqusernani 15-imiittoq attartorpaa, tassanilu inissiat Nuuk Hotel Apartments by HHE-mik taaguuteqarlutik akunnittarfiupput init pisatsersoriikkat.

Helge Tang, toqukkullu qimagutereersoq Carl Juhl, 1979-ip naalernerani Hotel Hans Egede A/S-imik ingerlatseqatigiiffinnillu allani inissiarpassuarnik pilersitsisuupput. Taakku marluullutik Kalaallit Nunaannut qalipaasunngorniartuullutik tikinnikuupput.

Hotel Hans Egede sisamanik ullorialik Kalaallit Nunaanni akunnittarfiit annersaraat, ilaatigut 156-inik initaqarluni, marlunnik neriniartarfeqarluni ataatsimiittarfiutigalutillu katerisimaartarfiusunik 20-nik peqarluni.

Akunnittarfik akikitsoq pingasunik ullorialik HHE Express 108-nik initaqarpoq.

Helge aamma Christian Tang Hotel Hans Egede A/S-imi tamarmiullutik avillugu piginneqatigiipput. Marluullutik suliffeqarfimmi, siorna akileraarutit ilanngaatigereerlugit 15 millionit koruuninik sinneqartoortumi, siulersuisuni ilaasortaapput.

Nammineq aningaasaatit 22,7 millionit koruuniupput. Ukioq manna suliniuteqarnerulernissaq naatsorsuutigineqarpoq, akileraarutit suli ilanngaatiginagit 22-28 million koruuninik sinneqartoortoqarnissaa naatsorsuutigineqarluni.

- Hotel Hans Egede A/S qimannianngilara, siulersuisuniiginnarpunga suliffeqarfimmilu piginneqataassuseqarlunga, sulimi illoqarfimmiippunga, oqarpoq.

Uteratarsinnaasoq

Ilaqutariit suliffeqarfiutaanni qaffasissumik atorfininnissat takorloorsinnaaviuk?

- Taamaalluarsinnaavoq.

- Ataatagami suli ingerlarsorpoq. Hotel Hans Egede suliffeqarfittut ingerlanneqarneranit peqataajunnaalerpunga, taamaattorli suli siulersuisuniissaanga, pisariaqartinneqartillungalu ikiuutaasassallunga. Ukiualuit qaangiuppata ilaqutariit akunnittarfiutaanni pisortatut atorfineqqissinnaanissara mattunnianngilara, Christian Loiberg Tang oqarpoq.

Akunnittarfinnik ingerlatsisut siulittaasuat aallarnisaasorlu Helge Tang misilittagaqarluartuusoq, ukiuni 40-50-ini takornariartitsinermik suliaqartoq, Kalaallit Nunaannilu 1970-ikkunniilli takornariaqarneq qanoq ineriartorsimanersoq paasiniarlugu sumiiffinni assigiinngitsuni ujarlertariaqanngitsuusutut siusinnerusukkut oqaatigineqarnikuuvoq.

Taassuma Nuummi mittarfissap nutaap eqqaani akunnittarfiliornissaq pilersaarutigaa.

Christian Loiborg Tangip Hotel Hans Egedep ilaqutariittut suliffeqarfiutaata akunnittarfiini pingasuni pisortanngornissaa siunissami qularutissaanngilaq.