Ammarneqarnissaanut qilanaarpoq: - Soorlu juulliliinnallartoq

Maskiinat ingerlarpaluttut nipaat, sanasut, suliaminnik naggammik inaarsaallutik suliaqartut, aammalu suleqataasut ilisivinnut pisiassanik ilioraasut, takusatta ilagaat, pisiniarfeqarfissuup Sarfaarsuit Center-ip iluatungaanut ilorpasinnerusumut alakkarterigatta.

Silataaniit isigalugu isumaliortoqarsinnaassagunarpoq pisiniarfeqarfissuaq ammarneqarnissaminut piareersimasoq. Pisiassat Pisiffimmi ilisivinnut iliorarneqareersimapput, Burger King-ilu takuinnarlugu isumaliornarsinnaavoq neriniartarfik taanna matunik ammaariaannaasoq. Taamaattumillu aamma tupinnanngilaq innuttaasorpassuit apereqqajaasarmata, pisiniarfeqarfissuaq qaqugu ammassanersoq.

Silataaniit iluaniillu maluginiakkat siulliit ilagaat Burger King. Neriniartarfik taanna Pisiffimmi nerisassaarniarfiup pisortaata, Dennis Larsen-ip, tulluusimaarluni takutissorpaa.

- Sisimiuni iluatsilluaqisumik ammaanikuuvugut, taamaammat aamma maani Nuummi iluatsilluartumik ingerlajunaarnissaa pillugu annertuumik naatsorsuutiginnippugut, Dennis Larsen oqaluttuarpoq.

Taamaammat pisiniarfeqarfissuaq suli ammanngilaq

Nuummiut biilimik saneqqullutik pisiniarfeqarfissuassaq taanna, 9.000 kvadratmeterinik angissusilik, nunaminertamilu issimaffigisamini initungaatsiarluni inissisimasoq isigigaangamikku imminnut apereqqajaasarput qaqugu matut ammarneqassanersut. Apeqqullu taanna Dennis Larsen-imut akulikitsumik apeqqutigineqartarpoq.

- Paasilluarsinnaavara inuit apeqqutilliisarmata, qaqugu ammassanersugut. Soorlu aamma illit takusinnaasattut, maanna ammarneqarnissaanut qaninnerulernikuuvugut. Maanna qaammatinik kisitsiunnaarnikuuvugut, sapaatip akunnerinik ullunilluunniillumi ammarnissaanut kisitsilernikuuvugut. Taamaattorli suliassat kingulliit isumagineqarnissaat suli amigaatigivarput.

Tamannalu pissutissaqarluarpoq.

- Pisiniarfimmik taamaattumik ammaassaguit, taava piumasaqaataavoq pisortanit akuersissutinik pissarsisimanissaq. Ammarneqarluni atuuffissaminut atorneqalernissaanut akuersissutinik pissarsisussaavugut. Isumannaallisaanermut tunngasut, qimaaffissiat aammalu sanaartukkami taamaattumi teknikkimut tunngasut akuersissutinik pissarseqqaartussaavugut. Naggaterpiaatigullu kommune uagutsinnut akuersissummik tunniussisussaavoq, Dennis Larsen oqaluttuarpoq.

Sulisussarsiorneq suliaasimavoq annertooq

Sulisut 100-it missaanniittut pisiniarfeqarfissuup pisiniarfiini, kaffisorniartarfiini neriniartarfiinilu assigiinngitsuni sulissapput.

Taamaattorli sulisussarsiorneq imaaliallaannaq iluatsinneqarsinnaasimanngilaq. Pisiffik suliffeqarfittulli allatut sulisussaaleqinermik eqqugaaqqavoq. Maannali sulisussat pisariaqartinneqartut pissarsiarineqarsimalereerput.

- Sulisussat pisariaqartitavut tamakkernissaat iluatseqqajaavarput.

Taamaattorli aamma pisariaqarsimavoq sulisussanik avataaneersunik pissarsiniarnissaq.

- Siulliullugu salliullugulu maani nunaqavissunik sulisussarsiorneq ingerlassimavarput. Nunaqavissut kikkut sulilersissallugit periarfissarivagut? Uagutsinnut pingaaruteqartorujussuuvoq nunaqavissut sulisussatut isumalluutiginissaat. Taakkuli naammanngimmata, avataaniit tikisitsisariaqarsimavugut. Ilaat tassaasinnaapput ukioq ilivitsoq ilinniarnerminnit uninngagallartut, ilaallu tassaasinnaapput sulisussat Filippinerininngaaneersut. Sulisussavullu assigiinngitsunik tunuliaquttaqarluartuupput, Dennis Larsen oqarpoq.

Sulisussat inississorneqarnerat piariiliivikkaluartoq, pisinarfeqarfissuup ammarneqarnissaanut suliassat kingulliit isumagineqarnissaat amigaataaleqqapput. Pisataarniarfinni Jysk-imi Ilva-milu kiisalu nammineq sanaassanik suliaqarnissamut sakkussaarniarfinni Sannatit-ni aammalu thansen-imi nioqqutissat kingulliit iliorarneqartussaapput. Tamatuma saniatigut pisiniarfeqarfissuaq kaffisorniartarfeqassaaq Burger King-ip saniatigut. Taannali kaffisorniarfik kingusinnerusukkut ammassasoq naatsorsuutigineqarpoq.

Ammarneqarnissaanut qilanaarpoq

Suliassat maanna annikitsuinnanngortut inississorneqarnissaat amigaataavoq. Taamaattorli Dennis Larsen qilanaarpoq, pisiniarfeqarfissuup matuisa ammarneqarnissaannut.

- Assorsuaq qilanaarpunga. Allaanngilarluunniit julliliivissoq.

Immaqalu aamma ammarneqarnissaanut innuttaasut utaqqinerat sivikitsunnguanngorpoq. Dennis Larsen-imi neriuppoq, sapaatip akunnerata tulliani matut qaqugu ammarneqassanersut avammut nalunaarutigineqarsinnaalissasoq.

- Neriuutigaarput, sapaatip akunnerata tulliata ingerlanerani avammut nalunaaruteqarsinnaalissalluta. Kisiannili soorlu oqareernittut, uagutsinnut pingaaruteqartorujussuuvoq akuersissutit tamaasa pissarsiareqqaarnissaannut. Tamannalu uagut aalajangersinnaanngilarput qaqugu naammassineqassanersoq, Dennis Larsen naggataatigut oqarpoq.