Aqqut nutaaq soqutigineqarluartoq, Air Greenland nalunaarpoq

Ilulissani mittarfiup nutaap atoqqaartinneqarnissaa qanilliartortillugu Air Greenlandip Ilulissat Københavnilu akornanni toqqaannartumik timmisartuussisalernissani ammaappaa.

Timmisartortitseqatigiiffik nalunaarpoq aqqut nutaaq soqutigineqarluartoq:

– Københavnip Ilulissallu akornanni toqqaannartumik timmisartuussinissamut piumasaqarneq annertuvoq, bilitsillu tunineqarnerat naatsorsuutigisatsinnit amerlanerupput, Air Greenland Sermitsiamut allakkatigut akissuteqarluni oqarpoq.

Timmisartuutileqatigiiffik nangilluni allappoq, tamanna Ilulissani nunanut tamalaanut mittarfiup nutaap ammarneqarneratigut takornariaqarnerup aammalu avannaani nunatsinnilu tassanngaanniillu angalanissamut periarfissanik annertuunik pilersitsisoqarnissaanik naliliinitsinnik uppernarsaasuuvoq.

Naak timmisartuussinissamut inniminniisut amerlagaluartut, Air Greenland nalunaarpoq ammaanersiorluni timmisartuussinermut oktobarip 29-ani pisussamut bilitsit suli pisiarineqarsinnaasut.

Aallartinnerani Air Greenland sapaatip akunneranut ataasiarluni aqqut nutaaq aqqutigalugu timmisartuussisassaaq, tamatumalu kingorna piumaneqarneruleriartortillugu timmisartuussisarnini amerlissavai.

Air Greenland ukiumi siullermi timmisartuussinissamut pilersaaruteqarpoq:

Ukioq 2026 aamma 2027

• Oktobarip naaneraniit decembarip qiteqqunneranut: Sapaatip akunneranut ataasiarluni timmisartuussineq.

• Decembarip qiteqqunneraniit januaarip qiteqqunneranut: Sapaatip akunneranut timmisartuussinerit pingasut tikillugit.

• Januaarip qiteqqunnerata kingorna: Piffissami sivikinnerusumi sapaatip akunneranut marloriarluni timmisartuussineq.

Poorski 2027

• Poorskip nalaani angalasut amerlanerunissaat naatsorsuutigineqarmat, sapaatip akunneranut timmisartuussinerit tallimat tikillugit amerlineqassapput.

Upernaaq 2027

• Poorskip kingorna sapaatip akunneranut pingasoriarluni timmisartuussisoqartassaaq, Airbus A320neo Unaaq 2027-mi upernaakkut atorneqalernissaata tungaanut. Unaaq upernaakkut timmisartuussinermi atorneqalernissaa naatsorsuutigineqarpoq.

Aasaq 2027

• Juunimiit aggustip naanissaata tungaanut Københavnip Ilulissallu akornanni sapaatip akunneranut arfinileriarluni timmisartuussisoqartassaaq. Piffissami tassani takornariaqarnerup nalaani angalanissamut piumasaqarnerup annertunerpaaffissaa naatsorsuutigineqarpoq.

Ukiaq 2027

• Aasaanerani angallaffiunerpaaffiup kingorna sapaatip akunneranut sisamariarluni timmisartuussisoqartassaaq.

• Oktobarip naaneraniit sapaatip akunneranut pingasoriarluni timmisartuussisoqartassaaq, juullip ukiortaallu nalaanni sisamariarluni timmisartuussisoqartaleqqissalluni.

København → Ilulissat: Nal. 09:45 aallassaaq, Ilulissanut nal. 11:45 tikissalluni (najukkami nalunaaqutaq malillugu).

Ilulissat → København: Nal. 13:15 aallassaaq, Københavnimut nal. 21:00 tikissalluni (najukkami nalunaaqutaq malillugu).