Arctic Fish Greenland A/S, 2018-imi pilersinneqartoq Royal Greenland A/S-imiillu piginneqataaffigineqartoq, Kullorsuarmi Nuussuarmilu tunisassiorfeqarpoq.
Suliffeqarfiup 2025-mut naatsorsuutai naapertorlugit, suliffeqarfiup aningaasaqarnera naammaginanngitsumik inissisimavoq. Tamanna ukiut kingulliit marluk ingerlaneranni qalerallit tulaanneqartartut suliffeqarfiup tunisassiorfiinut malunnaatilimmik ikileriarnerannik peqquteqartoq naatsorsuutini takuneqarsinnaavoq.
Arctic Fish Greenland A/S, 2018-imi pilersinneqartoq Royal Greenland A/S-imiillu piginneqataaffigineqartoq, Kullorsuarmi Nuussuarmilu tunisassiorfeqarpoq.
Suliffeqarfiup 2025-mut naatsorsuutai naapertorlugit, suliffeqarfiup aningaasaqarnera naammaginanngitsumik inissisimavoq. Tamanna ukiut kingulliit marluk ingerlaneranni qalerallit tulaanneqartartut suliffeqarfiup tunisassiorfiinut malunnaatilimmik ikileriarnerannik peqquteqartoq naatsorsuutini takuneqarsinnaavoq.
Tamannalu sikuusarnerata allanngorneranik, tamatumalu kingunerisaanik ukioq kaajallallugu qilalugarpassuit aalisarfimmiittalernerannik annerusumik peqquteqartoq Arctic Fish Greenlandip pisortaa Frederik Olsen nassuiaavoq.
Amigartooruteqaqqittoq
Arctic Fish Greenlandip 2025-mut naatsorsuutai naapertorlugit, suliffeqarfik 2024-mi 41,1 millionit koruunit missaannik kaaviaartitaqarlunilu 11,2 millionit koruunit missaannik amigartooruteqarpoq. Suliffeqarfiup pisortaata Frederik Olsenip oqarnera naapertorlugu amigartoorutit millisarniarlugit sipaarniarnerit assigiinngitsut ingerlanneqartariaqarsimapput.
Taamaakkaluartoq suliffeqarfik 2025-mi 31,5 millionit koruunit missaannik kaaviiaartitaqartoq 4,5 millionit koruunit sinnilaarlugit aamma amigartooruteqarpoq. Tamannalu naammaginanngitsutut siulersuisunit nalilerneqarpoq.
Suliffeqarfiullu aningaasaatimi affaat sinnerlugit annaasimagai naatsorsuutini aamma erserpoq. Tamannali aaqqiiviginiarlugu suliniutit assigiinngitsut aallartinneqarsimasut piginnittuniit oqaatigineqarpoq.
- Suliffeqarfiup amigartoorutai annertupput, tamannalu soorunami ilungersunarpoq. Kullorsuarmi Nuussuarmilu tunisassiorfinnut qalerallit tulaanneqartut ukiut marluk ingerlanerani affaannanngornikuupput.
- Tamatumalu kingunerisaanik tunisassiorfinni sulisut ikinnerulerput. Nuussuarmi tunisassiorfimmi ulapaarnerpaaffiup nalaani 15-20-t tungaanut sulisaraluarput, maannakkulli tallimat missaat kisimik sulipput.
- Suliffeqarfik 2018-imi aallarteqqaarami ajunngilluinnartumik ingerlavoq. Silaannaalli pissusiata allanngornera uagut iliuuseqarfigisinnaanngilarput, taamaattorli tulluussarfigisinnaavarput. Taamaammat angallatinik qaleralinniutaasinnaasunik pisaarnissaq maanna eqqarsaatinut ilaavoq, Arctic Fish Greenlandip pisortaa Frederik Olsen oqarpoq.
Assi nammineq pigisaq.
- Suna tamaat qitsullugu ingerlaniarsarivugut. Taamaammat sipaarniarfiusinnaasut assigiinngitsut, soorlu ulluinnarni ingerlatsinermut aningaasartuutit sulisullu tiimii nakkutigeqqissaarpagut, Frederik Olsen oqarpoq.
Arctic Fish Greenlandip annerpaartaa Royal Greenlandimit pigineqarpoq. Suliffeqarfiullu aningaasaqarnikkut pisussaaffini malissagaa eqqumaffigineqassasoq, tamannalu pisinnaappat suliffeqarfiup ingerlaannarnissaa qulakkeerniarlugu, Royal Greenland pisariaqassappat aningaasaliisinnaasoq naatsorsuutini aamma erserpoq.
Silaannaap pissusiata allanngornera eqquinerluttoq
Silaannaap pissusiata allanngoriartornerata kingunerisaanik avannaani sikuusarnera allanngorpoq. Upernaviup eqqaa ukiut siuliini novemberimi sikusaraluarlunilu taamaalinerani sikukkut qaleralinniarluni aalisarneq aallartinneqartaraluarpoq.
Ukiunili kingullerni januaarimi februaarimiluunniit aatsaat sikusalerpoq. Taamaammat silap unerisimannginnera peqqutaalluni aalisarneq piffissami novemberimiit jaanuaari februariluunniit ilanngullugu aalisarneq annikitsuinnarmik ingerlanneqartartoq Frederik Olsen erseqqissaavoq. Taamaammallu piffissami tassani tulaanneqartartut annikitsuinnaasartut taassuma erseqqissaatigaa.
Qilalukkat annertoorujussuarmik qaleralittortartut
Arctic Fish Greenlandip aningaasaqarnerata ilungersunartumik inissisimanera Upernaviup eqqaani qilalugarpassuaqalersimaneranik ilaatigut peqquteqartoq 2025-mut naatsorsuutini ilaatigut atuarneqarsinnaavoq.
Pinngortitaleriffiup paasissutissaatai naapertorlugit qalerallit qilalukkat nerisaannut ilaalluinnarput. Qilalukkat Baffinip Kangerliumanersuata avannarpasinnerusortaani ukiisartut qalerallit ullormut 750 tonsiniit annertunerusut nerisarpaat, kujasinnerusortaanilu ukiisartut ullormut 90 tonsit annertunerusut nerisarlugit.
Qilalukkat ullormut qaleralinnik nerisaqartarnerannut tunngatillugu naatsorsueriaaseq taanna naapertorlugu qilalukkat Baffinip Kangerliumanersuata avannarpasinnerusortaani kujasinnerusortaanilu qaammatini tallimani ukiisartut piffissami tassani qalerallit 750 tonsit missaat nerisarpaat.
Pinngortitaleriffiup paasissutissaatai naapertorlugit Qimusseriarsuarmi qilalukkat qanoq annertutigisumik qaleralittortarnersut sukumiisumik ilisimaneqanngilaq. Tamaani qilalukkat aasaanerani sermip eqqaaniittarput, raajallu nerisarineqartut paasissutissani erserpoq.
Annaassiniarnissamut pilersaarut
Novemberimiit ilaatigut februaari ilanngullugu sikukkut aalisartoqarsinnaajunnaarmat, tamannalu ilutigalugu umiatsiaaqqat atorlugit aamma aalisartoqarsinnaanngimmat, nutaaliorluni eqqarsarnissaq pisariaqartoq Arctic Fish Greenlandimi siulersuisuni ilaasortaq aamma Kullorsuarmi aalisartut piniartullu peqatigiiffianni siulittaasuusoq, kiisalu nunaqarfimmi aqutsisuni ilaasortaq, Timotheus Petersen oqarpoq.
Suliffeqarfiullu aningaasaqarnera siumut allarteqqinneqassappat umiatsiaararsornermiit angallatit atorlugit aalisarnermut ikaarsaarnissaq pisariaqartoq taassuma erseqqissaatigaa.
- Kullorsuarmi Nuussuarmilu angallatinik anginerusunik aalisariuteqanngilaq. Silaannaap pissusiata sikuusarneratalu allanngorneranut naleqqussassagutta angallatinik anginerusunik qaleralinniutaasinnaasunik pissarsinissaq pisariaqarpoq.
- Taamaammat Arctic Fish Greenlandip aalisariutinik marlunnik pisaarsinnaanissaanut periarfissat maanna siulersuisuni eqqartorneqartunut ilaavoq. Pilersaarulli nutaajummat tamanna maanna sukumiinerusumik oqaaseqarfiginissaa ajornakusoorpoq, Timotheus Petersen oqarpoq.
Kullorsuarmi Nuussuarmilu aalisartut umiatsiaararsornermiit angallatersornermut ikaarsaartinneqarnissaat politikkikkut tapersersorneqartariaqartoq taassuma oqaatigaa.
