Bankiviup naatsorsuutai ilimagisamit pitsaanerusut
Bankivik ukiumi naatsorsuusiorfiusumi 2025-mi akileraarutit ilanngaatigereerlugit 41 millionit koruuninik sinneqartooruteqarpoq, tamannalu aningaaseriviup ilimagisaanit annertuneruvoq.
Ukiumi qaangiuttumi Bankivikip aningaasaliinermut atortussaqartitsivia aatsaat taama amerlatigisunit atorneqartoq, aningaaserivik nalunaarpoq.
Assi: Bankivik
Kalaallit Nunaanni atuisut aningaasatigut nukittuujunerat sinneqartooruteqarnerminut pissutaasoq Bankivik nassuiaavoq, kisitsisillu pingaarutillit arlallit innersuussutigai:
- Bankip uninngasuutai 9 procentinik amerleriarput
- Bankip taarsigassarsisitsinera 6 procentimik amerleriarput
- Niuernerup iluani kaaviiaartitat 7 procentimik qaffariarput
2025-mi akiliutit qaffanneqarsimanngillat, taamaattumik ineriartorneq pitsaasoq nutaanik sullitaqalernernik aamma sullitat aningaaseriviup kiffartuussineranik atuinerulernerannik pissuteqartoq, aningaaserivimmiit nassuiaatigineqarpoq.
Aningaaseriviup digitalimik aaqqiissutissanik ineriartortitsineq ukioq kingulleq ukkataraa, aningaaseriviup aningaasaliinermut atortuanik atuisut siorna aatsaat taama siornaamerlatigisut, pisortaaneq Turið F. Argep ilisimatitsivoq. Netbanki atuisunut Kalaallit Nunaanni kisiartaalluni akeqanngitsoq pivaa.
Nunarsuarmi politikikkut eqqissiviilliorneq
Turið F. Argep nunarsuarmi politikkikkut pissutsit USA-llu præsidentiata nunatsinnut soqutiginninnerata kingunerisai eqqaavai.
- Nunat tamalaat akornanni pissutsit toqqissisimanannginnerat sullitatsinnut sulisutsinnullu soorunami sunniuteqarsimapput. Taamaammat sullitatta aningaasaqarnikkut taama patajaatsigisumik ingerlasimanerat ataatsimullu isigalugu taama ingerlalluartigisimanerat assorsuaq tulluusimaarutigalugulu nuannaarutigaarput. Sulisutta pikkoreqisut aamma suli akuunerunerat nersugassaavoq, taamatuttaarlu aamma Kalaallit Nunaanni Savalimmiunilu sulisutta suleqatigiinnerulersimanerat atanerulersimanerallu aamma malugisassaalluni. 2026-mi pilersaarutigaarput suli ineriartortuassalluta, aammalu aningaaserinikkut periarfissamik patajaatsumik unammillersinnaasumillu periarfissaqartitsinerput aallutiinnassallugu, Turið F. Arge, pisortaaneq oqarpoq.
Bankivik Føroya Bankimut ilaavoq, akileraarutit ilanngaatigereerlugit ukiumut 288 millionit koruuninik angusaqarput, tamannalu naammaginartutut oqaatigineqarpoq, naatsorsuutigisaminimmi qaffasinneruvoq.
Ataatsimeersuarnissami marsip 26-ani ingerlanneqartussami 202 millionit koruuninik pissarsiaqartitsinissaq, tassa aktiamut ataatsimut 21,04 koruunit ukiumullu angusat 70 procentii inassuteqassalluni, suliffeqarfissuup nalunaarutaani allassimavoq.
