Naalakkersuisut imermik umiarsuit aalaq atorlugu putsumik saliissutaannit – imermik putsup gassiinut saligutikumik taaneqartartumik – kuutsitsinissaq umiarsuarnut Kalaallit Nunaata imartaaniittartunut inerteqqutigisariaqarpaat.
Demokraatineersoq Justus Hansen, Inatsisartuni aalajangiiffigineqartussamik aalajangersagassatut marlunngornermi juunip qulingiluaani siunnersuuteqartoq, taama isumaqarpoq.
Naalakkersuisut imermik umiarsuit aalaq atorlugu putsumik saliissutaannit – imermik putsup gassiinut saligutikumik taaneqartartumik – kuutsitsinissaq umiarsuarnut Kalaallit Nunaata imartaaniittartunut inerteqqutigisariaqarpaat.
Demokraatineersoq Justus Hansen, Inatsisartuni aalajangiiffigineqartussamik aalajangersagassatut marlunngornermi juunip qulingiluaani siunnersuuteqartoq, taama isumaqarpoq.
Saffiugassat oqimaatsut immami katersuuttartut
Umiarsuit uuliamik kinertumik atuisut, saligummik atuinermikkut silaannarmut mingutsitsinertik annikillisissinnaavaat. Imerli taanna, saliinerup kingorna salinneqarani imarmut toqqaannartumik kuutsinneqartarpoq.
Putsup gassiinut imeq saligutaanikoq imarmi, aalisakkani, qalerualinnilu katersuussinnaasunik, taamaalillunilu inuit peqqissusaannut, nerisassanillu minguitsunik avammut tunisassiatsinnut sunniuteqaratarsinnaasunik ilaatigut aatsitassanik oqimaatsunik, usserutinillu akoqartarpoq. Ilutigisaanik umiarsuit saliivittallit, umiarsuarnut ikummatissanik minguinnerusunik atuisunut sanilliullugit peqqissutsimut ulorianarnerujussuarnik silaannarmut aniatitsisarput. Kiisalu kinertumik uuliakoorneq pinngortitamut, aalisarnermullu piffissami sivisuumi ajoqusiisinnaavoq.
Issittumi immikkut akisussaaffik
“Issittumi avatangiisit, mingutsinneqarnissaannut annertuumik mianernartut illersorneqarnissaannut maani nunatsinni immikkut akisussaaffeqarpugut. Ilutigisaanik silap pissusaata allannguutai Issittumi malunnarnerupput, tamannalu pillugu siuttuunissarput pingaaruteqartorujussuulluni, Demokraatit siunnersuutiminni allapput.
Royal Arctic Line ukiup ataatsip matuma siorna nammineerluni uuliamik kinertumik atuiunnaarnikuuvoq, taamaalillunilu aamma saligutinit imermik igitassamik kuutsitsisarunnaarnikuulluni.
Danmarkip, Sverigep, Finlandillu imartaminni putsup gassiinut imermik saligutikumik imaanut kuutsitsisoqarnissaa inerteqqutigilereerpaat, taamaalillutik umiarsuit orsussamik minguinnerusumik atuilersippaat tamatumalu kingunerisaanik imarmik, silaannarmillu mingutsitsineq annikinnerulerpoq.
- Uanga Danmarkimi assingusumik inerteqquteqalernissamik suliniuteqarpunga, tassanilu inerteqqut umiarsuarnik angallassinermut sunniuteqarsimanngilaq – allaat inerteqquteqalinngikkallarmamut sanilliullugu umiarsuarnik takornariartaatinik amerlanerusunik tikisitsisarpugut – umiarsuilli orsussamik minguinnerusumik atuisarput, Green Global Futuremi siunnersortaaneq Kåre Press-Kristensen oqarpoq.
Assi: Nammineq pigisaq
RAL-ip periusissiamik allannguineranut ilaaginnartoq
Imermik saliinermi atorneqartartumik kuutsitsisarnerup inerteqqutaalernissaanik siunnersuuteqarneq Kalaallit Nunaannut naapertuuttoq Green Global Futuremi siunnersortaaneq, ingeniøri ph.d-lu Kåre Press-Kristensen, isumaqarpoq.
– Kalaallit Nunaata matumani – siunnersuut akuerineqassappat - Island nunallu avannarliit allat arlallit qaangissammagit tulluusimaarutigeqaara. Tamanna Royal Arctic Linep ukiup ataatsip matuma siorna uuliamik oqimaatsumik saligutinillu atuiunnaarneranut atatillugu pissusissamisoorpoq.
– Kalaallit Nunaanni immap pisuussutaat, taamaalillunilu avammut tunisat, mingutsitsinermut illersorneqarnissaat pillugu suliniuteqarneq pitsaalluinnarpoq. Tamannattaarlu Kalaallit Nunaannut aningaasartuutaangaarnavianngilaq, Kåre Press-Kristensen oqarpoq.
– Uanga Danmarkimi assingusumik inerteqquteqalernissamik suliniuteqarpunga, tassanilu inerteqqut umiarsuarnik angallassinermut sunniuteqarsimanngilaq – allaat inerteqquteqalinngikkallarmamut sanilliullugu umiarsuarnik takornariartaatinik amerlanerusunik tikisitsisarpugut – umiarsuilli orsussamik minguinnerusumik atuisarput, taamaalillutik imaq mingutsinnagulu silaannarmut mingutsitsinnginnerungaatsiarput.
siunnersuut naapertorlugu inerteqquteqarneq kingusinnerpaamik 2027-mi januaarip aallaqqaataani atuutilissaaq.
