Eqimattaalluni angalanerit immikkorluinnaq ittuupput

- Trump nuannarinngikkaluarlutigu Kalaallit Nunaata takornariaqarneranut qularnanngitsumik annertuumik sunniuteqarpoq. Niels Pedersen, Nilles & Gislev Rejser-imi angalatitseqatigiiffimmi angallassisartoq taama isumaqarpoq.

- Paasiuminarluinnarpoq. Tusagassiuutit Kalaallit Nunaat pillugu oqaluttuanik ulikkaaraangata, naak nuanniitsumik tunuliaqutaqaraluartoq, inuppassuit nuna misigisaqarfigiumanerulertarpaat, Niels Pedersen qaammat kingulleq Aalborgimiit Nuummut timmisartumi ilaatilluni oqarpoq.

Angalasut arfineq-pingasut ilagalugit Kalaallit Nunaannukarpoq, angalaqataasussallu sisamat Københavnimiit timmisartumik tikittussat Nuummi naapissavaat.

- Nilles & Gislev Rejser ingammik eqimattanik ilaatigut Tysklandimut bussinik angalatitsisarnermigut ilisimaneqarpoq, maannali Kalaallit Nunaat aamma ilanngupparput – taamaalillutalu timmisartoq busserisarparput, Niels Pedersen nassuiaavoq, taannalu Kalaallit Nunaanni angallassinissaminut piareersimalluartutut misigivoq.

- Nuummi GUX-imi ukioq ataaseq ilinniartitsisutut sulinikuuvunga – nuliaralu maanga suliartoraangat ilagisarnikuuara. Inuusuttuullunga aamma qaqqasiortartuunikuuvunga. Tamanna aamma pingaaruteqarpoq, kisianni Kalaallit Nunaat nuannarinerpaallugulu misigisakka ilisimasakkalu allanut oqaluttuarissallugit nuannaraara.

Angalariaaseq immikkorluinnaq ittoq

Eqimattaalluni angalaneq angalariaaseq immikkuullarissuuvoq, tassami angalaqatit ulloq unnuarlu ilagineqartarput. Matumani eqimattat ataatsimoorsinnaanissaannut angallassisoq pingaarutilimmik inissisimavoq.

- Tassani soorunami perorsaasutut misilittakkakka iluaqutaapput, soorlu ilinniarnertuunngorniarfimmi klassimik ataatsimoortinniaraangakku, Niels Pedersen, angalagaangami sekundialuinnarni kisimiissinnaasartoq, oqaluttuarpoq.

- Eqimattaalluni angalaqatigiinnermi angallassisoq pingaaruteqarnerpaavoq, aappariit Elsebeth aamma Per Faurholt Jensen Frederikshavnimeersut, arlaleriarlutik Nilles & Gislev Rejserimik angalasartut, oqaluttuarput.

- Suut tamaasa misilereerpagut – aamma Nilles & Gislev peqatigalugu Europa tamaat angalaffiginikuuarput. Europap kujataani kuukkut umiarsuarmik takornariartaammik angalanikuuvugut, angalatitsivillu peqatigalugu Nordkapimiillutalu Svalbardimiinnikuuvugut, Elsebeth Jensen oqarpoq.

- Suliffeqarfimmi angallassisartut pikkorissorsuummata Nilles & Gislev-imik angalasarnigut toqqissisimanartippagut. Ataasiaannarluta eqquinerlunnikuuvugut — angallassisoq imerusuppallaarsimavoq — taamanilu suli angerlartinnata pisortamit utoqqatserfigineqarpugut.

Eqimattat pingaaruteqartut

- Angallassisoq uagut angalanitsinni ingerlalluassagutta pingaaruteqarluinnarpoq. Soorunami alapernaatsuullutalu sumiiffiit tikeraakkagut pillugit paasisaqarusuttarpugut. Inunnilli allanik sapaatip-akunnerani ataatsimi sivisunerusumilluunniit peqateqartarneq taamatulli pingaaruteqartigaaq - taamaammat angallassisoq pingaaruteqarpoq. Taanna eqimattani ataatsimoortitsisuuvoq.

- Angalasarnitsinni inuppassuit allat naapinnikuuagut, sulilu attaveqarfigisarlugillu inuuissiorneranni assigisaannillu inuulluaqqusarpagut.

- Nilles Gislevilu taamatut aaqqissuussinermik pikkoriffeqarput. Busseraangatta ilaannikkut neriniartarfiliarnata bussip saniani nerriveeralerluta nereqatigiittarpugut – angallassisorlu igallunilu saqisuusarpoq, tamatumalu saniatigut oqaloqatigiinnissamut piffissaqartuaannarluni – aamma unnukkut aliikkusersuilaartarluni. Qiimasuunissarmi angallassisumut pingaaruteqarpoq, aappariit isumaqarput.

- Kalaallit Nunaanni sapaatip-akunnera nuannisarpugut, tamannalu Niels Pedersenimut qujassutissaalluarpoq. Angallassisutsialaavoq, allanullu innersuulluarsinnaavarput.

Nilles & Gislev Rejser Kalaallit Nunaannut angalasaleraluartoq angalatitsivik suliassanik tamakkiisumik suliaqanngilaq. Suliffeqarfiup angalatitsiviit allat assigalugit angalatitsineq naammasseriigaq, angallassineq, unnuinerit, takornariarnerit nerinerillu ilanngullugit, Ruby Rejserimit pisiarisarpaa, taannalu nunatsinni takornarialerinermini nunatsinni niuerfimmi annerpaanut ilaavoq.

Ruby Rejser siuaqqasoq

Ingerlatseqatigiiffik siorna Airseven atorlugu Aalborgip Nuullu akornanni timmisartuussinermik aaqqissuussinikkut nunatsinni niuerfimmi siuarluaqqammerpoq. Angallassinerni ilaatigut ulluni sisamani Nuummiinnissaq, ulloq ataaseq Nuup Kangerluani ilorrisimaarnartumik tupermi unnuinissaq kingornalu ulluni pingasuni kangerlummi angallanneqarluni, kaffillertuniilluni Kangiatalu Illorsuanut takuniaalluni Ilulissaniinnissaq aaqqissuunneqartarput.

Sapaatip-akunneranili kingullermi Ilulissanut angalanissaq sila pissutigalugu taamaatiinnarneqarpoq.

- Ajunngilaq. Nielsip pissutsit aqulluarsimalluinnarmagit toqqissisimaffigaarput – aamma ingerlaannaq pilersaarutit allanngortipallappai, Elsebeth aamma Per Faurholt Jensen timmisartumik angerlamut ingerlaarnerminni oqaluttuarput.

- Pakatsinngilluinnarpugut. Imaassinnaavorlu uteqqittugut. Soorunami Nilles & Gislev, eqimattatut suut ilaaffigisariaqarnersut nalunngimmatigit, ilaaffigalugit, taakku naliliipput.