Eqqarsaatit ilungersunartut allanut oqaluttuarigaanni oqinnerulersarput

Ilinniartuuneq artornarsinnaasartoq naluneqanngilaq.

Immaqa illoqarfimmut allamut nalusamut nooqqammisoqarpoq. Immaqa misilitsinnissamut annilaangasoqartarpoq. Immaqa ilinniaqaterpassuaqaraluarluni kiserliortutut misigisoqartarpoq. Sunaluunniit unammillernartikkaluaraanni eqqarsaatit allanut oqaluttuarigaanni oqinnerulersarput.

Qinngorneq tassaavoq Kalaallit Nunaanni ilinniartunut tamanut akeqanngitsumik tarnip pissusianik ilisimasallit ikiortigalugit katsorsaariaatsimik neqeroorut 2014-imiilli atuuttoq. Qinngorneq qanittukkut Inulerivimmut, nuna tamakkerlugu katsorsartinnermut siunnersorneqarnermullu sullissivimmut, ilanngunneqarpoq taamaalillunilu ullumikkut ilisimasanik avitseqatigiinneq, ataqatigiinneq suleqatigiinnerlu sammillugit tarnip pissusianik ilisimasallit ataatsimoorfiannut annertuumut ilaasoq.

INULERIVIK NUNA TAMAKKERLUGU KATSORSARTINNERMUT SIUNNERSORNEQARNERMULLU SULLISSIVIK

Naalakkersuisut nuna tamakkerlugu katsorsaavimmik siunnersuisarfimillu pilersitsinissaq aallartinniarlugu 2024-mi aggustimi aalajangerput. Suliami tamatumani Inulerivik pilersinneqarpoq.

Inulerivik innuttaasut tamarmik, qanorluunniit utoqqaatigigaluarunik sumilu najugaqaraluarunilluunniit, pisariaqartitsigaangamik ikiorneqarnissamut ajornannginnerulersinnaaniassammata nuna tamakkerlugu suliniutinik katersuillunilu nukittorsaavoq.

Inulerivik Nuummi, Ilulissani, Aasianni, Sisimiuni Qaqortumilu immikkoortortaqarfeqarpoq.

Innuttaasut illoqarfiit taakkua avataani najugallit immikkut ilisimasalinnut attaveqarsinnaallutillu pisariaqartumik ikiorneqarsinnaaniassammata Inulerivik aamma nittartakkatigut attaveqaatitigut siunnersuinermik katsorsaanermillu neqerooruteqarpoq.

Inulerivik pillugu paasisaqarnerorusukkuit

Qinngorneq pillugu paasisaqarnerorusukkuit

Oqaloqateqaqqaarnissamut qinnuteqarusuppit? 

Kikkulluunniit qinnuteqaqqullugit kajumissaarai 

Qinngorneq tarnip pissusaanik ilisimasalinnik psykoterapeutinillu, najuulluni nittartakkatigulluunniit attaveqaatitigut oqaloqateqartartunik Nuummi, Ilulissani, Aasianni, Sisimiuni Qaqortumilu sulisunik aqqaneq-marlunnik sulisoqarpoq.

 - Ajornartorsiutit assigiinngitsorpassuit saaffiginnissutigineqartarput. Soraarummeernissamut annilaanganerusinnaallunilu meeraanermi misigisat alianartuusinnaapput. Kikkulluunniit oqaloqateqarnissamut qinnuteqaqqullugit kaammattortarpagut. Suugaluarpalluunniit soqutaanngilaq, Sara Lennert Jensen, Ilulissani Qinngornermi tarnip pissusianik ilisimasalinnut pisortaanerugallartoq, oqarpoq.

Ataasiakkaarluni eqimattakkuutaarluunniit oqaloqateqarnerit

Ilinniartut Inuleriviup nittartagaatigut oqaloqatigiinnissamut qinnuteqarunik, aallaqqaammut oqaloqateqarneq sorleq taakkununnga tulluarnerunersoq paasiniarlugu oqaloqatigiinneqaqqaartussaapput. Ilinniartut quleriarlutik oqaloqatiginnissinnaapput.

- Kisimiilluni oqaloqateqarnissamut neqerooruteqakkajunneruvugut, aammali inuit pisariaqartitaat naapertorlugit naleqqussarniarlugit ineriartortitsinissamut ammajuaannarpugut, Sara Lennert Jensen oqarpoq.

Ilorrisimaarnerulernissaq annertusarumallugulu taamaatitsiinnartarneq annikillisarniaraat

Qinngornermi tarnip pissusianik ilisimasallit psykoterapeutillu sinerissamut tamarmut siammarsimagaluarlutik oqaloqatigiittuarput.

– Suleqatigiilluaqaagut, aamma suliagut pillugit avitseqatigiittarpugut, Sara Lennert Jensen, psykologit allat assigalugit ullormut pingasoriarluni oqaloqateqartartoq, oqarpoq.

Ilinniartut ilorrisimaarnerulernissaat ilinniarfinnilu taamaatitsiinnartartut ikilisarnissaat Qinngornermi suliniummut siunertaavoq.

Allaaserisaq una Inulerivimmit tapiiffigineqarpoq

Ilinniarneq pillugu sammisaq uani atuaruk.