Eqqartuussiviup London Miningip suliakkiissutaa itigartikkaa

Kalaallit Nunaanni Eqqartuussivik septembarip arfineq aappaanni aatsitassarsiortitseqatigiiffiup Kinamiunit pigineqartup London Miningip, Isukasiani saviminissamik akuersissuteqartup, sapaatit akunneri marluk qaangiutsinnagit namminersorlutik oqartussanut sulianut aningaasartuutinik 250.000 kr-nik akiliissasoq aalajangiivoq. Tamanna eqqartuussiviup pappiaraataani takuneqarsinnaavoq.

Eqqartuussiviup pappiaraatai malillugit aatsitassarsiorfik suliamut allakkiamik tunniussisussaagaluarpoq, tamannali aggustip 18-ani killiliussap qaangiunnerani pisimanngilaq. Taamaammat eqqartuussiviup suliaq itigartippaa, eqqartuussivimmilu ingerlatsinissaq, oktobarip naanerani pisussanngortinneqaraluartoq taamaatillugu. Eqqartuussiviup pappiaraatai malillugit suliaq nangillugu aallarteqqinneqarsinnaanngilaq, London Miningilli eqqartuussisarnermi inatsimmi malittarisassat malillugit eqqartuussivimmut suliassanngortitsinermik nutaamik nassiussinikkut suliassanngortitsisinnaavoq.

2022-mi suliassanngortitsisoqartoq

Taamaalilluni Kinamiut aatsitassarsiortitseqatigiiffiannit London Mining Greenlandimit, 2013-mi Nuup Kangerluata avannaani Isukasiani saviminissamik qalluinissamut akuersissummik 2021-mi arsaarneqarnertik inatsisinik unioqqutitsisuuneranik isumaqartumit, namminersorlutik oqartussanut suliassanngortitsineq unitsinneqarpoq.

Aatsitassarsiortitseqatigiiffiup qalluinissamik akuersissutertik utertilluguluunniit 20 million koruuninik taarsiivigineqarnissartik sillimmasiissutitullu kontuminniittut, 6 million koruuninik annertussuseqartut atorsinnaalernissaat piumasaqaatigaa.

Suliniutit siuariartunngitsoq

Aatsitassarsiortitseqatigiiffiup arlaleriarluni killissaliussanik sivitsuinissamik qinnuteqaatai, suliniutillu siuariartunnginnera, taamatullu aatsitassarsiortitseqatigiiffiup arlaleriarluni nukingisaarisoqaraluartoq sillimmasiissutinik naammattumik akiliisoqarsimannginnera, London Miningip akuersissutaata utertinnissaanut namminersorlutik oqartussat tunngavilersuutigaat.

Suliap saniatigut aatsitassarsiortitseqatigiiffiup suliap saniatigut pappiaqqanik Naalakkersuisuni naalakkersuisoqarfinni aqutsisoqarfinnilu assigiinngitsuni ingerlanneqartunik takunnikkumaneranik suliami kinguaattoornerit ilaatigut patsiseqarput, tamannalu Naalakkersuisut malillugit naapertuuttuunnginnera, eqqartuussiviup ilalerpaa.

Isukasiani akuersissuteqarfiup qaqugu akuersissuteqartunut allanut ammaanneqarnissaanik, Sermitsiap inuussutissarsiornermut aatsitassanullu naalakkersuisoqarfik aperaa, sulili tassunga akissummik tigusaqarnani.