Greenland Cruises: Suleqatigiinneq unammillerneqarpoq kisianni suli suleqatigiippugut
Greenland Cruises tassaavoq suliffeqarfiit ilaat borgmester Lars Erik Gabrielsenip takornarialerinermillu ingerlatsisut allat Ilulissaniit anisinniagaat, borgmesteri taassumalu isumaqatai naapertorlugit avissaartitsisuummat. Kisianni suliffeqarfiup akerlerineqartup Greenland Cruisesip piginnittua ingerlatsisualu, Ivik Knudsen-Ostermann, pilersaaruteqanngilaq tunuartilernissaminut, taassuma takornarialerinermik ingerlataqartut nangittumik suleqatigerusuppai.
Assiliisoq (Toqqorsivimmit): Leiff Josefsen
Greenland Cruises-ip Ilulissani takornariaqarnermut tunngatillugu akerleriinnermi, maanna ukioq ilivitsoq sinnerlugu ingerlasumi akerlilersuiffigineqartunut ilaalluni inissisimavoq. Ingerlatseqatigiiffik ilaatigut akileraarutit kinguartillugit akileraarutitigut akiliinngitsoortarsimaneragaavoq.
Maanna Greenland Cruises-ip piginnittua, Ivik Knudsen-Ostermann, isornartorsiorneqarneq pillugu nipangersimaannarunnaarluni Sermitsiamut oqarpoq, pasilliuterpassuit pisuutitsinerpassuillu aqqusaaraluarlugit, suliaminik unitsitsinissaminut pilersaaruteqarani:
- 2013-imiilli Ilulissani sulivunga, takornarialerinermillu ingerlataqartut amerlanerpaat suleqatigilluarpakka. Neriuutigaaralu suleqatigiinneq ingerlatiinnarumaaripput. Eqqissiviilliorneq amerlanertigut onlinekkut ingerlanneqarpoq, isumaqarpungalu inuit attaveqaqatigiittarfii aqqutigalugit annertoorujussuarmik siaruarneqarsimasoq. Umiarsuit takornariartaatit tikittarnerini amerlanerpaani Ilulissat Excursions suli suleqatigaakka, tamannalu nuannaarutigaara, Ivik Knudsen-Ostermann oqarpoq.
Taassuma aamma erseqqissarpaa Greenland Cruises Kalaallit Nunaanni nalunaarsorneqarsimasoq, aammalu Kalaallit Nunaanni akileraaruteqartartoq. December 2012-imiilli.
Ivik Knudsen-Ostermann Ilulissat Excursions-imut innersuussivoq, borgmester Lars Erik Gabrielsen-ip selskabimi tassani piginneqataammat siulersuisunilu siulittaasuulluni. Borgmesterip Facebook-ikkut Greenland Cruises ingerlatseqatigiiffiillu allat akerleralugit akerliussutsimik takutitsinernik ingerlatsinissamut kajumissaarilutik.
Niuerneq imminut akilersinnaasoq
- Suliffeqarfiga aallartikkakku, Ilulissani kalaallinik pigineqartumik umiarsuarnut takornariartaatinut nunatsinnukarnissaannut tuniniaasartoqanngilaq (agenteqanngilaq, aaqq.). Pingaartumik nunanit allanit pigineqartut namminersorlutillu oqartussat pigisaat tuniniaasartut umiarsuarnik takornariartaatinik sullissipput.
- Takkukkama taamani, piaarnerpaamik takornarianik angallassisartut nunaqavissut mikinerusut suliassat pillugit suleqatigisalerpakka, tamannalu ullumikkut suli ingerlapparput. Ilaasali paasivaat niuernerusoq imminut akilersinnaasoq, taamaattumik niuerfimmut tassunga iserusupput - sunaluunniit sakkugalugu.
Taamaattumik niuernerusoq imminut akilersinnaasoq qularutissaanngilaq, kisianni Greenland Cruises-ip tamanna anguniarlugu sulissutigisimavaa nunaqavissuulluni namminersorluni ingerlatseqatigiiffittut agentitut inissisimalernissaq, tamannaagunarporlu allat, umiarsuarnut takornariartaatinut sullisserusuttut pileritsassimasaat, tassungali killissagaanni ineriartortitsinissamut nukinnik atuinissaq pisariaqarpoq, tamannalu Ivik Knudsen-Ostermann-ip suliffiutini aqqutigalugu angusimavaa.
Eqqissiviilliornerit sullitassaraluanik akeqarput
Maannakkut Greenland Cruises agentitut inissisimalereernerata kingorna, Knudsen-Ostermann-ip paasiuminaatsippaa sooq pissutsit tassunga killissimanersut, tassa suleqatigiinnissamut nukinnik atuinani aporaaffissarsiortoqarnersoq:
- Inuttut nammineq aliasuutigisarpara, siusinnerusukkut suleqatigisimasakka pingaartumik inuit attaveqaqatigiiffii aqqutigalugit 'saassussilersimanerat', kisianni amerlasuut suli tapersersorpaanga, tamannalu ingerlatsiinnarnissannut nukissaqartitsivoq, Greenland Cruises-ip piginnittua, Ivik Knudsen-Ostermann oqarpoq nangillunilu:
- Umiarsuit ilaasa umiatsianik mikinerusunik angallanneqarnissamik neqerooruteqassamaanngillat aasaq manna, tassunga pissutaavoq ukiup siuliani pisimasut pissutigalugit, taamanimi akerliussutsimik takutitsiniarluni takkuttoqarpoq allagartarsualerlutik, taakkunanilu allanneqarsimalluni umiarsuit Ilulissanut tikilluaqqusaajunnaartut, Greenland Cruises suleqatigissappassuk. Taamaammat tamanna uannut, aammalu umiatsianik mikinerusunik piginnittunut takornarianillu angallassisartunut suliassakinnerulernermik kinguneqarpoq, angalanissamut periarfissaq annikinnerulissaaq. Neriuutigaarput aappaagu pitsaasup tungaanut allanngorumaartoq.
Disko Line suli pisariaqartinneqassaaq
Greenland Cruises kisiat pinnagu, takornarialerisut akerliussutsimik takutitsisut umiarsuaatileqatigiiffinnut arlalippassuarnut avoqqaarinnipput. Tassami suliffeqarfiit arlallit taaguutaasigut taagorlugit akerlilersorneqarput. Disko Line aamma sakkortuumik isornartorsiorneqartunut ilaavoq, pingaartumik pasillerneqarluni suliffeqarfiup aningaasat nunatsinnit aniatittarai, aammalu unammilleqatigiinneq eqqortumik ingerlanneqanngitsoq, Disko Line ilaasunik angallassinissamut Namminersorlutik Oqartussanut kiffartuussinissamik isumaqatigiissuteqarami.
Taamatuttaaq Borgmesteri Lars Erik Gabrielsen Avannaata Kommunia tunuliaqutaralugu Namminersorlutik Oqartussanut Disko Linep misissorneqarnissaa piumasarivaa.
Pissutsit ilungersunarluinnaraluartut, umiarsuit takornariartaatit tikittarput, naatsorsuutigalugu takornariat umiarsuarmi ilaasut nunatsinnut tikikkaangamik nunatsinni suliffeqarfinnit kiffartuunneqassasut. Tassungalu atatillugu Knudsen-Ostermann oqarpoq Disko Line suli pisariaqartinneqassasoq:
- Disko Line atorfissaqartinneqartuaannassaaq, tassami umiarsuit ilaat angisoorujussuusarput ilaasorpassuallit, pisariaqartitsisarpullu umiarsuaaqqanik anginerusunik saviminermik sanaajusunik, 36-nik 60-nillu ilaasoqarsinnaasunik. Ilaannikkut ataatsikkut pingasunik umiarsuaqartarpoq, tamarmillu sullinneqarnissartik angallassisussaqarnissartillu naatsorsuutigisarpaat.
Taamaattumik Kalaallit Nunaanni suliffeqarfiit takornariaqarnermik suliaqartuusut akerleriinnertik ingerlatiinnassappassuk, periarfissanik atorluaaniarlutik annertusaanissaminnut takornariat umiarsuarnik angalasut pisariaqartitaannik pilersitsisinnaasunik aningaasaliinissaminnut siunnerfeqalinngikkunik, taava saqitsaattoqarnerata ingerlaannarnissaa suli qanittuararsuusinnaavoq.
Maanna apeqqutaalersoq tassaavoq, inuussutissarsiornermut Naalakkersuisuusoq, Naaja H. Nathanielsen, eqqisseqatigeeqqinnissamut aqqutissiuusseqataasinnaanersoq, septembarimi Ilulissanut tikeraaruni, saqitsaassutaasunik aaqqiiniarnermut atatillugu tassunngassagami.
Tamakku pinerinni aviisit angisuut nunanit tamalaaneersut aamma nutaanik allaaserinnillutik aallartereerput. The Guardian, aviisi angisooq nunarsuarmi tamarmi ilisimaneqartoq pitsaassutsimigut sunniuteqarnermigullu ataqqisaasoq, Ilulissani takornariaqarnermik saqitsaattoqarnera pillugu sammisaqarpoq, tassanilu aviisi allaaserinnippoq "illoqarfik avissaartorsimasoq" pillugu, "Kalaallit Nunaata iluliarsuaqarfittut illoqarfiisa pingaarnersaat" pillugu, borgmester Lars Erik Gabrielsenimut sammisumik, taassuma akerliussutsimik takutitsisoqarnissaanik kaammattuineranut, "suliffeqarfiit sumiiffimmiittut inuussutissarsiornermit ineriartortitsiffiusumit ajattugaanerat" pillugu samminnittoq.
