Greenland Energy Companyp 80 Mile tiguniaraa

Amerikamiut aatsitassarsiortitseqatigiiffiata Greenland Energy Companyp tuluit aatsitassarsiortitseqatigiiffiat 80 Mile, Kalaallit Nunaanni arlalinnik akuersissutaatilik pisiariniarpaa.

Tamanna pappiaqqanik nalilinnik niuerfimmut nalunaarummi allassimavoq. Tigusinerli atuutilinnginnerani Naalakkersuisunit akuerineqaqqaassaaq. 

80 Mile ingerlatseqatigiiffittut pigisamigut White Flame Energy Nunap Qeqqani uuliasiornissamut pingasunik akuersissutaateqarpoq.

Taassuma saniatigut 80 Mile ingerlatseqatigiiffittut pigisani Disko Exploration aqqutigalugu Qeqertarsuarmi Nuussuullu qeqertaasaani piffimmik 30.020 km2-tut annertussusilimmik kobberimik, nikkelimik, koboltimik platinillu ujarattaanik ujarlernissamik akuersissutaateqarpoq.

Taamattaaq 80 Mile nunatta avannaanni Moriusap eqqaani piffimmi Ilmeniteqarfimmi qalluinissamik akuersissutaateqarpoq.  

Aningaasassarsisut

80 Milemi pisortaq Roderik McIllree Greenland Energy Companymi ingerlaqqinnissani naatsorsuutigalugu, aalajangernerli pisortamut Robert Pricemut Greenland Energy Companymilu siulersuisunut ajornakusoorsimasoq, Sermitsiamut oqarpoq. 

Roderik McIllree malillugu tigusineq siunissami aningaasassarsinissaq pingaarnertut pissutigalugu pivoq.   

– Ingerlatseqatigiiffinnik marlunnik taakkunannga kattunneq immikkoortumik ataatsimik nukittuumik oqimaaqatigiissitsinikkut inissisimasumi, annikinnerusumillu allaffissornermut aningaasartuuteqartumik inerneqassaaq, peqatigisaanillu nakkutilliillutik oqartussanut akuersissutissanik suliaqarnerup nanginnerani ataatsimoorussamik attaveqaateqartoqalissaaq. Tamanna pilersaarutit aningaasassarsinissaannut pitsaanerpaamik periarfissiivoq. Amerikami avannarlermi aningaasaliisartut nunarsuarmi annertunersaapput, tamaanilu pappiaqqanik nalilinnik niuerfimmut nalunaarneq, ineriartortitassatut pilersaarutinik, taakku iluatsissappata, aningaasalersuinissamik pissarsinissatsinnik malitseqassaaq, Roderick McIllree oqarpoq.

Aningaasalersuinissamut nukittunerusumik periarfissat

Larry Swets, Greenland Energymi siulersuisunut siulittaasoq, pappiaqqanik nalilinnik niuerfinnut nalunaarummini, kattunnissatut siunnersuutigineqartoq tunngaviatigut Kalaallit Nunaanni ungasinnerusoq isigalugu suut sanarfineqarsinnaanerannut tunngassuteqartoq, oqarpoq. 

– Kalaallit Nunaat pinngortitami pisuussutinik immikkuullarissunik peqarpoq, periarfissalli taakku piviusunngortinnissaannut aningaasassarsisinnaaneq, attaveqaatit, teknikikkut immikkut ilisimasat aningaasaliisullu utaqqilluarsinnaasut pisariaqarput. Suliffeqarfiit pigisallu nalillit taakku kattunnerisigut aallaavimmik nukittunerusumik Kalaallit Nunaanni aningaasaliisinnaasumik, kalaallinut periarfissiisinnaasumik akisussaassuseqartumillu pilersaarutinik, Kalaallit Nunaata ungasinnerusoq isigalugu aningaasaqarnikkut siuariartorneranik aningaasaqarnikkullu imminut oqartussaaffigineranik annertunerulersitsisinnaasunik, pilersitsisinnaanermik periarfissaqalissalluta isumaqarpugut.