Henrik Leth Polarimi pisortatut tunuartoq

Danski Henrik Leth ukiut pingasut sinnerlugit Polar Seafood Denmark A/S-imi pisortaanerup kingorna – ukiullu 30-it sinnerlugit Kalaallit Nunaanni inuussutissarsiornermi siulersuisunilu akisussaaffeqareersimalluni – sulinerminik annikillisaalluni pisortaanertut tunuarniarluni aalajangerpoq.

Tamanna novembarip aallaqqaataani pissaaq, Polar Seafood tusagassiutitigut nalunaarummi allappoq.

Henrik Lethip Polar Seafood Denmarkimi Vodskovimi Nordjyllandimiittumi pisortaanertut taartissa tassaavoq Islandimiu Jonas Engilbertsson. Taannattaaq novembarip aallaqqaataani pisortaaninngussaaq.

Polar Seafood Denmark Danmarkimi tuniniaasoqarfiuvoq aalisakkanik qalerualinnillu Atlantikup avannaaneersunik suliarinnillunilu avammut niueruteqartoq.

Siunnersuisuunertut ingerlaannassasoq

Henrik Leth 64-inik ukiulik novembarip aallaqqaataani Polar Seafood Gruppenimi, suliffeqarfissuarni Polar Seafood Greenland A/S-imi aamma Polar Seafood Denmark A/S-imi siunnersuunertut sulilissaaq.

Henrik Leth Islandimiut aalisakkeriviutaata Brim hf.-ip Polar Seafood Denmarkip aktiaasa 50 procentii 625 million koruunilerlugit pisiarimmagit Polar Seafood Denmarkimi pisortaaninngorpoq. Tamanna 2022-mi oktobarimi pivoq.

Brimip Polar Seafood Greenlandimut piginneqataassutini ingerlatseqatigiiffimmut tunissallugit isumaqatigiissutigalugu qaammatit pingasungajaat matuma siorna tunivai.

Polar Seafood Greenland 925 million koruuninik akiliilluni piginneqataassutinik pisivoq, taamaalilluni suliffeqarfik tamakkiisumik kalaallinit pigineqalerluni. Aammattaaq Brim, niueqatigiinneq inissippat Polar Seafood Denmarkimi piginneqataanermut akiliutigisaminit 300 millionit koruuninik annertunerusunik iluanaaruteqassaaq.

Polar Seafood Greenlandip Brimillu qanittukkut isumaqatigiissutigisaat aningaasalersorneqarnissaanut unammilleqatigiinnermullu oqartussaasunut akuersissutigineqarnissaannut tunngasumik isumaqatigiissutaavoq.

Siulittaasoq: - Leth suliniuteqarluarsimavoq

- Suliffeqarfiup Kalaallit Nunaanni suli annertunerusumik inissisimalernera nuannaarutigaara, soorunami tamanna qamannga pisumik soqutisaraara. Taamaammat tunuaallanneq aamma ajunngitsuuvoq, Henrik Leth Polar Greenlandip piginneqataassutinik pisinera pillugu oqarpoq.

Polar Seafood Gruppenip tusagassiutitigut nalunaarutaani allaqqasutut pisortatut sulinermini ammasuunini, akisussaaffimmik tunniussisinnaanerminik piginnaanini aamma suliffeqarfiup iluani avataanilu sulinermi ileqqorissaarnerup ataqqinninnerullu ilisarnaatigisariaqarnerannik qularutiginninnginnini ilisimaneqaatigai.

- Henrik ukiuni 15-ini Polar Seafood Gruppenip ineriartortinneqarnerani aamma nunatsinni inuussutissarsiornermi qitiusumik sunniuteqarsimavoq. Maanna suliffeqarfimmi siunissamut piareersimalluinnartumi siunnersortaanertut ingerlaqqippoq. Suliniuteqarsimanera aqutsineralu pillugit qujamasoqaagut, Michael Binzer, Polar Seafood Greenlandimi siulersuisuni siulittaasoq oqarpoq.

Henrik Leth Polar Seafood Denmarkimi pisortaanerunerup saniatigut ilaatigut Polar Salmon Hjerting Laksimi Esbjergimi tunisassiorfilimmi aamma Nuummi Aasiannilu tunisassiorfeqartumi Polar Raajat pigisaanni siulersuisuni siulittaasuuvoq.

Henrik Leth Aalborgimi Polar Seafood Denmarkip Vodskovimi qullersaqarfiata eqqaani najugaqarpoq.

Leth aamma allanik soqutigisaqarpoq. Nuummi inissiaatileqatigiiffimmi Sermersuumi siulersuisunut ilaasortaallunilu piginneqataavoq.

Pisortaaninngortoq misilittagaqarluartoq

Jonas Engilbertssonip pisortaaninngortutut suliffeqarfik ineriartortillugulu siumukaqatigissagaa Polar Seafood allappoq.

Jonas Engilbertsson Sermitsiap tusagassiisui naapertorlugit Atlantikup avannaani aalisarnermik inuussutissarsiuteqarnermut tunngatillugu ukiorpassuarni ilisimasaqarluartutut misilittagaqarluartutullu ilisimaneqarpoq.

Islandimi aalisarnermik ingerlatsiviit annersaata Brimip suliffeqarfiutaanit Ukiualuit matuma siorna Polarimut nuuppoq.

Polar Seafood Denmarkimi ilisimaneqarluarpoq, tassanilu piffissami kingullermi ingerlatsinermut pisortaasimavoq.

Engilbertsson ingerlatsinermut pisortatut suliffeqarfiup ulluinnarni ingerlanneqarneranut akisussaasuuvoq, ilaatigut pisortaanermut qaninnertut suleqataasuulluni.

Polar Seafood Denmark akileraarutit ilanngaatigereerlugit 172 million koruuninik siorna sinneqartooruteqarpoq.