Icelandairimiit Keflavikimiit - Kulusummut timmisartuussisarnerit aappaagu marsimiit maajimut unitsinneqarallarpata Tasiilap eqqaamiui sakkortuumik eqqorneqassapput. Timmisartortitseqatigiiffiup ukiukkut oktobarimiit februaarimut timmisartuussisarnini aamma unitsippai.
- Tamanna uggornarpoq – tamannalu inuussutissarsiortunut innuttaasunullu annertuumik eqquissaaq, Demokraatineersoq Justus Hansen, Tasiilameersup Kommuneqarfik Sermersuumi kommunalbestyrelsimut, Inatsisartunullu ilaasortaq taama oqarpoq.
Icelandairimiit Keflavikimiit - Kulusummut timmisartuussisarnerit aappaagu marsimiit maajimut unitsinneqarallarpata Tasiilap eqqaamiui sakkortuumik eqqorneqassapput. Timmisartortitseqatigiiffiup ukiukkut oktobarimiit februaarimut timmisartuussisarnini aamma unitsippai.
- Tamanna uggornarpoq – tamannalu inuussutissarsiortunut innuttaasunullu annertuumik eqquissaaq, Demokraatineersoq Justus Hansen, Tasiilameersup Kommuneqarfik Sermersuumi kommunalbestyrelsimut, Inatsisartunullu ilaasortaq taama oqarpoq.
- Ajoraluartumik politikkikkut tamanna iliuuseqarfigisinnaanngilarput. Icelandair nunanit allaneersuuvoq, niuernikkut atugassarititaasut naapertorlugit timmisartuussisarnermik suliaqartoq, taamaattumik soorunami aningaasarsiornissamut periarfissaqanngippat timmisartuussinissartik orniginartinnavianngilaat.
Icelandair ukiorpassuarni Islandip Kulusullu akornanni timmisartuussisarpoq. Timmisartuussisarneq siornatigut ukiup ingerlanerani, 2024 aallarnerfigalungu ukiukkut oktobarimit februaarimut unitsinneqarpoq. Maannalu timmisartortitseqatigiiffik aalajangerpoq aappaagu aamma marsimiit maajimut timmisartuussisarnini unitsissallugu.
Kulusummi unamminiarnartut
- Pissutsit maanna atuuttut eqqarsaatigalugit, angallaffiunerpaap avatatigut Kulusummiit timmisartuussisarnerit attatiinnarnissaat unamminartuusoq ersersinneqarpoq, Icelandairip attaveqaqatigiinnermut pisortaa Guðni Sigurðsson Sermitsiamut mailikkut taama allappoq.
Icelandair siunissami Kulusummut timmisartuussinermini Dash 8-400-t taamaallaat atortalissavai, taakkulu 76-inik ilaasoqarsinnaapput. Dash 8-200-mik, Air Greenlandip Dashini timmisartuutaanut 37-nik ilaasoqarsinnaasumut assinganik, timmisartuussinerit siornatigut ingerlanneqartarput.
- Timmisartumut tassunga ingerlatsinermut aningaasartuutit ukiuni kingullerni qaffakkiartorsimapput, isertitallu malinnaatinneqarsimanatik. Taamaattumik timmisartuussinerit aasakkut ulapaarfiusumi ingerlanneqartassapput, pissutsit timmisartunik anginerusunik tutsuiginarnerusunik atuisinnaaffiulerpata. Kulusummi mittarfiup qaavata atorsinnaanera killeqarmat aasaanerani, juunimiit septembarip qiteqqunnerata tungaanut aatsaat tamanna pisinnaavoq, Guðni Sigurðsson nassuiaavoq.
- Atuisut upernaakkut angalanissamik atuerusunnerunerat qiimmaallannaraluarpoq, aqqutilli sila pissutigalugu akornusersorneqartarput. Ilaasussaaleqinermiit, kinguaattoornernut, ingerlatseqqilernermullu aningaasartuutit qaffarujussuarsimapput, taamaattumillu ukiup taamaalinerani aqqut aningaasarsiutigalugu ingerlanneqarsinnaasimanngilaq.
Aalajangerneq tamanna Tunumi innuttaasunut annertuumik sunniuteqarumaartoq ilisimallugu, Icelandairip nassuerutigaa.
- Naak nunap immikkoortuini aqqut attaveqarnermut pingaaruteqaraluartoq, maannakkut ingerlatsinermi pissutsini atuuttuni, attatiinnarnissaa unamminartuuvoq. Aningaasaqarnikkut pissutsit maanna atuuttut – ingerlatsinermut aningaasartuutit qaffakkiartupallannerannut, ilaatigut ikummatissanut akigitinneqartut qaffarujussuarnerini – Icelandair-ip aqqutit ukiullu ingerlanerani niuernikkut imminut akilersinnaasut ingerlanniarneqarnissai isiginiartariaqarpai, Guðni Sigurðsson oqarpoq, siunissamilu immaqa timmisartuussinissat amerlineqarnissaat isumaliuutigalugu.
- Soqutigisaqaqatigiit suleqatigalugit Kulusummi angallassinerup attakkuminartuunissaa, siunissarlu ungasinnerusoq eqqarsaatigalugulu piujuaannartinneqarsinnaanera misissussavarput.
- Keflavik Nuumminngaanniit Tasiilarmiunit pingaartinneqarneruvoq, Demokraatineersup Justus Hansenip nassuiarpaa.
Assi: Oscar Scott Carl
Siunissaq neriunarpallaanngitsoq
Unamminiarnartut maannakkut atuuttut Justus Hansenip aaqqinneqarsinnaanngitsutut isigai.
- Siunissaq neriunarpallaanngilaq. Sumiiffimmimi tamanna eqquinerluppoq. Allakkanik nassiussineq aamma sumiiffimmi pisiniarfinnut takornarialerisunullu nioqqutissanik nutaanik assartuineq innarlerneqarput.
- Allakkiat Keflavik aqqutigalugu nassiunneqartarput, tamannalu pinngitsoorsinnaanngilluinnarparput. Allakkiat sukkanerpaamik apuussorneqartariaqarput. Suliffeqarfiit ukiarmi allakkanik kinguaattoortoqarnera pissutigalugu akiliinngitsoornerminni RKI-mut nalunaarutigineqartarsimasut tusarnikuuara.
Air Greenlandip, Nuup Keflavikillu akornanni Kulusuk siunissaq qaninnerusoq eqqarsaatigalugu aqqusaartalernissaa Justus Hansenip Naalakkersuisumut siunnersuutigaa.
- Air Greenland Tasiilaq qulaallugu timmisartuussinermini Kulusuk aqqusaarlugu timmisartuussisalersinnaavoq, Justus Hansen kaammattuuteqarluni oqarpoq, aammali maluginiaqquaa ajornartorsiut tamanna aallaavigalugu Tasiilami nutaamik mittarfittaarnissaq pisariaqarluinnartoq.
- Taamaattumik Tasiilami mittarfissap nutaap akuersissutigineqarnissaa nukinginnartuuvoq. Tamanna siunissaq ungasinnerusoq eqqarsaatigalugu aaqqiissutissatuaavoq, Justus Hansen nassuiaavoq nangillunilu oqarluni mittarfimmut tunngasumik aalajangiisoqarneratigut, suliaq sukkanerusumik aallartissinnaasoq.
- Kommuneqarfik Sermersuumi pilersaarutit tunngaviusut aalajangersoreerpavut, taamaattumik Tasiilami mittarfiliornissamut tamanna akornutaassanngilaq.
- Tasiilami Keflavik Nuummi mittarfimmit pingaaruteqarneruvoq. Tassami Keflavikimi nunanut allanut attaveqarpugut. Keflavikimiit nunarsuaq tamakkerlugu sukkanerusumik angalasinnaavugut – Europamut, Danmarkimut Amerikallu avannaanut. Uagutsinnut tunumeersunut Keflavik Nuummiit periarfissatut pitsaanerusutut isigaarput.
