Ilulissani inuussutissarsiutit pillugit isumasioqatigiittoqassasoq

Ilulissani mittarfissuup nutaap ukiup naajartornerani atulernissaa sioqqullugu, Ilulissani inuussutissarsiutit pillugit isumasioqatigiittoqassasoq, Avannaata Kommuniani kommunalbestyrelsi februari qiteqquttoq aalajangerpoq. 

Tamanna kommunalbestyrelsimut ilaasortap Heidi Møllerip, Demokraatit, siunnersuutaata akuerineqarneranik tunngaveqarpoq. 

Mittarfissuup atulernerata kingunerisaanik illoqarfimmut sunniutissai assigiinngitsut, inuussutissarsiornermik suliaqartut politikerillu akornanni eqqartorneqartariaqartut, siunnersuuteqartoq isumaqarpoq. 

Inuussutissarsiorneq pillugu isumasioqatigiinnissamik pilersaarut Ilulissani sulisitsisut peqatigiiffianniik ilassilluarneqarpoq.

Siumut piareersimaffigisassat

Ilulissani mittarfissuaq ukiup naajartornerani atulerpat, tamanna illoqarfimmut 5.200-t tungaanut inoqartumut assigiinngitsutigut annertuumik sunniuteqarumaartoq, Heidi Møller isumaqarpoq. 

Tamannalu piareersimaffigineqassappat inuussutissarsiornermik suliaqartut, innuttaasut politikerillu piaartumik naapisinneqartariaqartut, taanna oqarpoq.

- Mittarfissuaq atulerpat ineriartornerup sukkasuumik ingerlanissaa qularnanngilaq, tamannalu toqqissisimasumik ingerlassappat siumut piareersimaffigisassat qulaajarneqartariaqarput.

- Inuussutissarsiortut siumut piareersaateqartut ilisimavarput, annertunerusumilli inerisaanissamut periarfissat isumasioqatigiisitsinikkut qulaajarneqassapput.

- Ineriartorneq inuussutissarsiornermut taamaallaat tunngassuteqanngilaq, aammali innuttaasut ulluinnarni inuunerat annertuumik sunnerneqartussaavoq, taanna oqarpoq.

Illoqarfimmut nutsertut amerlanerulernissaat naatsorsuutigineqarpoq. Taamaattumik ilaatigut ineqarnermut tunngasut, meeqqeriviit, atuarfiit, napparsimavik, kigutileriffik pisiniarfiillu qanoq piareersimatiginersut siumoortumik paasineqartariaqartoq, Heidi Møller isumaqarpoq.

Pilerseqqinneqassasoq

Ilulissani Inuussutissarsiornermut Siunnersuisooqatigiit maannakkut uninngavoq, siornatigullu aallarteqqinniarneqartarnera iluatsittarsimanngilaq. Kisiannili inuussutissarsiorneq pillugu isumasioqatigiissitsinissap pinissaa sioqqullugu aallarteqqinneqarnissaa siunertaavoq. 

Aallarteqqinneqarnissaanut suliniutit piffissami qanittumi aallartinneqassasut, tassanilu kommuni innuttaasullu akuutinneqassasut, kommunalbestyrelsip ataatsimiinneranit imaqarniliami erserpoq.

Pisariaqartoq

Tankeeraq ApS-mi pisortaq Nick Bagger Ilulissani sulisitsisut peqatigiiffianni siulittaasup tulleraa. Namminerlu isumaa naapertorlugu Avannaata Kommuniata inuussutissarsiutit pillugit isumasioqatigiinnissaq pillugu aaqqissuussiniarnera pitsaasuuvoq.

- Mittarfissuup atulerneratigut illoqarfimmut sunniutaasussat kommunimiit pimoorullugu isiginiarneqarnera pitsaasuuvoq.

- Illoqarfimmi inuussutissarsiortut pioreersut aallarnisaarusuttullu piareersarneqarnissaat tapersersorneqarnissaallu pisariaqarpoq, taanna oqarpoq.

Inuussutissarsiutit pillugit isumasioqatigiinnissami sanaartorneq, takornariaqarneq aalisakkanillu tunisassiorneq annertunerusumik sammineqarnissat pingaaruteqartoq, Nick Bagger isumaqarpoq.

Pitsaasumik sunniuteqalereertoq

Ilulissani mittarfissuaq suli atulinngikkaluartoq illoqarfimmi inuussutissarsiornermut pitsaasumik sunniuteqalereersoq, Nick Bagger oqarpoq.

- Ilulissani inuussutissarsiornermik ingerlataqartut, soorlu sanaartornerup, takornariaqarnerup akunnittarfiuteqarnerullu iluani suliaqartut, maannakkumut annertunerusumik suliassaqalereerput.

- Inuussutissarsiornikkut periarfissat nutaat matunik nutaanik ammaassipput, taamaattumik illoqarfimmi aallarnisaasut arlallit aallartereertut takusinnaavarput, taanna oqarpoq.

Tankeeraq ApS qatanngutigiit Frank aamma Tommy Baggerimit pigineqarpoq, taakkulu Hotel Ilulissat piginneqataaffigaat. Nick Baggerip oqarnera naapertorlugu, suliffeqarfiit taakku ukiup qanoq ilinera apeqqutaatillugu 60-80-it missaannik sulisoqartarput. Sulisussaaleqineq maannakkumut annertuumik ajornartorsiutaasoq, taassuma ilanngullugu oqaatigaa.