Ilulissani umiarsualivik annertuumik mingutsinneqartoq

Avannaata Kommunia Ilulissani umiarsualivimmi arlalinnik puttasuuteqarpoq, taakkulu umiatsiaaqqanut 400-it missaannut inissaqarput.

Taassuma saniatigut Ilulissani umiatsiaatillit peqatigiiffiat Ilupe 150-it tungaanut ilaasortaqartoq, arfineq pingasunik aamma puttasuuteqarpoq.

Umiatsiaaqqanut talittarfiit puttasut saniatigut angallatit aalisariutit, kilisaatit, umiarsuillu assiginngitsorpassuit umiarsualivimmik atuisuupput.

Royal Greenland A/S aamma Halibut Greenland ApS tamarmik umiarsualiviup silataatungaani aalisakkanut suliffissuaateqarput. Aammali talittarfik ukiuni kingullerni annertusiartuinnartumik takornarissanut angallassissuterpassuarnit aamma atorneqartarpoq.

Ilulissanilu umiarsualivik ulapaarfioqisoq illoqarfimmi 5.200-t tungaanut inoqartumi inuussutissarsiornerup sukkasuumik ineriartorneranut takussutissaavoq. Tamannali aamma illuatungeqartoq Ilulissani umiatsiaatillit peqatigiiffianni Ilupe-mi siulittaasoq Arne Petersen isumaqarpoq. Tassami Ilulissani umiarsualivik tattorliuuffiuinnarani aammali annertuumik mingutsitaasoq, taanna oqarpoq.

Umiarsualivilli salinneqassappat suliassaq annertoorujussuusoq, Avannaata Kommuniani Teknikkikkut Ingerlatsivimmit oqaatigineqarpoq.

Mingutsitsineq annertooq

Ilulissani umiarsualivimmi imaani plastikkerpassuit eqqakkallu allat takussaasarput. Aammalu umiarsualivimmi upernaakkut siku aakkaangat eqqakkat assigiinngitsorpassuit aagunneqarlutik imaanut siaruaattarput. Ukiorpassuarnilu ajornartorsiut tamanna atuussimasoq Ilupe-mi siulittaasoq nassuiuaavoq.

Eqqakkat saniatigut talittarfimmi imaq ipertoqisoq annertuumik pujaqarpoq, tamannalu pituuttanut taamaallaat pinnani aammali umiatsiaaqqat angallatillu naqqinut mingutsitsisartoq taassuma oqaatigaa. 

Talittarfiup qaavani arlalinnik, soorlu uuliakunut eqqaaveqarpoq. Umiarsualiviulli imartaata mingutsernaveersaarneqarnissaa pillugu pisortat tungaanniit suliniutit amigartut Arne Petersen isumaqarpoq.

- Umiarsualivimmi imaanut mingutsitsineq annerpaamik atuisut pilersitaraat. Kisianni tamatuma pinaveersimatinneqarnissaa anguniarlugu pisortat tungaanniit ersarissumik iliuuseqartoqanngilaq, tamannalu soorunami uggornarpoq.

- Ilaatigut puisit iluitsuutillugit sissamut pituinnarneqartarput, taakkulu asiugaangamik pujammik annertuumik pilersitsisarput.

- Taamaammat umiarsualivilimmi mingutsitsinerup sapinngisamik minnerpaaffissaaniitinneqarnissaa pisariaqarluinnaraluarpoq, taanna oqarpoq.

Ilulissani mittarfissuup oktoberip ingerlanerani atulernissaa naatsorsuutigineqarpoq, illoqarfillu nunatsinni takornariaqarfiit annerpaat ilaanniittoq pitsaasumik avammut nittarsaanneqassappat umiarsualivimmi mingutsitsineq akiorniarlugu piaartumik iliuuseqarfigineqarnissaa pillugu Arne Petersen pisortanut kaammattuivoq.

Ajornartorsiutaasoq

Ilulissani umiarsualiviup minguunera ajornartorsiutaasoq Halibut Greenlandimi siulersuisuni siulittaasoq Kaaleeraq Mathæussen oqarpoq.

- Umiarsualiviup minguunera soorunami ajornartorsiutaavoq. Umiarsualivimmi angallatit uuliakoortarnerat amerlasuutigut kilisaatininngaanneersuusarpoq, tamannalu mingutsitsinermut pisooqataasoq isumaqarpunga.

- Taamaammat uuliakut assigisaallu imaanut kuutsiinnarnagit isumannaatsumik poorlugit katersorneqartarnissaat pisariaqarpoq, taanna oqarpoq.

Aalisakkat perlukui Halibut Greenlandimeersut Royal Greenlandimeersullu imaani avataanut igikkiartorneqartarput. Taamaammat umiarsualiup mingutserneqarnera aalisakkerivinniit marluusuniit pisuunissaa Kaaleeraq Mathæussenip ilimaginngilaa. Kisiannili plastikkit eqqakkallu allat nunamiit imaanut teqqaasut amerlasinnaasartut, taakkulu umiarsualivimmi annertuumik mingutsitseqataasut, taassuma oqaatigaa.

- Aammali talittarfiup annertuumik mingutsinneqarnera pinngitsoortinniarlugu suliniutit annikippallaarujussuartut isumaqarpunga, taanna oqarpoq.

Ilulissani Royal Greenlandip allaffiani atorfillip Freja Jensenip oqarnera naapertorlugu  aalisakkanik suliffissuup eqqaata sapinngisamik minguitsuunissaa suliffeqarfissuup qulakkeerniartarpaa. Kisiannili umiarsualivik annertuumik tattorliuuffiulersimasoq, ajornartorsiullu annertusiartortoq, taassuma oqaatigaa.

Suliassaq annertusoq

Ilulissani umiarsualiviup imartaata minguunera kommunimiit eqqumaffigneqartoq Avannaata Kommuniani Teknikkikkut Ingerlatsivimmi pisortaq Hans Inúsugtok oqarpoq.

- Ilulissani umiarsualivik ukiorpassuit ingerlanerini mingutserneqarsimasoq ilisimavarput. Maangaannarlu eqqaasoqannginnissaa ukiut tamaasa kaammattuutigisarparput. Taassuma saniatigut umiarsualivimmi eqqakkanik katersuineq ingerlattarparput, taanna oqarpoq.

Ilulissani umiarsualiviup imartaata minguunerata Avannaata Kommunianiit iliuuseqarfigineqarnissaa pingaartinneqartoq Hans Inúsugtok oqarpoq. Sukumiisumilli saliisoqassappat tamanna umiarsualivimmik atuisut tamarmik suleqatigiissutigisariaqaraat, suliassarlu annertoorujussuusoq, taassuma erseqqissaatigaa.