Imeq umiarsuarmut imertaammut maqissinnarlugu nunanut allanut tuniniartalissamaaraat – aappaagu aallartikkusupput 

Umiarsuaq imermut assartuut Atammiup eqqaani Sammisup Tasersuanut imertarsinnarluni ingerlaartoq aappaagumiit takussaalissagunavippoq. 

Imeq taanna tasersuarmiit sissamut ruujorilioriarluni umiarsuarmut toqqaannaq maqinneqartassaaq, umiarsuarmillu nunanut suliffeqarfinnullu tunisiffiusunut assartorneqartassalluni.

Tusaannarlugu immaqa ajornanngippasissinnaavoq, aammalumi tunisassioriaasissartik pisariunngitsoq suliffeqarfiup Agrowa ApS-ip pisortaata oqaluttuaraa. 

- Raketiliorlutalusooq pinavianngilagut, qujanartumik, Anda Uldum oqarpoq. 

Nunatsinniit avammut imermik tunisassiorniarlutik pilersaartartut ukiuni kingullerni takusareerpagut. Ilaat iluatsittarput, amerlanerilli annertunerusumik tusaqqittanngilagut. Imermik tunisassiulernissartik piviusorsiortoq pisortap oqaatigaa. 

Europap Kujataa Kangialu Qiterleq

Imaanngilarli aqagunnguaq tunisassiorneq aallartissinnaasoq. Sammisup Tasersuanik kisermaassilluni atuisinnaanermik tunineqarnerminni sulinertik aatsaat iluami aallartissinnaalerlugu pisortap oqaluttuaraa. 

- Massakkut akuersissut pivarput, taava aatsaat suliassaq annertooq aamma aallartissooq, imeq tuniniassallugu nunarsuarmi. 

Tuniniaaffissatut nunat pingaarnertut oqaloqatigisaat imermik amigaateqarfiusuneersuupput. Assersuutigalugu nunat Europap Kujataaniittut Kangia Qiterlermiittullu. Nunalli oqaloqatigisatik sorliunersut oqaatigerusunngilaat. 

- Suli taanna inissivinngilaq kikkoqqissaajussanersut, aamma uani nunat atiinik annertunerusumik taakkartuinnginninnut sillimaniarnermik tunngaveqarpoq. Sillimaniarnermut tunngatittaramikku nunat imermik amigaatillit. Soorlu nunanut allanut tunngatillugu navianartumik inissinnginniassagamik, soorlu oqarlutik "imeerutilerpugut", taamatut imminnut nittarsaakkusunnginnamik, Anda Uldum oqarpoq. 

Taamaattoq soqutiginnittoqarluarnerarpaa. 

- Takussaavallaanngittuuvoq tunisassiorneq una pilersinniagarput, kisianni nunat tamalaaninngaanniit soqutiginninneq annertoorujummik malugisinnaavarput, taanna oqarpoq. 

Suliffissat qassit pilersinneqassaneri nalugallarpaat  

Imeq imigassatut ulluinnarnilu atugassatut pingaarnertut tuniniarneqassaaq, aammali nunaatilinnit imerterutissatut atorniarlugu soqutigineqartoq Anda Uldumip oqaluttuaraa. Imeq arlaannik akunagu tuniniarneqartassaaq, nunalli pisisut nammineq maleruagassatik atorlugit akusarsinnaassavaat. 

Tasersuarmik atuinissamik akuersissummik pissarsisoqareersorlu tunisassiornerup aallartinnginnerani pinngortitamut avatangiisinullu sunniutissai pillugit VVM-imik taaneqartartumik nalunaarusiortoqartussanngorpoq, taassumalu kingorna tunisassiorfiusumi ruujorinik assigisaanillu aatsaat sanaartortoqarsinnaalissalluni.

Agrowa ApS-ip tunisassiornissamut pilersaarusiornermini Rambøll Grønland suleqatigaa. Tunisassiornerli aallartippat suliffissat qassit pilersinneqassanersut suli ilisimaneqanngilaq.

 - Suliffissanik qanoq amerlatigisunik pilersitsissanerluta massakkorpiaq oqaatigisinnaanngikkallarpara.

- Kisianni soorunami kissaataavoq qanittuani suliffissanik pilersitsisoqassasoq. Umiarsuaq tikikkiartortartussaavoq, uninngasussaavoq, nakkutilliisoqartartussaavoq assigiinngitsunillu. Soorlu ruujorit nakkutigineqartussaapput suliarineqartussaallutillu, soorunami Kalaallit Nunaannut sunniuteqarluarnissaa sapinngisarput tamaaviat sulissutigissavarput, Anda Uldum oqarpoq. 

Trumpip nunatsinnik persarinninnera ataqqinninnerulersitsisoq 

USA-p præsidentiata nunatsinnik persarinninnerata kingunerisaanik nunarput nunarsuarmioqatigiinnit ilisimaneqartorujussuanngorpoq. Tamanna imermik tunisassiorniartut aamma malugisarpaat.

- Nunatsinni najugaqartunut kalaallinullu nuannerpallaarnikuunngilaq, kisianni taanna soqutiginninneq annertoorujussuaq malugisinnaavarput. Taavalu aamma oqaloqatiginnikkaangatta ataqqinninnerujussuaq misigisarparput. Taanna qujanaqutiginikuuaa, Anda Uldum oqarpoq. 

Nunatsinnilu imeq annertoorujussuaq avammut kuuinnartarmat tunisassiorniarnerminni atorluarusuppaat. 

- Nalunngilarput imeq annertoorujussuaq avammut kuuinnartoq, atorluarneqassananilu imaanut kuuinnartoq. Taanna atorluassallugu soorunami eqqarsaataavoq, taavalu inuiaiqatigiinnut kalaallinut sunniuteqarluartussamik imermik tunisassiulerutta.  

- Neriuppunga ukiup ataatsip iluani imermik avammut nioqquteqalernissaq aallartissinnaassagipput, Anda Uldum oqarpoq.

- Piviusorsiortorujussuuvoq

Nunarsuarmi imerpalasunik umiarsuarnik assartuineq takornartaanngilaq. Assersuutigalugu juicenik Brasiliamiit Europamut assartuisoqartarpoq. Agrowa ApS umiarsuarmik imertaammik suli pisinikuunngilaq imaluunniit attartornissamik isumaqatigiissuteqarsimanani. Tamannali pisortap inississaqqaarnerarpaa.

Suliffeqarfik Atammiup eqqaanit imermik tunisassiorniartoq Agrowa ApS-imik ateqarpoq, taannalu Nowa Groupimit pigineqarluni. Anda Uldum Agrowa ApS-imi siorna novembarimi pisortanngorpoq, tassungali pinngikkallarami suliffeqarfiup imermik tunisassiulernissaq ukiorpaalunngortuni sulissutigisimagaa oqaluttuaraa.

- Suliniut ukiorpaaluit matuma siorna aallartippaat, ukiut qulit sinnerpaat, pisortaq oqarpoq. 

Suliffeqarfiit arlallit imermik tunisassiorniarlutik pilersaaruteqartarput. Una qanoq piviusorsiortigiva? 

- Piviusorsiortorujuuvoq. Piviusunngussooq, taanna naatsorsuutigilluinnarpara, Anda Uldum naggasiivoq.