Imerniartarfiutilik akissutissarserusuppoq: Imigassamik matusineq kikkut akilissavaat?

Kommune Kujallermi imigassamik sassaallernermit pingaarnertut inuussutissarsiuteqartunut piffissaq ilungersunarsigaluttuinnarpoq.

Jim Riisip Qaqortumi imerniartarfiit marluk, Hinnarissuasik Rockhouselu, piginnittuuffigai. Kommune Kujalleq imigassamik matusinermi kingorna sullarlunnerarlugu kommunimut isornartorsiuilluni allagaqaqqammerpoq.

Taassuma oqarnera naapertorlugu imigassanik sassaallerfiusinnaasunik inuussutissarsiuteqartut sapaatit-akunnerini pingasuni isertitaqanngillat. Taamaattumik ammaasseqqinnissamut pilersaarummik ujartuivoq, suliffeqarfiillu eqqorneqartut qanoq taarsiiviginiarneqarnersut paaserusuppaa.

- Suliffeqarfinnut pineqartunut ilungersunartorujussuanngoqqavoq, Jim Riis allappoq. 

Imigassamik tuniniaasinnaanerup sassaallersinnaanerullu qanoq sivisutigisumik matoqqagallartinneqarnissaa kommunip pilersaaruteqarfiginngikkaa taassuma aamma allaatigaa. Kommunimilu suliffeqarfiutillit ajunnginnerpaamik siunertaqarlutik aallartitsinikuusut qanoq iliornikkut ikiorsiissuteqarfiginiarneqarnersut ujartugaanut ilaavoq.

Kommunip ikiorsiissuteqarasuarnissaa siunnersuutigaa

Kommuni ikiorsiissuteqarnissaq anguniarlugu aningaasanik qinnuteqarfiusinnaasumik pilersitsisariaqartoq Jim Riisip siunnersuutigaa. Suliffeqarfiit eqqorneqartut tassunga qinnuteqarsinnaanissaat siunertaralugu. Kommuni taamaaliornermigut suliffeqarfiit matuinnannginnissaannut, imaluunniit taarsiissuteqarnissaq anguniarlugu sivisuumik suliaqartoqarnissaanut pinngitsoortitsisinnaavoq. 

Kommunip imigassamik tuniniaanerup siusissukkut ammarnissaanit kommuni suliffeqarfinnut akileerusunnerusoq borgmesteri Malene Vahl Rasmussen oqarsimammat, taanna eqqaamaqquaa.

- Taanna eqqaamavarput, Jim Riis allappoq.

Kommunilu inuussutissarsiortunut tamanut naapertuilluartuliornissamut akisussaaffeqarnerarpaa.

- Inuttut suliffeqarfiuterpullu pillugu massakkut nalornisorujussuuvugut. Tamanna attanneqarsinnaanngilaq, taanna allappoq.

Borgmesteri: Naalakkersuisut akuutinneqassapput 

Jim Riisip ernumanera Kommune Kujallermi borgmesterip Malene Vahl Rasmussenip paasisinnaavaa. 

- Soorunami ernumanera paasisinnaavara. Aamma iliuuseqarusunnera paasinarpoq. Paasissutissanik noqqaanera aamma paasinartorujussuuvoq.

Kommunilli suliassaq kisimiilluni kivissinnaanngikkaa erseqqissaatigaa

- Aaqqiissutissaq Naalakkersuisullu eqqartortussaavarput. Massakkut kommuniminngaanniit akisinnaanngilarput, akisussaaffik taanna ilaatigut naalakkersuisoqarfimmik kalluaasussaammat. Oqallisigisussaavarput piffissami tulliuttumi. Massakkut ukkatarinerpaavarput piffissaq una suut nalunaarsorneqassappat, suut suliniutit aallartinneqassappat, qanorlu ammaassiartuaarnissamut ilusilimmik aalajangiinissamut siunnersuummik qanoq isikkoqassanersoq sulissutigineqarpoq, Malene Vahl Rasmussen oqarpoq.

Naalakkersuisut suliamut tunngatillugu Sermitsiamit oqaaseqartinniarsaraagut. Aamma qanoq suliniuteqarnersut paasiniarparput.