Ittoqqortoormiini umiarsualiviup allilerneqarnissaanik Rambøll pisariaqartinneqartunik misissuissaaq

Ittoqqortoormiini umiarsualiviup allilerneqarsinnaaneranik suliaqarnerminni Naalakkersuisunit alloriarneq tulliuttoq iliuuseqarfigineqarpoq. Siunnersuinermik ingerlatsivik Rambøll Tunumi siunissami umiarsualivinnik, attaveqaasersuinermut, aningaasaliinissamullu pisariaqartitanik misissueqqissaarnermik suliaqartussatut isumaqatigiissuteqarfigineqarpoq.

Attaveqaasersuutinut, Ineqarnermut, Isorliunerusunut Upalungaarsimanermullu Naalakkersuisup Iddimanngiiu Jensen Biancop (IA) isumaqatigiissutip atsiorneqarnera pingaarutilittut isigaa.

- Ittoqqortoormiini innuttaasut piffissami sivitsortumi umiarsualivimmi pissutsit pitsaanerulernissaannik piumasaqarsimapput. Rambøll-imut isumaqatigiissuteqarnitsigut kissaatiniit takorluukkaniillu aalajangersimasumik pilersaarusiornissamut pingaarutilimmik alloriarpugut. Pisariaqartitanik misissueqqissaartoqarneratigut paasissutissanik tunngaveqarluta eqqortunik aalajangiinissarput, taamaalillunilu umiarsualivik pillugu aaqqiissutissat illoqarfimmi nunallu immikkoortuani pisariaqartitaviusunut naleqqussarneqarnissaat qulakkeertussanngorparput, oqarpoq.

Misissueqqissaarnermi periarfissat qulaajarneqassapput

Pisariaqartitanik misissueqqissaarnermi ilaatigut umiarsualiviup siunissami suliassai, piginnaasatut pisariaqartitassai aamma aaqqiissutissatut periarfissat misissorneqassapput. Suliami paasissutissat pioreersut katersorneqassapput, soqutigisaqartut attuumassutillit oqaloqatigineqassapput, kiisalu umiarsualiviup ineriartorfigisinnaasai assigiinngitsut naliliiffigineqassapput.

Misissueqqissaarnermi pilersuinermi isumannaallisaaneq, inuussutissarsiutinik ineriartortitsinermut, aalisarnermut, upalungaarsimanermut, ilaasunik angallassinermut tikikkuminassutsimullu tunngassuteqartut ingerlanneqassapput, Naalakkersuisut tusagassiuutinut nalunaarummi allapput.

Suliamut tamatumunnga atatillugu susassaqartut pingaarutillit arlallit, ilaatigut innuttaasut, aalisartut, Kommuneqarfik Sermersooq, Royal Arctic Line, Royal Greenland, Air Greenland, KNI aamma Illersornissaqarfik Rambøllimit peqataatinneqassapput.

Siunissami aningaasaliinissamut tunngavissaq

Misissueqqissaarnerup umiarsualivissaq inuiaqatigiit ineriartornerannut qanoq pitsaanerpaamik sunniuteqarsinnaanersoq, ersersinneqarnissaa Iddimanngiiu Jensen Bianco isumaqarpoq.

- Ittoqqortoormiini innuttaasut Kalaallit Nunaanni avinngarusimanerpaat ilaanni najugaqarput, aammalu assartuussinermi pilersuinermilu periarfissat pitsaasut nunassittarnermut, inuussutissarsiutinik ineriartortitsinermut inuunerullu pitsaasuunissaanut aalajangiisuussarput. Taamaattumik pisariaqartitanik qulaajaanitsinni peqqissaartumik tunngavissalimmillu sulinissarput, taamaalillutalu siunissami aningaasaliisarnissamut tunngavissanik pitsaanerpaanik pilersitsinissarput pingaaruteqarpoq.

Misissueqqissaarnermi tamakkiisumik nalunaarusiaq 2026-mi aasakkut, piffissaq eqqorlugu naammassineqarnissaa Rambøllimit naatsorsuutigineqarpoq. Tamakkiisumillu nalunaarusiaq, Inatsisartut ukiakkut ataatsimiinnissaat sioqqullugu Naalakkersuisumit saqqummiunneqarsinnaanissaa siunertaralugu. Nalunaarusiaq ilaatigut pisariaqartitsinermik, imaqqortussusermik aamma atorneqarsinnaassutsimillu misissueqqissaarnermik kiisalu siunissami umiarsualivimmut aaqqiissutissanut tunngaviusunik assigiinngitsunik naliliinermik imaqassaaq.

- Isumaqatigiissusiorneq maanna Ittoqqortoormiini umiarsualivimmik ineriartortitsinissaq pillugu suliap siumut aallariarneranik isumaqarpoq. Naalakkersuisuni misissueqqissaarnerup inernerinik tigusaqarnissatsinnut, aammalu sumiiffimmi attaveqaasersuutit ineriartornissamullu periarfissat qanoq iliorluta pitsaanerpaamik nukittorsarnissaat pillugu oqaloqatigiinnerup ingerlaqqinnissaanut qilanaarpugut, Naalakkersuisoq Iddimanngiiu Jensen Bianco naggasiivoq.