Kalaalimineerniarfinni qerisunik tuniniaaneq atorluarneqartoq

Aalisartut piniartullu pisatik assigiinngitsut qeritittarpaat, ukiullu ingerlerani kalaalimineerniarfinni tuniniartarlugit. Pineqartoq Inuussutissat pillugit Inatsisartut inatsisaata (Inuussutissalerinermut inatsit) 2019-imeersup aammalu Suliffiit inuussutissaleriffiusut pillugit Namminersorlutik Oqartussat nalunaarutaata (Inuussutissalerinermut nalunaarut) 1998-imeersup ataaniippoq.

Inuussutissalerinermut inatsit naapertorlugu, inuussutissanik suliaqarneq – uani qerititsineq ilanngullugu – assartuineq, niueruteqarnissarlu siunertaralu tunisassiorneq, pisortanit akuersissuteqaqqaartinnani aallartinneqarsinnaanngilaq. Kisiannili Inuussutissalerinermut nalunaarut naapertorlugu, nioqqutit qerineqanngitsut kalaalimineerniarfinni tuniniarneqarsinnaapput.

Taamaakkaluartoq kalaalimernit tarajortikkat, panertut, kiisalu qerisut, pisortaniit akuersissummik peqqaanngikkaluarluni kalaalimineerniarfinni tuniniarneqarsinnaanissaat ukiuni arlalinngortuni aamma akuerisaavoq.

Aalisarnermut Piniarnermut Nunalerinermut Imminullu Pilersornermut Naalakkersuisoq, Peter Borg, Demokraatit, Inatsisartunut ilaasortap Jens Napãtôp, Naleraq, pineqartoq paragraf 37 naapertorlugu apeqqutaanut akissuteqarluni ilaatigut taama allappoq.

Piumasaqaatit qasunganerusut

Suliffeqarfiit inuussutissanik tuniniarneqartussanik suliaqarneranni eqqiluisaarnissaq inatsisitigut piumasaqaataavoq. Tamanna atuisartut inuussutissanik pisiaminnik napparsimalersinnaanissaanniit illersorniarlugit taamatut militassaqartoq, Jens Napãtômut akissummi ilaatigut erserpoq.

Taamaattumik suliffeqarfiit kalaalimineerniarfinni tuniniagassaminnik kalaalimineerniarfimmi suliaqarsinnaanngillat. Akerlianilli piniartoq aalisartorluunniit kalaalimineerniarfimmi tuniniaasinnaalluni, tassunga piumasaqaatit qasunganerummata.

Kalaalimineerniarfimmi tuniniaasup pisisullu akornanni tatigeqatigiinneq tunngaviuvoq, pisisartullu pisiaa ajorpat, tassunga pisortat akisussaasunngortinneqarsinnaanngillat. 

Nutarterneqartoq

Kalaallit Nunaanni inuussutissalerinermut inatsit maannakkorpiaq nutarterneqaleruttortoq, tassungalu atatillugu kalaalimineerniarfinni inerteqqutaanngitsumik qerititsisinnaaneq maleruagassanut ilanngunniarneqartoq, Aalisarnermut Piniarniarmut Nunalerinermut Imminullu Pilersornermut Naalakkersuisoq, paasissutissiivoq.

Taamaakkaluartoq piniarnissamut aallaaniarnissamullu piffissaliussanut atugassaritinneqartut suli atuuttut erseqqissaatigineqarpoq.

Piniarnissamut killiliussat malinneqassasut

Piniarneq aallaaniarnerlu pillugit Inatsisartut inatsisaat 2023-meersoq naapertorlugu, kalaalimernit qerisut, piniarnissamut piffissaliussap nalaanni taamaallaat tuniniarneqarsinnaapput. Kisiannili tuttut umimmaallu eqqarsaatigalugit, piniagaajunnaarnerisa kingorna, annerpaamik ullut pingasut iluanni tuninarneqarsinnaasut, Peter Borg nassiuaavoq. 

Pingaaruteqarluinnartoq

Piniakkat assigiinngitsut ukiup ingerlanerani pisarineqarsimasut, puussiaaqqanut plastikkinut poortorlugit qeritinneqarsimasut, kingusinnerusukkut kalaalimineerniarfinni tuniniarneqartarnerat atugaalluartartoq, Sinerissap Qanittuani Aalisartut Piniartullu Kattuffianni siulittaasoq, Anthon Lindenhann oqarpoq.

- Silap unerisimannginnera pissutaalluni piniariarsinnaannginnermi, kalaaliminernik qerisunik tuniniaaneq amerlanertigut pisarpoq, tamannalu aalisartut piniartullu aningaasaqarnerannut pingaaruteqarluinnarpoq.

- Kalaallit kalaaliminernik peqqissaarullugu pilisarput, taamaattumik tuniniarneqartartut amerlanerpaatigut pitsaalluinnartuusarput, taanna oqarpoq.

Piniakkat killilersukkat, soorlu tuttut, umimmaallu allallu, piniagaaffiisa avataatigut inatsisit atuuttut naapertorlugit tuniniaaqqusaannginneq tulluartuunngitsoq, tamannalu aaqqiiviginiarlugu iliuuseqartoqartariaqartoq, Anthon Lindenhann isumaqarpoq.

Kalaalimineerniarfinni tuniniaanerup saniatigut Facebookkikkut tuniniaaneq atugaasorujussuuvoq.