Ilaqutariit takornariartitsisarfiutaata Experience Qasigiannguit Folketingimi Kalaallit Nunaat pillugu ataatsimiititaliami ilaasortat Avannaata Qimussersuata marsip naanerani ingerlanneqarnissaanut misigisassarsiorluni angalanissaannut qaaqquai.
Qaaqqusissut, ataatsimiititaliap januaarip 14-iani ataatsimiinnerani ilaatigut oqaluuserineqartoq, Danmarkimi Folketingimut ilaasortanit arlalinnit
Kalaallit Nunaata Danmarkillu attaveqatigiinnerisa
nukittorsarneqarnissaannik kissaatiginnittunit ilassilluarneqarpoq.
Ilaqutariit takornariartitsisarfiutaata Experience Qasigiannguit Folketingimi Kalaallit Nunaat pillugu ataatsimiititaliami ilaasortat Avannaata Qimussersuata marsip naanerani ingerlanneqarnissaanut misigisassarsiorluni angalanissaannut qaaqquai.
Qaaqqusissut, ataatsimiititaliap januaarip 14-iani ataatsimiinnerani ilaatigut oqaluuserineqartoq, Danmarkimi Folketingimut ilaasortanit arlalinnit
Kalaallit Nunaata Danmarkillu attaveqatigiinnerisa
nukittorsarneqarnissaannik kissaatiginnittunit ilassilluarneqarpoq.
Qaaqqusissut nuannaarutigineqartoq
Venstremeersup Louise Elholmip, Folketingimi Kalaallit Nunaat pillugu ataatsimiititaliami ilaasortaasup, Experiance Qasigiannguit qaaqqusinerat nuannaarutigingaarlugu oqaatigaa.
- Kalaallit Nunaanni najuunnissarput kissaatigineqarpat Kalaallit Nunaannut Ataatsimiititaliaq angalasariaqartoq isumaqarpunga. Kalaallit Nunaannut tikeraarnissaq ajunngitsumik isumaqarfigaara, Kalaallillu Nunaannut Ataatsimiititaliaq sapinngisamik arlaleriarluni Kalaallit Nunaannukartariaqartartoq isumaqarpunga, tassami qanimut attaveqatigiinnissaq kissaatigineqarpoq.
- Ullorsiutikka naapertorlugit pisinnaaguma qulequttat Kalaallit Nunaannut attuumassuteqartut sapinngisara tamaat peqataaffiginiartarpakka, taanna oqarpoq.
Kalaallit Nunaat pillugu ataatsimiititaliaq Kalaallit Nunaannut tikeraassasoq nammineq siunnersuutigaa, danskillu politikeriisa kalaallit innuttaasuinik naapitsinissaat kulturikkullu sammisassanut assigiinngitsunut peqataasarnissaat pingaaruteqartoq isumaqarpoq.
Isumassarsiamut tapersiisoq
Anders Kronborgip, Socialdemokratineersup aamma Folketingimi Kalaallit Nunaat pillugu ataatsimiititaliami ilaasortaasup, martsip naanerani Qasigiannguanut angalanissaq tapersersorpaa.
- Kalaallit Nunaannut tikeraarnissannut ammajuaannarpunga, aamma danskit inatsisartuini ilaasortat Kalaallit Nunaanni takussaasarnissat pingaaruteqartoq isumaqarpunga. Folketingimi Meeqqanut Ilinniartitaanermullu Ataatsimiititaliami qinigaaffimmi kingullermi siulittaasuugama Naalagaaffeqatigiinnitsinni ataqatigiinnerup ilisarisimaqatigiinnerullu nukittorsarneqarnissaa siunertaralugu Kalaallit Nunaannut Savalimmiunullu tikeraarpugut.
- Kommunimut qinersisoqartinnagu Pituffimmi Space Basemiippunga, Kalaallit Nunaannilu paasisassarsiorlunga angalanikuuvunga, taamaammat Kalaallit Nunaannut attaveqarnerput nakkutigilluarlugulu maajimi inuussutissarsiortut ataatsimeersuarneranni peqataanissannut pilersaaruteqarpunga, taanna oqarpoq.
Donald Trumpip Kalaallit Nunaannut soqutiginninnera, maannakkut Kalaallit Nunaata, Danmarkip USA-llu akornanni pissutsinut ajornartorsiortitsilersimasoq, Kalaallit Nunaannut ataatsimiititaliap Avannaata Qimussersuanut atatillugu Kalaallit Nunaannukarnissaanik siunertaanut allannguuteqartariaqanngitsoq Anders Kronborgip erseqqissarpaa.
- Danskit inatsisartuisa Kalaallit Nunaanni angalangaatsiarsimasut ilagaannga. 2019-imiit 2022-mut Meeqqanut Ilinniartitaanermullu Ataatsimiititaliami siulittaasuunerma nalaani Nuummut Kujataanullu angalavugut, tassani atuarfinnut paaqqinnittarfinnullu pulaartarlutalu politikerit naapittarlugit Naalagaaffeqatigiinneq pillugu immikkut ittumik suliniuteqarpugut.
- Donald Trump Kalaallit Nunaannut soqutiginnikkaluarpat soqutiginninngikkaluarpalluunniit Kalaallit Nunaannik soqutiginninnera taannaajuarpoq. Naalagaaffeqatigiinnermut Kunngeqarfimmillu ataatsimut ilaagatta Kalaallit Nunaannut tikeraarnissarput soqutigisariaqaripput isumaqarpunga. Taamaammat Folketingimi piffissarujussuaq atorlugu kalaallit Folkitingimut ilaasortat attaveqarfigilluartarpakka.
Anders Kronborgip Experiance Qasigiannguit qaaqqusissutaa Kalaallit Nunaat pillugu ataatsimiititaliap januaarip 14-ani ataatsimiinnerani oqaluuserineqaruni akuerineqassasoq innersuutigissallugu erseqqissarpaa.
Attaveqaqatigiinnerup nukittorsarnera
Kalaallit Nunaata Danmarkillu ataqatigiinnerat ingammik maannakkut pissutsit atuuttut eqqarsaatigalugit nukittorsarneqartariaqartoq Mads Fuglede, Danmarksdemokratineersoq aamma Folketingimi Kalaallit Nunaat pillugu ataatsimiititaliami ilaasortaq, isumaqarpoq.
- Immitsinnut tusarnaarnerusariaqarlutalu nukigut atorlugit ataqatigiinnermik ineriartortitsinissaq pisariaqartikkatsigu taamaammat nuna tamakkerlugu qimussimik sukkaniuttoqarneranut atatillugu Kalaallit Nunaat pillugu ataatsimiititaliap kulturikkut aaqqissuussanut assigiinngitsunut peqataanissamut qaaqquneqarnera isumalluarnarpoq, taanna oqarpoq.
Sooqutiginninneq nuannaalersitsisoq
Kristian Jeremiassenip, Qasigiannguani Experiencemik piginneqataasup, qaaqqusissutip Folketingimi Kalaallit Nunaat pillugu ataatsimiititaliami ilaasortanit ilassilluarneqarnera nuannersumik tupaallaatigaa.
- Avannaata Qimussersua, Kalaallit Nunaanni kulturikkut aaqqissuussinerit annerpaartaasa ilaat, inuiaassuseq apeqqutaatinnagu tamanut katersuuffiusinnaasoq Kalaallit Nunaat pillugu ataatsimiisitaliami ilaasortat takutikkusuppagut.
- Aammali nunami maannakkut silap pissusiata allanngoriartornera, ilaatigut takornariartitsinerup iluani aamma inuussutissarsiornikkut ineriartornissamut periarfissaqarluartoq danskit inatsisartuisa ilaasortaasa namminneq misigisariaqaraat isumaqarpunga.
- Taamaammat tikeraarnermut atatillugu Kalaallit Nunaat pillugu ataatsimiititaliami ilaasortat misigisassarsiorlutik angalanissaannut neqeroorfigissavagut, ilaatigut qimussimik angalanissamut, aqisserniarnernerit, arsarnernik isiginnaarnissamut kulturikkullu aaqqissuussanut assigiinngitsunut peqataanissamut periarfissaqartitsissaagut, Kristian Jeremiassen oqarpoq.
Kristian Jeremiassen, Kommune Qeqertalimmi kommunalbestyrelsimut ilaasortaq Inatsisartunullu siornatigut ilaasortaasimasoq, qaaqqusinermut atatillugu politikkikkut anguniagaqarnani erseqqissaavoq.
USA-p præsidentiata Donald Trumpip
Kalaallit Nunaannut immikkut sinniisussatut siorna decemberimi toqqagaa Jeff
Landry, martsip naanerani Avannaata Qimussersuata Qasigiannguani
ingerlanneqarnissaanut atatillugu, Kristian Jeremiassenip aggersarsimagaa
KNR-imiit ippassaq saqqummiunneqarpoq.
