Kangerlussuaq ukiup ataatsip qaangiunnerani: Cafeteria inoqanngitsoq takullugu alianarpoq

Nuummi mittarfissuaq nutaaq siorna novembarip 28-anni ammarneqarmalli – taamaalillunilu Nunatsinnut aamma Nunatsinnit timmisartuussisarnerit amerlanersaat Kangerlussuarmit Nuummut nuunneqarmata – Kangerlussuarmi innuttaasut 30 procentingajammik ikileriarsimapput.

- Tamanna alianaqaaq, Qeqqata Kommuniani borgmesteri Malik Berthelsen oqarpoq.

Nunaqarfimmut mittarfeqarfiusumut Air Greenlandip mittarfeqarfeqarfimmik ingerlataminik matusinerata kingorna, aamma Københavnimut Københavnimiillu timmisartuussisarnerit amerlanerit unitsinneqareersut, Kangerlussuarmut tikeraaqqaarnini, borgmesterip suli eqqaamalluarpaa. Misigisaq alianartuuvoq, Sermitsiamut oqaluttuarpoq.

Kaffisorniartarfik inoqanngitsoq aamma Kangerlussuarmi sulisut aalajaatsut ilarpassui sinerissami ungasissumut nuutsinneqarsimasut paasillugu alianarpoq.

Kangerlussuaq pingaaruteqannginnerusutut nalilerneqartoq

Nuummi mittarfittaap atorneqalernerata kingorna Nunatsinnut Nunatsinniillu angallannermi pissutsit pitsaanerulersimanngitsut, borgmesteri aamma isumaqarpoq.

- Nuummi mittarfittaaq isumalluarfigineqarpallaartoq, Kangerlussuullu pingaaruteqarnera suusupagineqartoq isumaqarpunga, Malik Berthelsen oqarpoq.

Mittarfissuartaaq ammarneqarmat kikkut tamarmik oqaatigaat, Nunarput nunarsuup sinneranut maanna qaninnerulersoq. Akerlerluinnaanilli pisoqarpoq.

- Nuup mittarfissuata atulernerata kingorna, Nunarput nunarsuup sinneranut qaninnerulernani ungasinnerulersimasoq isumaqarpunga. Tassami billetit akii maanna atuuttut atorlugit ilaqutariit kalaallit ikittuinnaat ilaquttaminnut tikeraarnissaminnut akissaqarput, tassa ilaquttat nunani allaniippata maaniippataluunniit.

Malik Berthelsen imminut assersuutigivoq.

- Aatsaat novembarimi feeriarluta angalavugut, aasaanerani angalassagutta inuit pingasuinnaat Danmarkiliarnissaannut 30.000 koruunit akiliutigiumannginnakkit. Taamaattumik isumaqarpunga Nunarput maanna nunatut matoqqasutut isigisariaqaripput, piviusumimi kalaallit ullutsinni najugaqarfigisaminnit aallarlutik angalanissaminnut akissaqanngimmata.

- Tamanna inuiaqatigiinnut Nunatsinniittunut tamanut alianartuuvoq. Billetit akisoorujussuit atorlugit niuertut angalasut inuillu nunanit allaneersut pingaartinneqarnerupput salliutinneqarlutillu. Taamatut iliornermi kalaallit ilaqutariit nalinginnaasut ajorsartuupput. Angalaneq nuannersuusaraluarpoq kikkunnullu tamanut periarfissaasariaqarluni. Naatsorsuutigigaluarakku Air Greenland pilersinneqarsimassasoq inuiaqatigiit kalaallit angalasinnaanissaat siunertaralugu.

Ajornartorsiulernissaq siooragineqartoq

Kangerlussuup inuerukkiartornera Qeqqata Kommuniata aningaasaqarneranut maannamut sunniuteqarsimanngilaq. 2025-mi kommunip isertitai amerlisimapput. Ajornartorsiortoqalernissaali Malik Berthelsenip ernumanartoqartippaa.

- Sulisorpassuit sinerissamut nutserarnissaat soorunami maluginngitsoorsinnaanavianngilarput. Tamannali aatsaat 2026-mi misigissavarput tamatumalu kingorna annertunerussalluni. Ullutsinni isertitatta qaffakkiartornerannut pissutaavoq sulisinnaasut amerlanerpaartaat sulimmata, qujanartumillu Maniitsumi Sisimiunilu sanaartorit annertuut ingerlanneqarlutik. Ukioq mannami suliffissaaleqisut agguaqatigiissillugu taamaallaat 2,35 procentiupput. Kisianni Sisimiuni 2026-mi sanaartornermik suliaqartut ikinnerulernissaat ernumassutigaara, sanaartornerit angisuut arlallit ataatsikkut naammassineqartussaammata.

Isumalluarpallaarnaveersaarneq

Kangerlussuarmi takornariaqarnerup ineriartortinnissaanut periarfissarpassuaqartoq, Malik Berthelsen isumaqarpoq. Taamaattorli isumalluarnartumik isiginissaa nangaassutigaa.

- Misigisassarsiortitsilluni takornariartitsinermut tunngatillugu Kangerlussuaq Sisimiullu siuttuusut isumaqartuaannarsimavunga, Malik Berthelsen oqarpoq.

- Taamaattorli Albatros aamma Air Greenland ukiut ataasiakkaaginnarlugit isumaqatigiissuteqartarmata, siunissamut isumalluartumik isiginninnissannut ajoraluartumik nangaavunga. Neriuutigaarali Ilulissani mittarfittaamut atatillugu Kangerlussuaq Ilulissallu ataqatigiissinneqarumaartut, takornariat taamaalillutik sumiiffinnut assigiinngitsunut arlalinnut angalasinnaalissammata. Tassami Avannaani Qeqqanilu misigisassat ataatsimoortinneqarnerisigut, takornariat puigunngisaannagassaminnik nuannersunik misigisaqarsinnaassammata.

Illersornissamik suliaqartut Kangerlussuarmi suliffissanik pilersitsisinnaanerannik isumalluarnissani borgmesterip aamma mianersuutigaa.

- Kangerlussuarmi mittarfik illersornissamik isumaginnittut ingerlatiinnarniarmassuk aamma Issittumi Tunngaviusumik Ilinniarfimmik aallartitsinerat nuannaarutigisimavakka. Illersornissamut isumaqatigiissut atsiorneqaqqammersoq eqqarsaatigalugu soorunami neriuutigaarput Troels Lund Poulsenip tusagassiuutitigut neriorsuutaatut ataavartunik suliffissaqartitsisoqalissasoq. Ajoraluartumilli Naalakkersuisut isumaqatigiissut pillugu suli paasissutissinngilaatigut, Malik Berthelsen oqarpoq.