Kalaallit inuussutissarsiortut marluk
suliniuteqarluartut Ilulissat qeqqani quleriinnik qulinik initalimmik akunnittarfiliornissaminnik
takorluukkaminnik piviusunngortitsisinnaajunnaarput.
Akunnittarfittaassarsuaq 35 meterinik
portussuseqartussaagaluartoq, taamaalillunilu Nunatsinni maannamut
akunnittarfinni portunerpaasussaagaluartoq Kangianut
isikkivigissorsuarmiittussaagaluarpoq.
Kalaallit inuussutissarsiortut marluk
suliniuteqarluartut Ilulissat qeqqani quleriinnik qulinik initalimmik akunnittarfiliornissaminnik
takorluukkaminnik piviusunngortitsisinnaajunnaarput.
Akunnittarfittaassarsuaq 35 meterinik
portussuseqartussaagaluartoq, taamaalillunilu Nunatsinni maannamut
akunnittarfinni portunerpaasussaagaluartoq Kangianut
isikkivigissorsuarmiittussaagaluarpoq.
Avannaata Kommuniani kommunalbestyrelsip ukioq
naalersoq ataatsimiinnermini, nukariit Frank aamma Tommy Baggerip
suliniutigisaanut annertuumut nunaminertaq sanaartorfissamittut
qinnutigisaat akuersissutiginngilaa.
Frank Bagger itigartitsinermut pakatsisimasoq
ima oqarpoq:
- Tamanna
uggornarpoq, Ilulissanimi akunnittarfinni inissat amerlanerusut
pisariaqartinneqarmata, Sermitsiamut oqarpoq.
Akunnittarfik ulluinnarni atugassanik pisiniarfiit
Brugsenip aamma Pisiffiup akornanniittussaagaluarpoq, Kussangajaannguami
Baggerikkut ingerlateriigaata orsersortarfiup Tankeeqqap inissisimaffigisaani.
Kommunalbestyrelsi: Allamik
aaqqiissutissarsioritsi
Akunnittarfiliornissamut qinnuteqaat
kommunalbestyrelsip ataasinngornermi decembarip 29-anni ataatsimiinnermini
oqaluuserisimavaa. Qinnuteqartut tassaallutik Tankeeraq Ejendomme, Frank aamma
Tommy Baggerimit pigineqartoq.
Tamatuma kingunerisaanik 2025-mi novembarip
21-anni ataatsimiinnermi aalajangiunneqartoq attatiinnarneqarpoq. Sumiiffimmi
1200-C17-imi pissutsit maanna atuuttut attatiinnarneqarusupput, taamaattumillu
kommunip pilersaarutaani sinaakkusiussat allanngortinnagit.
- Sanaartornerit
nutaat taama annertutigisut Ilulissat illoqarfiata qeqqata avataani pissasut kommunalbestyrelsip
aalajangerpaa, taamaattumillu allamik aaqqiissutissarsiortoqartariaqarluni.
Avannaata Kommuniani illoqarfimmik
pilersaarusiortoq, illussanik titartaasartoq Martin Viggo Meincke, Sermitsiamut
mailikkut taama allappoq.
Quleriinnik 12-inik initalimmik
pilersaaruteqaqqaaraluartut
Frank aamma Tommy Baggerip Ilulissat qeqqani
akunnittarfiliornissaminnut akuersissummik tunineqarnissaminnik 2025-mi
upernaakkut qinnuteqaateqarput.
Pilersaarutertilli annikillisillugu
quleriinnik qulinik initaqartussanngorlugu qinnuteqaatigaat. Akunnittarfiup
2028-mi piareerneqarnissaa siunniunneqarpoq.
Sanaartornissamik qinnuteqaat ”High North
Ilulissat”-mik taaguuteqartoq sanaartortitsiniartumit Tankeeraq Ejendomme
ApS-imit, nukariinnit pigineqartumit
Avannaata Kommunianut nassiunneqarpoq.
Sanaartugassanik titartaasartoq Qarsoq
akunnittarfiliorniarnermi siunnersortitut ikiortigineqarpoq.
Frank aamma Tommy Bagger aningaasaliinermut ingerlatseqatigiiffimmik
Ilu Investimik piginneqatigiipput tamatumanilu suleqatigineqarluni inuussutissarsiutinik
ingerlatalik tusaamasaq Jens Kristian Friis-Salling. Aningaasaliisartutut ingerlatseqatigiiffik
Ilulissani Best Western Hotelimik piginnittuuvoq. Jens Friis-Salling, ukiuni
50-ingajanni inuussutissarsiornermik ingerlataqarsimasoq, Nunatsinni
suliffeqarfiit namminersortut annersaanni Polar Seafoodimi piginneqataasut
annerit ilagaat.
Akunnittarfimmut aqqaneq-marlunnik quleriinnik
initalimmik sanaartornissamut qinnuteqaat, sanaartugassanik titartaasarfimmit
Qarsumit Tankeraq Ejendomme sinnerlugu kommunimut nassiunneqartumi
oqaatigineqarpoq, sanaartortitsisup taamaalillunilu nukariit Baggerikkut inuiaqatigiinnut
iluaqutaasumik allamik akunnittarfimmik sananissaq kissaatigigaat.
Suliffiit ataavartut
Sulisut nunaqavissut amerlanerusut
atorfinitsinneqarsinnaaqqullugit, suliffinnik inuiaqatigiinnut iluaqutaasunik
pilersitsinissaq pisussaaffimmittut isigaat.
- Akunnittarfissap
nutaap nukissiuutinik atuinermi pitsaanerpaamik atuinissaa anguniarneqarpoq,
soorlu oqorutit pitsaanerpaamik atorneqarnissaat neriniartarfimmilu
nunaqavissut nerisassaataannik piujuartitsisumik nerisassiortoqartarnissaa
anguniagaallutik. Akunnittarfimmik piginnittut aamma ulluinnarni
akunnittarfimmik ingerlatsisussat tamanna anguniagarissavaat, suliniummut
qinnuteqaammi ilaatigut taama allassimavoq.
Frank Baggerip Ilulissani nunat tamalaat
akornanni mittarfissap nutaap, Greenland Airportsimit oqaatigineqartut naapertorlugit,
ukioq manna oktobarimi ammarneqartussap, ilaasunik angallassisartut saniatigut
timmisartut attartortittakkat Ilulissanut aamma missinnaanissaat tunngavissaqalissaaq.
Imaassinnaavoq akunnittarfik nutaaq
sanagutsigu, umiarsuarnik takornariartaatinik ingerlatseqatigiiffiit aamma
inissanik pisariaqartitsilissasut, tassa ingerlatseqatigiiffiit siunissami aalajangerpata ilaasuminnik inuttaminnillu Ilulissani paarlaasseqatigiissitsisarniarlutik,
taanna juunimi 2025-mi Sermitsiamut taama oqarpoq.
Nukariit oqaatigineqareersutut Jens
Friis-Salling peqatigalugu aningaasaliinermik ingerlatseqatigiiffimmik Ilu
Investimik, Ilulissat Best Western Plusimik, ulluinnarni Hotel Ilulissanik
piginnittumik, piginneqataapput. Akunnittarfik 78-inik initaqarpoq. Maajimi
2021-mi ammarneqarpoq. Akunnittarfik Ilulissani Kangianut aamma Oqaluffiup
Ataanut kusanartumik isikkiveqarluni.
