Kuannersuarni suliami aalajangiineq: Inatsisartut Namminersorlutillu Oqartussat pinngitsuutinneqarlutik naalakkersuisoqarfiit suliami suli unnerluutigineqarput

Nunatta Eqqartuussisuuneqarfiata tusagassiutitigut nalunaarummini ilisimatitsivoq, Greenland Minerals A/S-ip Kuannersuarni aatsitassarsiornissamut akuersissummik itigartitaanera pillugu oqartussat arlallit 2024-mi eqqartuussutigisaat kikkut illuatungeriissagaat eqqartuussiviup aalajangersimagaa.

Nunatta Eqqartuussisuuneqarfiata aalajangerpaa Inatsisartut Namminersorlutillu Oqartussat pinngitsuutinneqassasut “eqqortukkut unnerluutigineqartut” tassaammata suliami unnerluutigineqarsinnanngitsut, eqqartuussivik allappoq.

Eqqartuussivik nangilluni ilisimatitsivoq Nunatta Eqqartuussisuuneqarfiata aalajangiinerata kingorna, oqartussaasunut tallimanut allanut suliaq ingerlateqqinneqartoq:

Naalakkersuisut Inuussutissarsiornermut, Niuernermut, Aatsitassanut, Inatsisinik atortitsinermut Naligiissitaanermullu Naalakkersuisoqarfik

• Aatsitassanut Aqutsisoqarfik

• Naalakkersuisut Siulittaasuata Naalakkersuisoqarfia

• Naalakkersuisut Nunalerinermut, Imminut Pilersornermut, Nukissiuuteqarnermut Avatangiisinullu Naalakkersuisoqarfik

• Aatsitassanut Avatangiisinut Aqutsisoqarfik

Nunatta eqqartuussisuuneqarfia naapertorlugu illuatungeriit maanna suliamut tunngasunik allagassanik allattuissapput, tamatumalu kingorna sivisunerusumik isumaqatiginniartoqassaaq.

Nunatta Eqqartuussisuuneqarfia eqqartuunneqartussat isumaqatigiinniarfigereerlugit 2026-mi ukiakkut aalajangissavaa qaqugu eqqartuussineq pigaarneq ingerlanneqassasoq.

Greenland Minerals A/S sapaatit-akunneri sisamat ingerlaneranni Inatsisartunut, Namminersorlutillu Oqartussanut suliami aningaasartuutit 150.000 koruunit akilissagai, aalajangiinerup allassimaffiani atuarneqarsinnaavoq.