Kalaallit Nunaanni inuussutissarsiutinik
siuarsaanermik suliaqartoq aallarnisaasunullu siunnersuisarfik Nalik Ventures
A/S, Kullorsuarmi aallarnisaaneq pillugu februaari aallartilaartoq pikkorissaavoq.
Tamanna Kalaallit Nunaanni nunaqarfiit annersaanni 400-ngajannik inoqartumi, takornariaqarnermik
inuussutissarsiuteqarnerup inerisaaffigineqarnissaanut matunik ammaassisuujumaartoq,
nunaqarfimmi aqutsisuni ilaasortaq neriuuteqarpoq.
Kalaallit Nunaanni inuussutissarsiutinik
siuarsaanermik suliaqartoq aallarnisaasunullu siunnersuisarfik Nalik Ventures
A/S, Kullorsuarmi aallarnisaaneq pillugu februaari aallartilaartoq pikkorissaavoq.
Tamanna Kalaallit Nunaanni nunaqarfiit annersaanni 400-ngajannik inoqartumi, takornariaqarnermik
inuussutissarsiuteqarnerup inerisaaffigineqarnissaanut matunik ammaassisuujumaartoq,
nunaqarfimmi aqutsisuni ilaasortaq neriuuteqarpoq.
Avataaniit saqqummiisoqartoq
Kullorsuarmi nunaqarfimmi aqutsisut aamma Avannaata
Kommuniata saaffiginnissutaat aallaavigalugu, Kullorsuarmi
inuussutissarsiutinik aallarnisaaneq pillugu pikkorissaaneq iluatsilluartoq, Nalik
Venturesimi siunnersorti Edvard Lyberth Mørch oqarpoq.
Aallarnisaanermi
piumasaqaatit, qinnuteqarfissat takornarianillu misigisassarsiortitsinermi
periarfissat assigiinngitsut ilaatigut pikkorissaassutigineqarput.
Taassuma
saniatigut Ilulissani Itillimilu takornarialerisut namminersortut marluk
internetsikkut saqqummiipput. Umiarsuit takornariartaatit nunaqarfinnut
tikinnerini sullissineq akigitinneqartullu pillugit Itilliminngaannersoq
saqqummiivoq, takornarianillu qimussiussisarneq pillugu Ilulissani
takornarialerisoq saqqummiilluni.
Tapertaasinnaasoq
Umiarsuit takornariartaatit aasat tamaasa
Kullorsuarmut tikittarput, taakkulu amerliartortut Edvard Lyberth Mørch
oqarpoq. Taamaakkaluartoq Kullorsuarmi suli takornariartitsivinnik
aallartitsisoqarnikuunngilaq. Siunissamili tamanna allanngoratarsinnaavoq.
- Takornariaqarneq Kullorsuarmi
soqutigineqarluarpoq, tamannalu peqqutigalugu ulluni pingasuni pikkorissaanermi
peqataasut amerlapput.
- Kisianni nunatsinni nunaqarfiit
allat assigalugit, Kullorsuarmi takornarialerinermik inuussutissarsiuteqarneq
ukioq kaajallallugu tamakkiisumik ingerlanneqarsinnaanngilaq.
- Taamaakkaluartoq Kullorsuaq
avinngarusimasumiimmat, tamaanilu misigisassat sumiiffinni allani
misigineqarsinnaanngimmata, inuussutissarsiutinut pioreersunut, soorlu
aalisarnermut, takornariaqarneq unnuisarfiuteqarnerlu tapertartut ingerlanneqarsinnaavoq,
taanna oqarpoq,
Niuertarfimmik ammaanissamut
soqutiginnittoqartoq taassuma aamma oqaatigaa.
Nalinginnaasuunngitsoq
Kullorsuarmi nunaqarfimmi aqutsisut Nalik
Venturesimut aggersaanerat nalinginnaasuunngitsoq, aallarnisaasunut siunnersorti
oqarpoq.
- Kisianni Kullorsuarmi
pikkorissaanerup iluatsilluarnerata kingunerisaanik, tassunga assingusumik
nunaqarfinnut tulluarsakkamik suliniuteqarnissarput takorluukkatsinnut ilaavoq,
Edvard Lyberth Mørch oqarpoq.
Upernavimmi pikkorissaanissaq
iluatsinngitsooraluartoq namminersortut ingerlareersut naapinneqartut,
aallarnisaarusuttullu naapinneqarsimasut, taanna oqarpoq.
Soqutigineqarluartoq
Kullorsuarmi inuussutissarsiornikkut
periarfissat qulaajaaffigineqarnissaat ilaatigut siunertaralugu, siorna 2025-mi
nunaqarfimmut aqutsisunut ilaasortanngortut nutaat, Nalik Ventures
Kullorsuarmut aggersarneqassasoq aalajangiussimagaat, nunaqarfimmi aqutsisunut
ilaasortaq Timotheus Petersen, Siumut, oqarpoq.
- Umiarsuit takornariartaatit Kullorsuarmut
tikittartut ukiuni aggersuni amerliartuinnarnissaat naatsorsuutigaarput. Ukioq
manna Ilulissani mittarfissuaq atulertussaavoq, taannalu aamma maanga
arlaatigut iluaqutaanissaa qularutissaanngilaq.
- Taamaattumik nunaqarfimmi
aqutsisut tamarmiusut suliffeqarfinnik aallarnisaaneq pillugu
pikkorissaasoqarnissaa kissaatigisimavaat. Qujanartumillu saaffiginnissuterput
Nalik Venturesimiit tigulluarneqarsimavoq, taanna oqarpoq.
Pikkorissaaneq annertuumik soqutigineqarpoq
pissarsiaqarfiulluarlunilu nunaqarfimmi aqutsisut oqaatigaat.
Takornariaqarneq ineriartortinneqassasoq
Umiarsuit takornariartaatit Kullorsuarmut
tikittartut namminneerlutik angallassisartunik sulisoqartarput, tamannalu
ilaatigut peqqutaalluni nunaqarfimmi innuttaasunut aningaasat tuttartut
amerlanngitsut, Timotheus Petersen aamma aalisartuullunilu piniartuusoq
oqarpoq.
- Umiarsuit takornariartaatit
sullissinissamut isumaqatigiissuteqarfiginissaat pingaaruteqarpoq. Tamanna
anguneqassappat takornariartitsivimmik maani pigineqartumik pilersitsinissaq
pisariaqarpoq, piviusunngortinnissaalu siunertaralugu suliniutit aallartisarneqartut
ilisimavara, taanna oqarpoq.
Misigisassarsiortitsilluni
takornariartitsinerit assigiinngitsut inerisaaffigineqarnissaat
soqutigineqartoq pikkorissaanermi erserpoq.
- Assersuutigalugu takornariat
qilalukkanik takornariartittalernissaat uanga sinnattoraara. Tamannalu
anguneqassappat ilaasunik angallassisinnaanernut akuersissutit imaatigullu
isumannaallisaanikkut pikkorissarnerit tiguneqartariaqarput.
- Tamanna pisariullunilu
akisuvoq, kisianni pikkorissarnermi sakkussanik pitsaasunik tuniorarneqarpugut,
taakkulu atorluarneqarnissaat qularnanngilaq. Tamannalu siunissamut
isumallualersitsivoq, Timotheus Petersen oqarpoq.
Nunaqarfimmi pisiniarfeeqqamik
ammaasoqarnissaanut periarfissaq aamma soqutigineqartoq, nunaqarfimmi
aqutsisuni ilaasortaq ukiorpassuarnilu politikkimik suliaqarsimasoq oqarpoq.
