Mittarfik akuersissummik aammaarluni pissarsisoq

Angallannermut aqutsisoqarfiup Qaqortumi mittarfiup nunat tamalaat akornanni silaannakkut angallannermi aqutsineq akuerisimagaa, Greenland Airports Facebookimi allappoq.

Akuersissummik tunineqarneq Kalaallit Nunaata kujataani mittarfiup angallannermi nukittuumik eqiteruffinngortinnissaanik suliaqarnermi tamanna qitiusumik inissisimasoq, ingerlatseqatigiiffiup allappoq.

Greenland Airports-imiit oqaatigineqarpoq mittarfiup aqutsinera tassaasoq timmisartut qulimiguulillu sorliit sumi qaqugulu missinnaanerannut, nunamilu isumannaatsumik ingerlanneqarnissaat isumagisassarigaat.

Nunat tamalaat akornanni angallannermi pisarialik

Akuersissummik tunisineq juunip aallaqqaataani pisoq, tamannalu Qaqortup mittarfiata nunanit tamalaanit timmisartuussinissamut akuerineqarsinnaaneranut juunip sisamaani piumasaqaataasup akuersissutigineqarsinnaasoq, mittarfinnik ingerlatseqatigiiffik Sermitsiamut itisiliivoq

- Mittarfik nunap iluani/Air Greenlandip angallassineranut atorneqarsinnaasunngorlugu 16. april akuerineqarpoq. Akuersissutigineqartoq annertusineqarsimavoq sukumiinerulerlunilu, Greenland Airports Sermitsiamut allakkatigut ilisimatitsivoq.

Piumasaqaatit immikkut ittut

Greenland Airports naapertorlugu Kujataani qulimiguulinnik timmisartunillu ninnerusunik annerusunillu aqutsineq immikkut piumasaqaateqarpoq:

”Sunniuteqarluartumik pikkorissusilimmillu mittarfiup saqqaani aqutsinermi inissitsitigassat tamarmik inissitsiterneqartarput. Qaqortumi sulisut, matuma iluatsinnissaanut annertoorujussuarmik suliaqarsimasut aammalu – Trafikstyrelsen qanimut suleqatigalugu – akuersissutip pissarsiarinissaanut qulakkeerinneqataasimasutut, tullusimaarutigeqaakka”, Anna Villefrance, Greenland Airportsimi Qaqortumi immikkoortortami pisortaq oqarpoq.

Qaqortup mittarfia apriilip 16-ani ammarneqarpoq, Air Greenlandilli timmisartui kisimik mittarfimmik atuisinnaapput. Angallannermut aqutsisoqarfik nunat tamalaat akornanni timmisartuussinissamut juunip 4-anni akuersivoq, taamaalilluni Icelandair Qaqortup mittarfianut siullermeerluni missinnaalissaaq.