Mittarfik nutaaq HHE-mut pingaaruteqartorujussuusoq

Nuummi mittarfissuaq siorna novembarip 28-ani atoqqaarfissiortinneqarmat, nunarsuup sinneranut toqqaannat angalasoqarsinnaalerneratut, Hotel Hans Egedemiit eqqaamaveqarpoq.

- Taamanili issittumi illoqarfiit pingaarnersaanni takornariat amerliartupiloorput, tamannalu Kalaallit Nunaanni takornariartitsinermut inuussutissarsiornermullu pissutsinik allannguivoq, akunnittarfiutileqatigiiffik tusagassiuutitigut nalunaarummi inerniliivoq.

Nuummi mittarfittaap atulerneranit ukiumi siullermi takornariaqarneq ataatsimut isigalugu isumalluarnarpoq. Sulisitsisuni Akunnittarfiutilinnut, Neriniartarfiutilinnut Takornariaqarnermullu ataatsimiitsitaliami siulittaasoq Helge Tang Sermitsiamut ima oqarpoq: ”Mittarfik ukiumi siullermi – naak ilaatigut ajornartorsiuteqartaraluartoq – periarfissarpassuaqartoq takutippaa. Nuummi nunat tamalaat akornanni mittarfik, Nuummi takornariaqarnermik annertuumik siuarsaaqataavoq. Taamaattumik Kujataani mittarfissap qaqugu atulernissaa ullulerneqarmat aamma nuannerpoq. Aamma inuussutissarsiortut Ilulissani mittarfissuassaq qilanaaraat, taamaalilluni nunap ilarujussua takornariaqarnermi inuussutissarsiutinik ineriartortitsinikkut siuariartornermik iluaqutserneqassammat”. Taanna HHE-mi siulersuisuni aamma siulittaasuuvoq. Nuummi mittarfiup eqqaani nutaamik 120-nik ineeraqartumik akunnittarfiliornialersaarneq siuariartortoq Sermitsiamut oqaatigaa, mittarfiullu illuata akiani sanaartorfissaq pissarsiarineqareersimalluni.

Takornariat maanna pingaarnerpaapput

Hotel Hans Egede A/S-imut, tassa akunnittarfik Hotel Hans Egedemut, HHE Expressimut aamma Nuuk Hotel Apartmentsimut, mittarfittaarnerup kingorna ukiumi siullermi oqaluttuarisaanermut ilannguppoq. Sulinermut atatillugu illoqarfimmiittut pingaarnertut isaatitsiviunikuusimagaluartut, qaammatini aqqaneq-marlunni kingullerni takornariat unnuisut amerlisimasut, suliffeqarfissuarmit nalilerneqarpoq.

- Mittarfik ammarmat Nuummi pissutsit allanngorput. Aatsaat takornariaqarnermik ingerlatsineq aalajaatsoq, naatsorsoruminartoq niuernikkullu ingerlalluartoq piffissami takornariaqarfiusumi siullerpaamik atuuppoq, naak siornatigut takornarianik tikeraaqarpiarneq ajoraluarluta. Illoqarfimmi pissutsit nutaat atuutilerput, Hotel Hans Egede A/S-imi pisortap tullia Christian Loiborg Tang oqarpoq.

Akunnittarfinni taakkunani marlunni ukiup ingerlanerani inniminniinerit malunnaatilimmik amerleriarsimapput, 2026-milu aamma taamatut isikkoqalereerluni. Hotel Hans Egedep akunnittarfiini takornariat unnuiniarlutik piffissap taamaalinerani siumutu inniminneereertut aatsaat taama amerlatigaat, akunnittarfimmit oqaatigineqarpoq.

- Ukiumut aggersumut isumalluarpugut. Nuummut toqqaannartumik timmisartukkut tikittoqarsinnaalermat, sulinngiffeqarluni angalasunut, ataatsimeersuarianut nunanilu tamalaani takornariartitsisartunut pilerinarnerulerpoq. Tamanna niuernikkut nutaarluinnarmik tunngavissippaatigut illoqarfiullu takornariaqarnermut periarfissaanik upperinnilersilluta, Christian Loiborg Tang oqarpoq.

Nuummi misigisassanik, neqeroorutinik, unnuiffissat amerlassussaannik ineriartortitsisoqarpat tikeraat amerliartornissaat Hotel Hans Egedemiit naatsorsuutigineqarpoq.

Mittarfiup ammarneqarnera Kalaallit Nunaanni takornariaqarnerup inuussutissarsiornerullu oqaluttuarisaanerani nutaajunerusumi allannguinertut nalilerneqarpoq.

- Mittarfiup piviusunngortinneqarnerani ingerlanneqarneranullu suleqataasut tamaasa qujaffigerusuppavut – pilersaarusiornermiit sanaartornermut ulluinnarnilu ingerlatsinermut, takornarialerinermilu suleqatigisanut. Ukioq qaangiuttoq Nuummut allannguutaavoq, aappaagussamullu qilanaarpugut, Christian Loiborg Tang oqarpoq, taanna HHE-mi pisortap tulliatut ukioq naappat tunuassaaq, tamannalu pillugu aviisimi matumani allaaserisaq atuarsinnaavutit.