Kujataani sisamanngorneq kingulleq ulloq pingaarutilerujussuuvoq, timmisartuussisarnerimmi Narsarsuarmiit Qaqortumut nuunneqarput.
Mittarfiulli ammarnissaa sioqqullugu Qaqortumi eqqaanullu annertuumik isumalluarfigineqalereersimavoq.
Kujataani sisamanngorneq kingulleq ulloq pingaarutilerujussuuvoq, timmisartuussisarnerimmi Narsarsuarmiit Qaqortumut nuunneqarput.
Mittarfiulli ammarnissaa sioqqullugu Qaqortumi eqqaanullu annertuumik isumalluarfigineqalereersimavoq.
Miki Jensenip, Innovation South Greenlandimi pisortap, tamanna uppernarsarpaa. Mittarfiup sunniuteqarluarnera nammineq malugereersimallugu oqarpoq.
– Qaqortumi peroriartorpunga 18-inillu ukioqarlunga nuullunga. Taamani maani inersimasunngorlungalu utoqqalinissara takorloorsimanngisaannarpara. Angerlaqqippungali, taamatut aalajangerninnut mittarfik peqqutaaqataavoq. Nalunngilara allat aamma taamaaliornikuusut.
Miki Jensen Innovation South Greenlandimi 2024-mi maajip aallaqqaataani pisortanngorpoq.
Assi: ISG
– Kujataani inuussutissarsiornermik avataaniit soqutiginnittoqarnerulerneratigut ilaatigut malugaarput. Siornatigut periarfissat uagut nunaqavissut aallunneruvagut. Maanna Topasip illoqarfimmi akunnittarfiit annersaat Hotel Qaqortoq pisiarinikuuneratigut takusinnaavat, Miki Jensen oqarpoq.
Ineriartorneq tamaani najugallit tamarmik iluaqutigissagaat qanoq ilillusi qulakkiissavisiuk?
– Soorunami mittarfik Qaqortumiinnaanngitsoq, aammali nunap immikkoortuani tamarmi iluaqutaassaaq. Tamanna takornariaqarnermut periusissiatsinni atuarneqarsinnaavoq, tassa nunap immikkoortuani takornariaqarnerup siammarternissaa pingaarnertut siunertarigipput, Miki Jensen oqarpoq.
Sumiiffik ataatsimut nittarsaanneqassasoq
Kujataani illoqarfiit tikinneqarsinnaasullu allat soqutiginartut imminnut qanittuaraanerat pisortap erseqqissarpaa, tassami nunap sinneranut sanilliullugit imminnut qaninnerugamik. Taamaattumik sumiiffiup ataatsimut isigalugu nittarsaannissaa, illoqarfik ataaseq kisiat pinnagu, aamma sulissutiginiarneqarpoq.
Inuit unnuiffigisinnaasaannik neriartorfigisinnaasaannillu naammattunik peqarpisi?
– Unnuisarfinnik amerlanerusunik pisariaqartitsineq ilumoorpoq – soorunami ineriartorneq apeqqutaalluni. Unnuisarfiit qanoq amerlatiginersut misissorsimavavut. Qanittukkut Kujataani Akileraartarnermut Aqutsisoqarfik peqatigalugu pikkorissartitsivugut, tassanilu assersuutigalugu Airbnb-mik ammaanissamut malittarisassat sammineqarlutik.
- Neriniartarfiit isumakuluutigivallaanngilakka, tassanimi pisariaqartitsinermut naleqqussarnissaq ajornannginnerugami, Miki Jensen oqarpoq.
Apriilip 16-iat arlalitsigut pingaaruteqarpoq. Mittarfittaarnerup saniatigut Miki Jensen ulloq taanna katippoq, taamaalillunilu mittarfittaarnerup timersortarfimmi sisamanngornermi unnukkut nallittorsiutigineqarnera katittoornertut aamma illuni.
