Naalakkersuisut Royal Arctic Linelu: RAL sikusiutitaassanngilaq

Naak ukiut siuliinit kingusissukkut sikusaraluartoq, avannaani tunumilu ukiukkut nioqqutissanik pilersuinikkut annertuunik suli unammilligassaqarpoq.

Taamaattumik Naalakkersuisut Royal Arctic Line A/S-ip (RAL) sikusiutinik umiarsuarnik pilersuisussanik pisinissaanut periarfissarsiortariaqarput.

Inatsisartunut ilaasortaq Isak Johannesen, Naleraq,  paragraf 37 naapertorlugu apeqquteqartoq taama isumaqarpoq.

Taamaakkaluartoq sikusiutinik pissarsinissaq sanaartortitsinissarluunniit Naalakkersuisunit anguniarneqanngilaq, sikusiutit pilersinniarneri, ingerlatsinermullu aningaasartuutai annertuallaarneri tamatumani pissutaavoq.

Isumaginninnermut Suliffeqarnermut, Ineqarnermut, Attaveqaqatigiinnermut Nunallu Isorliunerusunut Naalakkersuisoq Aqqaluaq B. Egede, Inuit Ataqatigiit, taamatut ilisimatitsivoq.

RAL-i ukiukkut sikuusarfiusuni nioqqutissanik assartuinermi sikusiutit atorneqartariaqanngitsut aamma isumaqarpoq.

Naleqqussarneq

Naalakkersuisut nuna tamakkerlugu nioqqutissanik pilersuinerup pitsanngorsarnissaa pillugu periarfissanik misissuiuartut, Isak Johannensenimut Upernavimmiumut akissummi allassimavoq.

- Royal Arctic Line A/S-ip angalanissamut pilersaarutai kingullermik 2025-mi oktobarimi naleqqussarneqarput. Tassani pisisartut maannakkut pisariaqartitsinerat eqqarsaatigalugu nioqqutissanik pilersuineq immikkut naleqqussarneqarpoq, tamannalu Naalakkersuisut umiarsuaatillip angalanissamut pilersaarutaannik akuersissuteqarneranni suleriaasiuvoq nalinginnaasoq, Aqqaluaq B. Egede oqarpoq.

Sumiiffinni kingusinnerusukkut sikusalernera nioqqutissanik pilersuinerup sivitsorneratigut periarfissaq Naalakkersuisut atorluarsinnaaneraat, Isak Johannesenip aamma paaserusuppaa.

- Ukiuunerani nioqqutissanik pilersuineq Naalakkersuisut naleqqussartarpaat. Assersuutigalugu 2024-mi aamma 2025-mi ukiuunerani piffissap sivisunera atorluarlugu ukiumi sapinngisamik kingusinnerpaamik Royal Arctic Line A/S Tasiilamut tikinniarsarigaluarpoq.

- Tamatuma saniatigut nunami namminermi sikoqarneranut tunngasut malillugit nunami namminermi nioqqutissanik pilersuinerup aaqqinnissaanut Naalakkersuisut Royal Arctic A/S aamma DMI ingerlaavartumik oqaloqatigisarpai, Attaveqarnermut Naalakkersuisoq taama akissuteqarpoq.

Sikusiutit umiarsuatut pilersuisutut atorneqarsinnaanerat Naalakkersuisut naapertorlugit sumiiffimmit sumiiffimmut assigiinngiiaartarpoq. Assersuutigalugu Avannaani Tunumilu ukiukkut sikusiorneq assigiinngitsorujussuusartoq Aqqaluaq B. Egede ilisimatitsivoq.

Navianartorsiorneq

Nunap immikkoortuisa arlaat pineqarnersoq aporfissani annertuumik apeqqutaasarpoq. Avannaani aamma Tunumi assersuutigalugu ukiuunerani sikusarnera assiginngitsorujussuuvoq..

RAL-illi umiarsuaatai maannakkut imaani navianartorsiorfiusuni angalasinnaanngittut, oqarpoq.

- Sikusimanerata annertuumik nalornissutigineqartarfini piffissani Royal Arctic Line A/S tikinnissanut pilersaarusiussappat, tamanna umiarsuup inuttaasalu ajoqusersinnaanerisa annertuumik aarlerinaateqarneranik kinguneqartussaavoq.

- Tamatuma saniatigut ilaatigut ukiuunerata qaammataanni sikusartunut, taakkua piffissat ilaanni sikusimanngikkaluarpataluunnit, umiarsuit tikissinnaanissaat Royal Arctic Line A/S-ip qulakkeersinnaanngilaa, Aqqaluaq B. Egede oqarpoq.

Umiarsuit qanoq annertutigisumik umiarsualiviit atorneqarsinnaaneri ilisimaneqanngimmat nioqqutissanik killilinnik nassataqartartut aamma erseqqissarpaa. Tamannalu pissutaassappat, taamatut sullissineq imminut nammassinnaanngitsoq, Naalakkersuisoq ilisimatitsivoq.

Angalanerit isumannaatsut

Naalakkersuisut RAL-illu umiarsuarmut inuttanullu isumannaatsumik angalanissaq pingaartippaat. Umiarsuit angalalersinnagit angalanissat piffissaq sivisooq atorlugu pilersaarusiorneqartartut RAL paasissutissiivoq.

- Pilersuisoq angalanissamut pilersaarut malillugu nioqqutissanik nassiussinissamut pilersaarusiortarpoq aammalu aallartussat immaqa piviusunngornavianngitsut atornagit, qularnaatsumik aallartussani nioqqutissanik nassiussinissaq iluarinerullugu.

- Ukioq ataaseq siumut angalanissamut pilersaarusiortarluni maannakkut periaaseq usinik assartuussinissap pilersaarusiornissaanut periarfissiiviuvoq.

- Sikuerunnerani umiarsuarmik nassiussanik assartuussinissamut aammalu timmisartumik qulimiguulimmillu nassiussalerinissamut nunatsinni periarfissaqartarpoq, Aqqaluaq B. Egede oqarpoq.

Sikusiutitaartoqassappat aningaasaqarnikkut sunniutaasussat Naalakkersuisut tamakkiisumik misissorsinnaasimanngilaat.

Akisuallaartoq

Umiarsuaateqarfiup sikusiutinik pilersuisutullu atortussanik pisinissaq pilersaatutiginngilaa. Aammattaaq piginnittut, tassa Naalakkersuisut, RAL-imut maannakkut periuseq allanngortinniarlugu qinnuteqarsimanngitsut, Niels Clemensen, RAL-imi pisortaaneq oqarpoq.

- Umiarsuaatileqatigiiffimmik piginnittut sikusiutinik sanasoqarnissaanik kissaateqarpata sanassavarput, Tamannali siunissami aningaasaqarnikkut sunniuteqartussaassaaq. Qanormi akeqarnissaa apeqqutaavoq.

- Umiarsuit maanna pigisatsinnut naleqqiullugit ingerlanneqarnera akisunerujussuussaaq, umiarsuavulli aamma sikumi angalanissamut sanaajupput, oqarpoq.

Sikusiutinik pisinnginnermi arlalinnik eqqarsaraatersuuteqarfigineqartariaqartoq oqaatigaa.

Oqaluuserisassaq

Naalakkersuisut akissutaat Inatsisartut upernaakkut ataatsimiinnissaannut Naleqqap Inatsisartuni gruppiani oqaluuserisassanngortinneqassasoq, Isak Johannesen oqarpoq.

Inatsisartuni ukioq manna oqaluuserineqartussaasoq taanna oqarpoq. Isumaqarporlu tamanna tunngavigalugu sikusiut umiarsuatut pilersuisutut atorneqarsinnaasoq pisiarineqarsinnaanersoq misissorneqartariaqartoq.