Nalik Venturesip sinneqartooruteqarnini ataatsimeersuarnermi nalunaarutigigaa

Nalik Ventures siorna 46,5 million koruuninik sinneqartooruteqarpoq, naatsorsuutillu naammagisimaarnarput. Ataatsimeersuarnermi ataasinngornermi ingerlanneqartumi siulersuisuni nutaamik ilaasortanngortoqarpoq.

Assi: Nalik Ventures

Morten Okkels Morten Okkels Tusagassiortoq

Saqqummersinneqarpoq 1. Juuni 2026 - 17:08

Annonse

Namminersorlutik Oqartussat inuussutissarsiornermik siuarsaanermut ingerlatseqatigiiffiutaat Nalik Ventures ataasinngornermi ualikkut ataatsimeersuarpoq. Tassani ingerlatseqatigiiffik siorna 46,5 millionit koruuninik sinneqartooruteqarsimalluni nalunaarpoq.

Angusat naatsorsuutigineqartumit qaffasinnerusut, tamannalu ingerlatseqatigiiffiup piginneqataassutaasa nalingata qaffannerinik kinguneqartoq Nalik Ventures, siulersuisui naammagisimaarinnittut nalunaaruteqarput.

Nalik Ventures

Nalik Ventures suliffeqarfiit pingasut, Greenland Holding, Greenland Venture aamma Innovation Greenland, kattunnerisa kingunerisaanik 2022-mi pilersinneqarpoq.

Nalik Venturesip ineriartornermut inuussutissarsiornermillu siuarsaanermut peqataaneq, aammalu kalaallit piginneqataanerannik ineriartortitsinermilu pissarsiarisinnaanerannik qulakkeerinninneq pingaarnertut suliassaraa.

Nalik Ventures A/S ingerlatseqatigiiffiuvoq piginnittuusoq, tamatumalu saniatigut inuiaqatigiit pisuussutaannik annertuunik ingerlatsisuuvoq, tassa ingerlatseqatigiiffinnut aalajangersimasunut Kalaallit Nunaannut attuumassuteqartunut aningaasaliissuteqartarpoq.

Najoqqutaq: nalik.gl

Tigusiffik: nalik.gl

Nalik Ventures suliffeqarfinnik aallarnisaasunillu ineriartortitsinissamut 2025-mi suliniuteqarnerulersimallunilu tamatumunnga atatillugu naleqquttunik suleqatissarsisimavoq, ingerlatseqatigiiffik nammineq taama ilisimatitsivoq.

– Piffissami siusinnerusumut naleqqiullugu periarfissaqarnerulerfiusumiippugut. Periarfissalli imminni ineriartornermik pilersitsineq ajorput. Suliffeqarfiilli ineriartortarput. Taamaammat kalaallit suliffeqarfiisa periarfissanik ineriartornerup pilersitaanik atorluaasinnaanissaat qulakkeerniarlugu aalajangersimasumik suliniuteqarpugut, Nalik Ventures A/S-imi siulersuisuni siulittaasoq Miki Lynge oqarpoq.

Siulersuisuni ataasiinnarmik allannguisoqarpoq. Tassani Merete Lundbye Møller Eqalunnguaq Abel Kristiansenimit taarserneqarpoq. Eqalunnguaq Abel Kristiansen ulluinnarni Royal Greenlandimi inuttaqarnermut ingerlatsisuuvoq.

Nalik Ventures 2026-mi suliffeqarfinnik ineriartortitsillunilu aallarnisaanermik nukittorsaasussaq aamma ilisimasanut, aningaasanut suleqatinullu periarfissaqalersitsissaaq.

– Kalaallit Nunaata ineriartornerani kalaallit suliffeqarfiisa ineriartoqataanissaat pingaaruteqarpoq. Ilisimasanik, piginnaasanik, aningaasaliissutinik suleqateqarnermillu periarfissanik pilersitsinissaq suliassaraarput, taamaalilluni nuna tamakkerlugu siuariartornissamut, suliffeqarfinnut suliffinnullu periarfissat piviusunngortinneqarsinnaapput, Miki Lynge oqarpoq.