Nammineq kiffartuunnissamut aaqqissuussinerit atorneqalissasut

Nunarsuaq tamakkerlugu niuertarfeqarneq tatineqarpoq - pisiniarfiillu aningaasartuutiminnik annikillisaataasinnaasunik ujartuillutik.

Tamatumani ilaatigut karsinik nammineq kiffartuussivinnik pilersitsinikkut pisarluni, soorlumi Nunatsinni pisiniarfissuarni tamanna takusareeripput, siunissamili ineriartorneq sakkortunerulissaaq.

Nunarsuaq tamakkerlugu pisiniarfiit nutaat sulisoqanngitsut ammarneqartarput – amerlasuullu isumaqarlutik pisiniarfiit sulisoqanngitsut inoqarfinnut mikisunut aaqqiissutaasinnaasut.

Tamanna Arctic Importimi aamma paasereerpaat, maannalu taakku imminut kiffartuunnissamut aaqqiissutissanik Nunatsinni Islandimilu tuniniaanerminni suliffeqarfiit Unlimit Group A/S-imiittut, aaqqiissutissanik ineriartortitsillutillu nassaarniartartut, aamma Modern Expo pisiniarfinni pequsersuisartut suleqatigalugit tuniniaaniarlutik.

- Kalaallit Nunaanni niuertarfinni nioqqutissanik amerlasuunngorlugit tuniniaasartuni siuttuuvugut, namminerlu kiffartuulluni pisiniarsinnaaneq atuisartorpassuatsinnut periarfissatut isigaarput, Thomas Hjort Arctic Importimi pisortaaneq oqarpoq. 

- Pisiniarfinniinnaanngitsoq periarfissarpassuaqarpoq, aammali suliffeqarfinni, akunnittarfinni, atuarfinni, orsersortarfinni, mittarfeqarfinni takornarianut sammisassaqarfinnilu atorluarneqarsinnaavoq. Periarfissat amerlasoorujussuupput.  

  Kaffisorniartarfik nutaaliaasoq

Assersuutigalugu imaassinnaavoq akunnittarfimmi isersimasut nalinginnaasumik ammasarfiit avataatigut namminneq nerisassanik imigassanillu pisisartut, sulisut tamatigut najuutinngikkaluartut. - Oqarasuaat angallattagaq imaluunniit matuersaataasat batteriillit atorlugit imminut kiffartuuttoqarsinnaavoq. Ilisiviit oqimaalutaqartut atorlugit sunik tigusisoqarnersoq nalunaarsorneqartarpoq, taakkulu akunnittarfimmi najugallip akiliutaanit ilanngaatigineqartassallutik.

- Akunnittarfinni, mittarfinni mikinerusuni heliportinilu aaqqiissutissaalluarsinnaassasoq takorloorpara, Thomas Hjort nassuiaavoq. 

- Aamma ilinniarfinni atorluarneqarsinnaassasoq takorloorpara.

- Tamakkunani ulloqeqqanut kantiina ulapiffiusaqaaq, kisiannili ullup qeqqata avataatigut kantiinami sulisoqarnissaq akisuallaarluni. Nammineq nerisassanik pisisinnaaneq iluaqutigalugu ilinniartut atuarnerminni kaattut nerisassarsisinnaassapput.

- Islandimi nammineerluni kiffartuunnermut aaqqissuussinerit soqutigineqarluartut malugisimavavut, Kalaallit Nunaannili aatsaat maanna nittarsaassilerluta.

Tamanna siunissaasoq 

Thomas Hjortip Nunatsinni siunissami nammineerluni sullissinernik amerlasuunik takussaasoqalerumaartoq upperaa. Unlimit Group A/S-imik Modern Expomillu suleqateqarneq aallaqqaataannaavoq, oqarpoq.

- Pisiniarfiit assigiinngitsunik sanaartorneranni pitsanngorsaaneranilu suleqatigissavavut, soorlu ilisiviit nillataartitsiviit, karsit nammineq sullinnermut atortussat, akiliisarfiit qarasaasiakkut aqunneqartut, poortukkat nakkartitsivii pisiniarfiillu inuttaqanngitsut.

- Aaqqiissutit pisiniarfiup sivisunerusumik ammatissinnaanissaanut, atortussanik pitsaanerpaamik atuisinnaaneranut nioqqutissanillu pissarsisinnaanissamut ajornannginnerulersitsisussat – aamma sulisut najuutinngikkaluartut.

Unlimit Group A/S-imik suleqateqarneq nalaatsornerinnaagunanngilaq. Suliffeqarfiup tuniniaanermut pisortaa Mads Laursenimik ateqarpoq. Taanna ukiorpassuarni Nunatsinni najugaqarsimavoq, ilaatigullu KNI-mi ussassaarinermut pisortaasimalluni.

- Taamaattumik Nunatsinni suliffeqarfippassuit tunisassiavut iluaqutigiumaaraat qularinngilara, Mads Laursen Sermitsiamut oqarpoq. 

 Unlimit Group A/S ukiut 14-it matuma siornagut pilersinneqarsimavoq, namminerlu sullissinermut aaqqiissutissanik assigiinngitsorpassuarnik sullitat qarasaasianut atortuinut allanut atassuteqartunik ineriartortitsisarlunilu tunisassiortarluni.

Suliffeqarfiup ilaatigut pisiniarfiit inuttaqanngitsut siulliit Dagrofap niuertarfeqarfiutaannut „Min Købmand“-imut peqataasut pilersorsimavai, aammattaaq pisiniarfinnut inuttaqanngitsunut Smart Shop-imut Danmarkimi arfineq-marlunnik pisiniarfiuteqartumut pilersuisarpoq.

Unlimit Groupip nioqqutissaatai ulluinnarni niuertarfinniiginnanngillat, aammali sanaartorfissuarni atorneqarlutik, tassani quersuarnik nakkutilliisarlutik, sulisoq assersuutigalugu kuuffimmik aallerpat, sumut nalunaarsorneqassanersut automatiskimik nalunaarsorneqartarput – aamma quersuarmiittuutigineqartut nunguleraangata quersuarmik aqutsisunut nalunaarutigineqartarlutik.

Unlimit Groupip aaqqiissutissaasa qitiutinniarpaat assiliiviit qarasaasiakkut ilisarnaatillit aamma ilisivinni oqimaalutaaviit sekundimut 30-t sinnerlugit nalunaarsuisinnaasut, suliffeqarfiillu nioqqutissat sumiinnerannik ilisimanjiottuaannarnissaat qulakkeerlugu – aamma tillinniartoqarsinnaaneranik tammartitsisoqarsinnaaneranillu pinngitsoortitsisarlutik.