Nipisat suaasa akiata qaffasinnerunera nuannaarutigineqartoq

Nipisat suaannik tunisinermi kiilumut akigitinneqartoq ukioq manna ukiut siuliinut naleqqiullugu malunnaatilimmik qaffasinneruvoq, tamannalu aalisartunit nuannaarutigineqarpoq.

Sinerissami Royal Greenland A/S-ip aalisakkeriviini nipisat suaat kiilumut 40 koruuni, taassumalu qaavatigut tapeq 1 koruuni akigitinneqarpoq.Taassuma saniatigut Nuummi aalisakkeriviit tallimaasut unammilleqatigiinnerat pissutaalluni suannik tunisinermi 42 koruuni, taassumalu qaavatigut 1 koruuni, akigitinneqarpoq. Aqutsiveqarfinni assigiinngitsuni nipisanniarnerup aallartittarfia assigiinngilaq, aalisarnerlu ulluni 60-it ingerlanneqartarpoq.

Unammilleqatigiinneq akinik qaffaasoq

Kalaallit Nunaanni illoqarfiit annersaanni Nuummi suliffeqarfiit aalisakkanik tunisassiortut nipisaallu suaannik tigooraasut sisamaapput, tassaasut Royal Greenland A/S, Polar Raajat A/S, Unik Seafood Greenland A/S aamma suliffeqarfik nutaaq Arctic Roe ApS. Taakkunani nipisat suaat kiilumut 43 koruuneqarput. Aalisakkanik tunisassassiorfiit tallimaanni Arctic Cod ApS-mi nipisat suaat tunisaanatik aalisakkalli assigiinngitsut tunisaapput.

Nipisat suaasa ukioq manna akisunerunerat unammilleqatigiinnerup sakkortuneruneranik ilaatigut peqquteqartoq Kalaallit Nunaanni Aalisartut Piniartullu Kattuffianni, KNAPK-mi, siulittaasoq Pele Blytmann isumaqarpoq.

Nipisat suaannik tunisinermi akigitinneqartussap minnerpaaffissaa 35 koruuniussasoq Arctic Roe ApS-ip aamma KNAPK-p akunnerminni martsi naasoq atsioqatigiillutik isumaqatigiissutigaat. Isumaqatigiissullu taanna suliffeqarfiit allat nipisat suaasa akiinik qaffaasariaqalernerannik kinguneqarsimasoq Pele Blytmann isumaqarpoq.

Tamatuma kingorna KNAPK Royal Greenlandilu nipisat suaasa qanoq akeqartinneqarnissaat pillugu marloriarlutik ataatsimiipput.

- Royal Greenlandimik ataatsimeeqateqarneq torersumik paaseqatigiiffiusumillu ingerlavoq. Tunisinermilu akigitinneqartussaq Nuummi 43 koruuniussasoq, sinerissamilu 41 koruuniussasoq isumaqatigiissutigaarput.

- Taamaalilluni Arctic Roep KNAPK-llu akornanni nipisat suaasa akiinik minnerpaaffiliineq tunisassiorfiit allat akinik qaffaasariaqalernerannik kinguneqarsimasoq qularnanngilaq, taanna oqarpoq.

Nipisat suaanik tunisinermi ukioq manna akigitinneqartussaq pillugu isumaqatigiinniarnerit inernerat pitsaalluinnartutut Pele Blytmannip nalilerpai.

Nipisanniat amerlanerusut

Nuummi nipisanniarneq 10. apriili aallartippoq. Aalisartoq piniartorlu Aslak W. Jensen maanna nipisanniarpoq, tunisinermilu akigitinneqartoq taassuma naammagisimaarpaa.

- Nipisat suaasa akiisa qaffasinnerunerat peqqutaalluni umiatsiaararsortut nipisanniartut amerlanerusut malunnarpoq.

- Ukiorlu manna akit qaffasinnerunerat aalisartunit annertuumik nuannaarutigineqarpoq, taanna oqarpoq.

Islandimi nipisat suaat piujuaannartitsineq aallaavigalugu MSC-imik (Marine Stewardship Council) meqqeqanngillat, Danmarkimilu ukioq manna nipisanniarneq matoqqavoq. Tamannalu ilaatigut peqqutaalluni ukioq manna nunatsinni suaat akiinik qaffaanissamut tunngavissaqalersitsisoq, taanna isumaqarpoq.

- Nunatsinni nipisat suaasa MSC-mik meqqeqarnerat akit qaffasinnerunerannut peqqutaavoq, tamannalu tamatsinnut iluaqutaavoq, Aslak W. Jensen oqarpoq.

Saarulliit akii ukioq manna aamma qaffasinnerupput. Nuummi tunitsivimmut sumut tunisineq apeqqutaalluni saarullinnik tunisinermi akigitinneqartoq kiilumut 20 koruuni tungaanoorpoq. Taamaammat umiatsiaararsortut atugaat ataatsimut isigalugu siornatigumut naleqqiullugu pitsaanerusut Aslak W. Jensen isumaqarpoq.

Periarfissaq atorluarneqartoq

Qeqertarsuatsiaani aalisartut piniartullu peqatigiiffianni siulittaasup Søren Rosingip oqarnera naapertorlugu, silap nillernera peqqutaalluni nipisanniarneq maannakkut suli iluamik aallartinngilaq. Piffissamili qanittumi aallartilluarnissaa taassuma naatsorsuutigaa. Akilli qaffasinnerunerat taassuma nuannaarutigaa.

- Nipisat suaat immaqa aatsaat taama qaffasitsigaat, tamannalu peqqutaalluni peqatigiiffimmut ilaasortat 20-t tungaanoortut tamarmik nipisanniarnissaat naatsorsuutigaara, taanna oqarpoq.

Nipisat suaat aalisakkallu assigiinngitsut Qeqertarsuatsiaani Royal Greenlandimut tunisaapput.

Kapisilinni tunitsiveqanngilaq. Taamaakkaluartoq nunaqarfimmi umiatsiaararsortut amerlanerit saarullinniarneq pingaarnertut inuussutissarsiutigaat, pisallu Nuummut tulaanneqartarput. Nipisat suaasa ukioq manna akigissaarnerunerat atorluarumallugu Kapisilinni umiatsiaararsortut arlaqartut Nuup eqqaanut nipisanniariartussamaartut Kapisilinni aalisartut piniartullu peqatigiiffianni siulittaasoq Angutimmarik Hansen oqarpoq.

Paasissutissat:

Sinerissap qanittuatani imartani taamaallaat nipisanniartoqarsinnaavoq.

Nipisanniarneq aqutsiveqarfinnut arfineq marlunnut agguagaavoq:

• Aqutsiveqarfik 510-K 1A (Qasigiannguit, Ilulissat, Qeqertarsuaq, Uummannaq aamma Upernavik). Aalisarnerup aallartiffia 1.april.

• Aqutsiveqarfik 521-K 1Ba (Aasiaat). Aalisarnerup aallartiffia 15. april.

• Aqutsiveqarfik 522-K 1Bb (Sisimiut). Aalisarnerup aallartiffia 5. april.

• Aqutsiveqarfik 530-K 1C (Maniitsoq). Aalisarnerup aallartiffia 15. april.

• Aqutsiveqarfik 540-K 1D (Nuuk). Aalisarnerup aallartiffia 10. april.

• Aqutsiveqarfik 550-K 1E (Paamiut). Aalisarnerup aallartiffia 1. april.

• Aqutsiveqarfik 560-K 1F (Kalaallit Nunaata kujataa). Aalisarnerup aallartiffia 1. april.

Ukiumi pisassiiffiusumi ataatsimi aqutsiveqarfinnut marlunnut akuersissutinik tunineqarsinnaavutit. Aqutsiveqarfik siulleq angerlarsimaffinniissaaq. Aqutsiveqarfiup aappaa tassaassaaq aqutsiveqarfiup angerlarsimaffigisavit saniliani aqutsiveqarfik.

Tigulaariffik: Sullissivik.gl.