Niuertoq tusaamanerlugaasoq aatsitassarsiornissamut akuerineqartoq
Nakkutilliinerup pitsaavallaannginneratigut aningaasarsiorniartut Kalaallit Nunaanni sumiiffinnut pingaarutilinnut isersinnaalernerat immikkut ilisimasallit mianersoqqussutigaat.
Namminersorlutik Oqartussat nunanit allanit suliffeqarfinnik mikisunik Kalaallit Nunaanni aatsitassarsiornissamut akuersissutinik qinnuteqartoqaraangat nakkutilliinerat immikkut ilisimasallit arlallit isornartorsiorpaat.
Toqqorsivimmit assi: Leiff Josefsen
Aatsitassanut Naalakkersuisoqarfik kina piginnittuunersoq ilisimanagu Isle of Manimi aatsitassarsiorfimmut Australiamiup niuertup assortuussutigineqartup pigisaanut misissuinissamut akuersissutinik pingasunik ukioq manna septembarimi januaarimilu tunniussivoq.
Tusagassiivik misissuisartoq Danwatch taama allappoq.
Tassaavoq Australiami aatsitassarsiornermik aningaasaliisoq Michael Shemesian, aamma „Mick Many Names“-imik ilisimaneqartoq, Australiami tusagassiuutit kiisalu danskit politikeriisa avatangiisinillu suliaqartartut arlallit ukiorpassuanngortuni mianersoqqutigisartagaat.
Michael Shemesian ilaatigut aatsitassarsiorfinnut Kinamiut naalagaaffimmut atasut piginneqataaffigisaannut, soorlu Kuannersuarniittumut, attuumassuteqarpoq, taama allassimasoqarpoq.
Suliaq tamanna pissutigalugu nunanit allaneersut suliffeqarfiutaat Kalaallit Nunaanni aatsitassarsiornissamut akuersissummik qinnuteqartut nakkutigineqarnerat immikkut ilisimasallit arlallit isornartorsiorpaat.
Ilaatigut Jacob Kaarsbomit, isumannaallisaanermut siunnersortimit siornatigut illersornissamut tunngasunik paasiniaasartunut pisortaasimasumit:
"Tamanna ilungersunartorujussuuvoq. Sillimaniarnermut politikki eqqarsaatigalugu ulorianartorsiorpugut, piginnittullu nakkutiginngikkaanni piginnittoq Kinami naalagaaffimmut attuumassuteqartoq imaluunniit Trumpip aqutsisoqarfianeersoq Naalagaaffeqatigiinnermik akornusersuiniartoq akuersissuteqalersinnaavoq", taanna oqarpoq nangillunilu:
"Taanna (Shemesian, aaqq.) Aatsitassanut Naalakkersuisoqarfik ilisimatinnagu akuersissummik pissarsisinnaappat taava kikkut allat taamaaliorsinnaappat? Ajornartorsiut ilungersunarpoq".
Ingerlatseqatigiiffik akuersissutinik pingasunik pissarsisoq Wally John Resources Greenlandimik ateqarpoq, taannalu suliffeqarfiup Isle of Man-imeersup Wally John Resources Limitedip Michael Shemesianimit pilersinneqartup piginnittuusullu Kalaallit Nunaanni immikkoortortaqarfigaa.
Aatsitassanut Naalakkersuisoqarfik „Michael Shemesian Wally John Resources Greenlandimik piginnittoq Danwatchip tamanna ilisimatimmagu aatsaat paasisimallugu“ Danwatchimut mailikkut allappoq.
Aatsitassanut Naalakkersuisoqarfik misissuinissamut akuersissutinik tunniussinermi piumasaqaatit paasiuminartuusut, maannakkullu piginnittut qanoq ititigisumik misissorneqassanersut “killeqartorujussuusoq” nalunaarpoq.
Aatsitassarsiornissamut qinnuteqartoqarpat misissuineq sukumiinerusussaq aatsaat ingerlanneqassaaq, naalakkersuisoqarfik mailikkut allappoq. MAtumani ilaatigut avataaneersunit siunnersorneqarnissaq periarfissaavoq.
Tamanna naammanngitsoq Flemming Getreuer Christiansen, 2020-p tungaanut GEUS-imi pisortap tullia maannalu siunnersortiusoq isumaqarpoq.
"Tamanna ernumanartorujussuuvoq (...) nunatsinnimi aatsitassanut inatsit naapertorlugu suliffeqarfiit nassaarniarunik piumasaqaatillu naammassigunikku piiaanissamut akuersissutinik pissarsisussaammata kikkut misissueqqaarnissamut akuersissummik tunineqartarnersut misissorneqaqqaartariaqarpoq,“ taanna oqarpoq.
Naalakkersuisoqarfiup ernumassuteqarnissamut pissutissaqanngitsoq oqaatigaa, piumasaqaatillu malinneqanngippata Naalakkersuisut akuliutsinnaallutillu akuersissummik atorunnaarsitsisinnaasut erseqqissarpaa.
Danwatchip Michael Shemesian allakkatigut oqarasuaatikkullu attaveqarfiginiaraluarpaa, akineqanngilarli.
