Piniartukkormiunut ukioq ilungersunartoq

Qaanaami eqqaanilu nunaqarfinni Siorapalummi, Savissivimmi Qeqertanilu ukioq manna inuussutissarsorneq ilungersunartumik inissisimavoq, tamannalu ukiup naajartornerani ilaqutariinnut piniartukkormiunut aalisartukkormiunullu annertuumik eqquinerluppoq.

Avannaata Kommuniani Qaanaami inuussutissarsiornermut immikkoortortaqarfiup paasissutissaatai naapertorlugit, inuutissarsiorsinnaanngikkallarnermi ikiorsiissutinik qinnuteqaatit 50-it missaanniittut Aalisarnermut Piniarnermullu Naalakkersuisoqarfimmut nassiunneqarsimapput.

Inuussutissarsiorneq ajalusoortoq

Avannaata Kommuniani Qaanaami inuussutissarsiornermut immikkoortortaqarfiup pisortaata David Qujaukitsup oqarnera naapertorlugu, ukioq manna Qaanaami eqqaanilu nunaqarfinni inuussutissarsiorneq ilungersunartumik inissisimavoq, tamanna annerusumik ilaqutariinnut aalisarnermik piniarnermillu inuussutissarsiuteqarnerinnarmik isumalluuteqartunut annertuumik eqquinerluppoq.

- Ukioq manna umiarsuit takornariartaatit ukiup siulianut naleqqiullugu ikinnerusut tikipput, tamannalu takornariaqarnermi isertitat ikinnerunerannik aamma kinguneqarpoq.

- Ammit, saarngit tuugaallu nunatsinniit anniseqqusaannginneri peqqutaalluni piniartut tunisinnaasaat killeqartarput. Ukiuunerani takornariaqarpiarneq ajormat qimussiussisarnerit annikitsuinnarmik ingerlanneqartarput, taamaattumik takornariaqarneq inerisaaffigineqassapput periarfissanik nutaanik ujartuinissaq pisariaqarpoq.

- Qaanaami eqqaanilu piniarnermik piorsarsimassuseq takornarissanut misigisassarsorfissatut ineriartortinneqarsinnaasunut ilaavoq, kisianni silaannakkut angallannermi pissutsit amerlasuutigut aporfiusarput, taanna oqarpoq.

Silaannaap allanngoriartornerata kingunerisaanik piniartut aalisartullu inuussutissarsiornerat aamma eqquinerluttoq taassuma oqaatigaa.

Ikiorsiissutinik qinnuteqaatit amerlasuut

Ukioq manna Qaanaami nunaqarfiinilu inuussutissarsiornikkut pissutsit ilungersunartut peqqutaallutik, ilaqutariit aalisartukkormiut piniartukkormiullu 50-it missaanniittut inuutissarsiorsinnaanngikkallarnermi ikiorsiissutinik Aalisarnermut Piniarnermullu Naalakkersuisoqarfimmut qinnuteqarsimasut David Qujaukitsoq oqarpoq.

- Silaannaap allanngorneranik peqquteqartumik sikukkut qaleralinniarluni aalisarneq annertuumik kinguariarfiuvoq, piffissamilu matumani aalisarneq aallartereertaraluartoq suli aallartinngilaq.

- Ilaatigut tamanna peqqutaalluni ukioq manna inuutissarsiorsinnaanngikkallarnermi ikiorsiissutinik qinnuteqartut ukiut siuliinut naleqqiullugit amerlanerungaatsiarput, piffissamilu matumani akissutisinissaat utaqqiinnarparput, taanna oqarpoq.

Piniartut ilai oktoberi aallartisimalaartoq qilalukkanik pisaqarput, tamatumalu kingorna amerlanerpaat isertitaqarsimanngitsut David Qujaukitsoq erseqqissaavoq.

Puisaasattoq

Savissivimmi aalisakkanut tunitsiveqanngilaq, puisillu amiinik tunisinermi isertitat kisiisa annermik ilaqutariit piniartukkormiut aningaasarsiutigaat. Aammali silaannaap allanngoriartornerata kingunerisaanik sikusarnera kingusinnerulerpoq, piffissamilu matumani sikukkut qassuserluni puisinniarneq aallartereertaraluartoq suli iluamik aallartinngilaq. Ukiorlu manna puisaasannera aamma eqquinerluttoq, Savissivimmi piniartoq Ole Nielsen oqarpoq.

- Ukiut siuliini oktoberip naalernerani sikusaraluarpoq, maannali sinerissap qanittua aatsaat sikunialerpoq qassusersornerlu annikitsuinnarmik ingerlavoq. Taassuma saniatigut siornatigumut naleqqiullugu puisit akuttusoorujussuupput, tamannalu peqqutaalluni aningaasarsiorniarneq ilungersunartorujussuuvoq, taanna oqarpoq.

Piffissami matumani Ole Nielsen kommunip ataani utoqqarnik imertartartuussisarpoq nulialu Atugsuk Petersen Suersaq piffissap ilaani atuarfimmi siornatigut sulisarsimavoq.

Aappariit tallimanik qitornaqarput.

Aalisarneq kinguariarfiusoq

Ukiut siuliini Qaanaami ukiuunerani sikukkut qaleralinniarluni aalisarneq iluatsilluartumik ingerlasimagaluartoq, ukiuni kingullerni sikuusarnerata allanngorneranik peqquteqartumik aalisarneq annikinnerusumik ingerlanneqartalersimasoq aalisartoq piniartorlu Tobias Simigaq oqarpoq.

- Ukioq manna aalisarneq annertuumik kinguariarfiuvoq, taamaakkaluartoq Qaanaap eqqaa qilalugaqarluarmat qilalugarniarneq pitsaasumik ingerlavoq, taakkuli kisiisa ukioq kaajallallugu aningaasarsiutigineqarsinnaanngillat.

- Taamaattumik ilaqutariit piniartukkormiut aalisartukkormiullu amerlanerit piffissami sivitsortumi annikitsuinnarmik isertitaqarput, taanna oqarpoq.

Qaanaami aalisakkanut tunitsivimmi Inughuit Seafoodimit Royal Greenlandimillu pigineqartumi pisortap Ujuut Olsenip oqarnera naapertorlugu, ukioq manna qilalukkat mattaannik tunisineq siornamut naleqqiullugu annertunerulaarpoq, kisiannili qalerallit 60 tonsit missaat taamaallaat tulaanneqarsimasut taassuma ilanngullugu oqaatigaa.