Pitsi Høeghip Kujataani takornariaqarnerup siuariartornissaa naatsorsuutigaa: Akimasumik akunnittarfiliornissamik pilersaaruteqarpoq

Qaqortumi mittarfittaaq takornariaqarnermut aningaasaliinissamut soqutiginnilersitsisivoq. Akunnittarfik nutaaq nalinginnaasunik akimasuunillu initaqartussaq pilersaarutaavoq. Pilersaarusiorneqarami taamaammat aatsaat aallartisarneqarpoq.

- Ernikkalu marluk Minik Nikkilu 100-nik initalimmik akunnittarfiliornissamut aningaasaliiniarpugut.

- Suliniut ukiuni arlalinni ingerlanneqarpoq. Aallaqqaammut illuaqqanik sanaartornissaq eqqarsaatigisimagaluarparput. Maannali nutaamik akunnittarfiliornissamik pilersaaruteqarpugut, Pitsi Høegh Sermitsiamut oqarpoq.

Pitsi Høeghip, Qaqortumi takornariartitsisarfimmi Greenland Sagalandsimi pisortaallunilu piginneqataasup, ukiorpassuarni takorluugarisimasani piviusunngortinniarlugu Kujataani illoqarfiit annersaanni mittarfiup eqqaani sanaartornissaq pilersaarutigaa.

Ilaqutariit Høeghikkut tassani akunnittarfiliorsinnaassallutik neriuutigaat, Pitsi Høegh oqarpoq.

Akunnittarfiup ilaa akunnittarfiup sinneranit akimanerussasoq taanna oqaluttuarpoq.

- Init amerlanersaat, nalinginnaasut, 20 kvadratmeterit missaanniissapput, inillu akimanerusut anginerulaassapput.

- Init affaannit kangerlummut isikkiveqassallunilu affaani qaqqanut isikkiveqassaaq, Pitsi Høegh oqaluttuarpoq.

Akunnittarfik, Minik aamma Nikki Høeghip titartartitaat, Kommune Kujalliup nunatami inuussutissarsiornermut atugassanngortissimasaani, illoqarfiup mittarfittaallu akornanni aqqusernup 7 kilometerisut takitigisup qeqqani, inissisimassaaq.

- Aningaasaliisinnaasunik ujartuileruttorpugut, Pitsi Høegh oqaluttuarpoq.

Kalaallit Nunaanni ulloq 2026-mi sisamanngornermi apriilip 16-iat oqaluttuarisaanermut ilannguppoq. Ulloq taanna Qaqortumi mittarfittaaq atorneqalerpoq. Eqqaaneqareersutut mittarfittaaq takornariaqarnermut annertunerusumik aningaasaliisoqarnissaanik soqutinnilersitsivoq.

- Akunnittarfittaarnitsigut pinngortitamut kulturimullu takornariat, aammali ataatsimeersuariartut, sullittarnissaat anguniarparput. Tikeraat misigisassarsiorlutik maanga tikeraartartut anguniagaraagut. Aammattaaq ilaqutariinnik sullissisarnissarput anguniarparput, taanna oqarpoq.

Takornariaqarnerup annertusinissaa naatsorsuutigigaa

Ilaqutariit Høeghit akunnittarfimmik sanaartornissamut nunaminertamik Kommune Kujallermut suli qinnuteqanngillat.

- Akunnittarfittaassatsinnut nunaminertamik tunineqassalluta kommunimit neriorsorneqarpugut. Ukiaru nunaminertamik qinnuteqassasugut pilersaarutaavoq.

- Sumiiffimmi pitsaasumi nunaminertamik pissarsisinnaagutta suliniullu iluatsissappat akunnittarfik 2030-mi naammassissasoq naatsorsuutigaara, Pitsi Høegh oqarpoq.

Kujataani takornariaqarneq ineriartorlunilu suli annertusiartorpoq, taanna naqissusiivoq.

Takornariartitsisarfia, Greenland Sagalands, ullumikkut angallatinik marlunnik qulinik arfineq-marlunnillu ilaasoqarsinnaasunik ingerlatsivoq.

Erninilu umiatsiamut nutaamut aqqaneq-marlunnik ilaasoqarsinnaasumut aningaasaliillutik piseqqammerput. Taannattaaq assartuutitut aamma atorneqarsinnaavoq. Umiatsiaq ingerlatseqatigiiffimmit ilaqutariit pilersileruttugaannit pigineqassaaq.

- Illoqarfik tamarmi takornariaqarnermik aningaasarsiornerulernissamut ammavoq.

- Mittarfik nutaaq ammareermat takornariat unnuiffissaminnik pisariaqartitsisut amerlinissaat naatsorsuutigaara.

- Qaqortumi ullumikkut Hotel Qaqortoq allallu arlallit unnuiffiusinnaasut kisimik unnuisarfiupput. Unnuiffissat amerlanerusut pisariaqartinneqarput. Taamaammat pilersaarutitta saniatigut nutaanik akunnittarfiliornissaq pilersaarusiorneqarpoq, Pitsi Høegh oqarpoq.

Topas Explorer Groupip siorna Hotel Qaqortoq 65-inik initalik Jim Riisimit pisiaraa. Akunnittarfik 2026-mi januaarip aallaqqaataani tiguneqarpoq.

Soorlu Sermitsiami allaaserineqareersoq Heidi Mortensen Møller, unnuisarfimmik Siniffik Innimik ingerlatsisoq, 60-inik initalimmik akunnittarfiliornissamik pilersaaruteqarpoq.