PNNP suli soqutigineqartoq

Aalisarnermut inatsisip nutaap siorna ukiortaami atuutilerneranut atatillugu aqutsiveqarfik 47-mi, tassa Qeqertarsuup Tunuani, Uummannami Upernavimmilu qaleralinniarluni aalisarnermi umiatsiaararsiortut 450-it, paggatassiissutiniit Pisassiissutinut Niuerutigineqarsinnaasunut Nammineq Pigisanut, PNNP-mut, nuupput. 

Aalisarnermut, Piniarnermut, Nunalerinermut Imminullu Pilersornermut Naalakkersuisoqarfimmiit paasissutissat naapertorlugit, 2026-mi aqutsiveqarfik 47-mi PNNP naapertorlugu aalisarnermut ikaarsaariarnissamut qinnuteqartut 68-iupput. 

Taakkunani arfinillit qinnuteqaatiminnik unitsitsiinnarsimapput, taamaalilluni aaqqissuussamut tassunga katillugit 62-it ukioq manna ikaarsaarsimallutik. 

Ukiuni tulliuttuni umiatsiaararsortut amerlanerusut PNNP-mut nuunnissaat aalisartut kattuffiisa naatsorsuutigaat.

Tunuarsimaartut

Aqutsiveqarfik 47-mi umiatsiaararsortut 62-it PNNP naapertorlugu aalisarnermut ukioq manna ikaarsaarsimanerat tupaallaatissaanngitsoq, Sinerissap Qanittuani Aalisartut Piniartullu Kattuffianni SQAPK-mi siulittaasoq Anthon Lindenhann isumaqarpoq.

PNNP-mut ikaarsaarnermi ukiuni tallimani kingullerni pisarisimasanit, ukiut pingasut pisaqarluarfiunerpaat pisassiinermi aallaavigineqartarput. PNNP-li naapertorlugu aalisarnermi pisassiissutit tunniunneqartut amerlassusaat umiatsiaararsortut amerlasuut pakatsissutigisimagaat, tamannalu ilaatigut peqqutigalugu tassunga ikaarsaarnissaq tunuaarsimaarfigineqartartoq, taanna isumaqarpoq.

- Aqutsiveqarfik 47-mi umiatsiaararsortut paggatassiissutinik aalisartut amerlasuut PNNP pilerigigaluarpaat. Kisianni PNNP-mut nuukkunik ikippallaanik pisassinneqarnissartik ernummatigaat, tamannalu ukioq manna PNNP-mut ikaarsaartut amerlavallaannginnerannik tunngaveqarsinnaavoq, taanna oqarpoq.

Aqutsiveqarfik 47-mi qaleralinniarluni paggatassiissutinik aalisarnerup siorna ukiup naanissaanut ingerlaannaannarsinnaanissaa qulakkeerniarlugu pisassiissutinik nuussisoqarpoq.

Paggatassiissutinik aalisartut PNNP naapertorlugu aalisartunut naleqqiullugit atugaat ajornerunngitsut, taamaattumillu PNNP-mut nuunnissaq amerlasuut suli tunuarsimaarfigigaat, Anthon Lindenhann erseqqissaavoq.

Iluaqutaanerat killeqartoq

Aningaaserivinnut aningaasanik taarsigassarsinissamut PNNP-it qularnaveeqqutitut atorneqarsinnaasut, Aalisarnermut Piniarnermut Nunalerinermut Immininullu Pilersornermut Naalakkersuisup Peter Borgip, Demokraatit, siusinnerusukkut oqaatigereerpaa.

Tamannali suli ajornakusoortoq SQAPK-p siulittaasua isumaqarpoq.

- PNNP iluamik atoraanni pitsaasuuvoq. Pisassiissutit aalisartumiit aalisartumut tunineqarsinnaanerat aamma pitsaasuuvoq.

- Kisiannili PNNP-it aningaaserivinni attartornissamut qularnaveeqqutitut atorneqarsinnaanerat ajornannginnerulertuuppat, tamanna ukiuni tulliuttuni umiatsiaararsortut paggatassiissutiniit PNNP-mut nuuttut amerlanerulernerannik kinguneqassasoq ilimagaara, Anthon Lindenhann oqarpoq.

Aqutsiveqarfik 47-imi qaleralinniarluni PNNP-mut ikaarsaarsimagaanni paggatassiilluni aalisarnermut utertoqarsinnaanngilaq.

Ukiuni tulliuttuni amerlanerulissasut

PNNP tunngavigalugu aalisarneq soqutigineqartoq, Kalaallit Nunaanni Aalisartut Piniartullu Kattuffianni KNAPK-mi siulittaasoq Pele Blytmann oqarpoq. 

Aalisarnermut inatsisip atuutilernerata kingorna inuusuttut aalisarnermik inuussutissarsiuteqalersimasut, kiisalu aqutsiveqarfik 47-p kujammut killeqarfiata Kangaatsiap eqqaanut nuunneqarnerata kingorna, tamaani aalisartut amerlasuut PNNP-mut suli nuussimanngitsut Pele Blytmann oqarpoq.

- Aalisarnermik inatsisip atuutilerneranut atatillugu PNNP-mut ikaarsaartut tassaanerupput qangali aalisarnermik inuussutissarsiuteqarsimasut.

- PNNP soqutigineqarpoq, kisiannili taanna atorlugu aalisarnerup qanoq innersoq amerlasuut takoqqaarusuppaat. Taamaattumik ukiuni tulliuttuni PNNP naapertorlugu aalisartut amerlanerulernissaat naatsorsuutigineqarsinnaavoq, Pele Blytmann oqarpoq.

Pele Blytmann siorna ukiakkut KNAPK-mi siulittaasunngornissani tikillugu, Ilulissani aalisartut piniartullu peqatigiiffianni IAPP-mi siulittaasuuvoq. Aalisarnermut inatsisip 2025 aallarnerfigalugu atuutilernissaa sioqqullugu, PNNP-p umiatsiaararsortunut atuutilersinneqarnissaa IAPP-miit arlaleriarluni oqariartuutigineqartarpoq.