Qassiarsummi takornarialerisut ataatsimoorlutik noqqaassuteqartut: – Narsarsuup mittarfia aasaanerani timmisartuussisarfittut ammarneqarli

Elna Jensenip matu paarnaarussaarpaa Café Thorhildurimut, taanna Qassiarsummi umiarsialivimmiippoq. Aviaja Lennert, sumiiffimmi najugaqartoq peqatigalugu kaffisorniartarfimmut iserput.

Kaffisorniartarfik ullumikkut matoqqagaluarpoq. Elna Jensen ulapputeqarpoq Sillisini kaffisortitsinissaminnut, tassani najugaqarlunilu uini peqatigalugu savaateqarfeqarput. Taamaattorli taanna, Aviaja Lennert allallu Qassiarsummi nunaqqatitik peqatigiillutik uummammioqarput.

- Aasaq manna takornariaqarnerup iluani kiffartuussinerput tamakkiisuunngilaq. Tamatuma saniatigut aamma takornariarpassuarnik annaasaqarnikuuvugut, Narsarsuup mittarfiat matuneqarnerata kingunerisaanik, Elna Jensen oqarpoq tiitorfiillu pingasut kaffimik immerlugit.Savaatilimmut nuliaanerup saniatigut Elna Jensen aamma Aviaja Lennert takornarialerinermik suliaqartuupput. Elna Jensen café-mik aammalu Sillisit Hostel-imik piginnittutut, aammalu Aviaja Lennert ilaquttani peqatigalugit Tasiusami unnuisarfiuteqarput.

Taakku marluullutik Qassiarsummi eqqaanilu unnuisarfinnik ingerlataqartut peqatigiiffianni Farm Holiday Greenlandimi peqataapput.

- Pingaarnertut inuussutissarsiutigaarput savaateqarnermik inuussutissarsiuteqarneq, tamannalu inuussutisisinnaalluarparput – taamaattorli aamma takornariarpassuaqarpugut. Nunap immikkoortuani maani susinnaanerluta sunillu neqerooruteqarsinnaanerluta takutikkusoqaarput. Taamaattorli maanna manna tikikkuminaassinikuuvoq, Elna Jensen oqarpoq.

Elna Jensen Aviaja Lennert sisamallu allat takornarialerinermik suliaqartut peqatigiillutik Naalakkersuisunut sapaammi septembarip 27-iani allagaqarput, tassanilu siunnersuutigivaat aasaanerani Narsarsuarmiit Narsarsuarmullu atlantiku qulaallugu timmisartuussinernut ammarneqassasoq.

- Sooq Narsarsuaq aasaanerani mittarfittut ammatinneqarsinnaanngila – taamaallaat Atlantiku qulaallugu timmisartuussinernut mittarfiutillugu? Assersuutigalugu sapaatip akunneranut ataasiarluni marloriarluniluunniit Københavnip Narsarsuullu akornanni timmisartuussisoqartalerluni, taamaattoqarsinnaappammi Nuuk aamma Qaqortoq oqilisaanneqarsinnaammata, Elna Jensen oqarpoq.

- Tassami timmisartuussinerpassuit illoqarfiit taakku marluk suli angummaffigisinnaanngilaat.

Kiffartuussineq angalanerlu ajornerulerput

Ukioq manna Qassiarsummut tunngasunik pisoqangaatsiarsimanera oqaatigineqarsinnaavoq.

Siullermik mittarfik kangerluup illuatungaaniittoq matuneqarpoq, Qaqortumi nunap immikkoortuani mittarfiup 16. aprilimi ammarneqarneranut atatillugu. Qaammatit tallimat qaangiunnerini illersornissaq pillugu USA-mut isumaqatigiissut oqaluttuarisaanermi pingaaruteqartoq atsioqatigiissutigineqarpoq, tamannalu isumaqarsinnaavoq Narsarsuarmi amerikamiut sakkutuunut mittarfimmik ammaassisinnaasut.

Pisut taakku marluk Narsarsuarmi aamma Qassiarsummi taakkulu qanitaanni najugaqartunut nalorninartorsiornermik misigititsipput. KNR-imut Aviaja Lennert aammalu takornarialerinermik suliaqartoq alla Naasunnguaq Karen Lund, siusinnerusukkut oqaluttuarnikuupput ukioq manna takorniariat tikeraartut ikinnerungaatsiarsimasut.

- Affapajaavi annaavagut, Aviaja Lennert cafémi Qassiarsummiittumi issiaqatigiinnitsinni oqaluttuarpoq.

Amerikamiut sakkutuuinik affarleqalernissaq tassunga aammalu Qassiarsummi nunaqqataanut qanoq sunniuteqalerumaarnersoq, arlaannaataluunniit suli ilisimanngilaa. Utaqqiisaa nunap immikkoortuani tassani najugaqartut nalunngisatik misigisatillu aallaavigalugit iliuuseqarput – maannalu malugisaat annertooq tassaavoq Narsarsuup mittarfiata matuneqarsimanerata kingunerisai.

Takornariaqarnerpaaffigisartagaa mittarfiup matuneqarnerata kingorna siullerpaaq misigeqqammerpaat, tamannalu tunngavigalugu Elna Jensen aamma Aviaja Lennert inerniliipput, ajornarnerulersimasoq takornariat imminnut ornigutsinniarlugit pilerisaaraluarlugit sunniutaarukkiartulersimasoq. Aviaja Lennert naapertorlugu takornariat ukioq manna naapitatik arlallit oqaluttuarsimasut Kujataanut angalaniarneq annertuumik akisunerulersimasoq, aamma Qaqortumiit kangerluit iluinut angalaniartarneq pisariunerulersimasoq.

- Siusinnerusukkut nunanit allaniit Kujataanut timmisartumik pisariitsumik angalasoqartarsinnaagaluartoq, maanna Qaqortumi, Nuummi imaluunniit Islandimi unnuisariaqarneq avaqqunneqarsinnaajunnaangajassimavoq, Aviaja Lennert oqarpoq.

Elna Jensen sikisaarpoq. Tassami tamanna aamma cafémi malugisinnaasimaqigamikku.

- Qassiarsuk tassaajuaannarsimavoq takornariat tamarmik aqqusaartagaat – maannali ulluinnarlugu takornariarpassuit annaavagut, taanna oqarpoq.

Ukioq manna Nordjob aqqutigalugu ukiup ilaani sulisartunik arlalinnik sulisussaminik sulilersitsisimagaluarpoq, kaffisorniartarfiutiminimi Cafémi ulapaarfimmi atorfissaqartittaramigit.

- Kisiannili siornatigut pisarnitsitut ukioq manna ulapputeqarpianngilagut – taamaammat sulilertitaraluakka neriuutigisaminnit annikinnerusumik sulipput, Elna Jensen oqaluttuarpoq.

Tamakku saniatigut aamma arnat taakku oqaloqatigisavut takornarianit uippakajaartunit saaffigineqartarsimapput Qaqortumiit nikinneq ajuleqqasunit unnuiffissaarussimasunillu.

- Isumaqarpunga kiffartuussineq pitsaanerpaasimanngitsoq, Elna Jensen oqarpoq.

Politikerit tusarnaarnissaat neriuutigaat

Arnat allagartik Ineqarnermut, Attaveqaasersuutinut Isorliunerusunut Upalungaarsimanermullu Naalakkersuisoqarfimmut aammalu Kommune Kujallermi borgmesterimut allagartik nassiunnikuuaat, taakkulu neriuutigaat, politikerit uisinneqarumaartut, Kujataani takornariaqarnermut qanoq annertutigisumik Narsarsuup mittarfiata matuneqarnera sunniuteqarsimanersoq.

- Suliffeqarfiutitta ineriartortinnissaat kissaatigaarput, neqeroorutigisartakkavut pitsanngorsarusuppavut aammalu takornarialerinermut aningaasaliinerorusuppugut. Taamaattorli siunissaq ungasinnerusoq isigalugu aalajangersaasinnaanerput ajornakusuulernikuuvoq, tikikkuminassuseq, akit aammalu Kujataani angallanneq, pingaartumillu Qassiarsummut eqqaanullu tunngatillugu angallannikkut pissutsit patajaatsumik ingerlanneqarsinnaanersut nalorninartorsiorfiulermata, ilaatigut allakkaminni taamak erseqqissaateqarput.

- Siunissaq ungasinnerusoq eqqarsaatigalugu takornariaqarnerup ineriartortinneqarnera, sumiiffimmi suliffissat aammalu inuussutissarsiutitigut ineriartortitsiniarneq sunnerneqarnissaannut aarlerinartorsiortoqarpoq, allakkami atuarneqarsinnaavoq. 

Allagaat allaffigineqartunit suli qisuariarfigineqanngilaq.

- Neriuppugut tusarnaassagaatigut, Aviaja Lennert oqarpoq kaffisukkaminillu najorsilluni.

- Ilumut, tassami Qassiarsuk aamma tassaavoq UNESCO-p nunarsuarmiut kingornussassattut aalajangiiffiginikuuaa, taamaammallu aamma maanngarsinnaanissaq pisariusussaanngikkaluarpoq, taamaattorli maanga aqqutit ilaat tassanngaannartumik kipineqarnikuuvoq, Elna Jensen oqarpoq nangillunilu:

- Maannalu akisunerpaat ilaattut inissisimaleqqavugut. Tassami Qaqortumut billetsit akikitsut iluatsissagaanni siusissukkut pissarsiarineqartariaqarput.

Taakku aamma Ilulissani mittarfittaaq qaammatip matuma naalernerani ammarneqarpat aarleqqutigaat angalaniarneq suli akisunerulissasoq.

- Tassami amerlanerit avannaanukarusunnerulissapput, tamatumalu malitsigisaanik uagut inissisimanerput qajannarneruleriartuinnassaaq, Elna Jensen oqarpoq.

Ineqarnermut, Attaveqaasersuutinut Isorliunerusunut Upalungaarsimanermullu Naalakkersuisoqarfimmut AG-mit saaffiginnippugut apeqqutigerusullugu Qassiarsummiunit allagarsiartik qanoq isumaqarfigineraat. Piffissap imaalinerani uterfigineqarnissarput suli utaqqivarput.