Qeqertarsuarmi ikaartarfik nutaaq isumaqatigiinngissutaasoq

Qeqertarsuarmi illoqarfiup kangiatungaani Kuussuaq piffissap ilaani ukiukkut upernaakkullu seersikkaangat, qimussinit aqqutigineqarnissaa ulorianarsisarpoq.

Tamannalu tunngavigalugu siorna ukioq naajartortoq, Kommune Qeqertalimmi 2026-mut aningaasaliissutissat suliarineqarnerannut atatillugu, Kuussuarmi ikaartarfiup qimussinit aqqutigineqarsinnaalernissaa siunertaralugu, ikaartarfiup allilerneqarnissaanut 1 millionit koruunit aningaasaliissutigineqassasut, kommunalbestyrelsimit akuersissutigineqarpoq.

Ikaartarfiup sanaartorneqarnera apriilimi aallartinneqarpoq, aggustillu 25-ni naammassineqarluni. Ikaartarfilli qimussinut atussallugu tulluartuunngitsoq, Qeqertarsuarmi qimussertartut peqatigiiffiat Qimusseq 82 isumaqarpoq. Ikaartarfik ATV-nut ikaarfigineqarsinnaasunngorlugu aamma sananeqarsimavoq, tamannalu ATV-utilinnit takornarialerisuniillu nuannaarutigineqarpoq.

Kisiannili Avatangiisit innarlitsaaliorneqarnissaat pillugu Inatsisartut inatsisaat innersuussutigalugu, ikaartarfiup assartuutit motorillit atorlugit aqqutigineqarnissaa matugallassasoq, Kommune Qeqertalik ikaartarfiup ammarneqarata aqaguani aalajangerpoq. Tamannalu ATV-utilinnit takornarialerisuniillu pakatsissutigineqarpoq.  

Tusarniaanerit ingerlanneqassasut

Ikaartarfik 25. aggusti ammarneqarmat illoqarfimmi ATV-utillit UTV-utillillu arlallit ikaartarfikkoorlutik illoqarfiup kangianut ingerlaarput. Periarfissarlu nutaaq taanna nuannaarutigineqarpoq. Ikaartarfiulli ammarneqarnerata aqaguani, Kommune Qeqertalimmi borgmesteri Simigaq Heilmann, Demokraatit, nalunaaruteqarpoq,  assartuutit motorillit atorlugit ikaartarfik  ingerlavigineqarnissaa inerteqqutaasoq.

- Qeqertarsuup nunataa immikkuullarissumik avatangiiseqarpoq paarilluarnissaanullu akisussaaffeqarpugut. Pingaaruteqarpoq ineriartorneq piujuartitsinermik tunngaveqarluta ingerlatissagipput.

- Kinguaatta nuna manna uatsitulli atorsinnaassagaat tamatta kissaatigaarput. Taamaattumik qamutinut motorilinnut nunap ilusaanut allannguisinnaasunut malittarisassat suliarineqarnerisa nalaani, ikaartarfik pisuinnarnut taamaallaat atorneqarsinnaagallassaaq, borgmester Simigaq Heilmann oqarpoq.

Borgmesterip oqarnera naapertorlugu ikaartarfiup motorillit atorlugit ikaarneqarsinnaanissaa pillugu, piffissami tulliuttumi innuttaasunik tusarniaanerit ingerlanneqassapput.

Periarfissat nutaat

Ikaartarfik ikaaraanni Qeqertarsuup kangiatungaani nuna kusanartoq naggorissorlu tikinneqarsinnaavoq. Takornarialerisoq Kasper Broberg, Qeqertarsuaq Boat Tours ApS-imik piginnittuullunilu marlunnik unnuisarfiuteqarpoq. Ikaartarfik ulloq taanna atulermat UTV-nik ikaartunut siullernut ilaavoq. Ikaartarfik nutaaq takornarialerisunut periarfissanik nutaanik ammaassisoq taanna isumaqarpoq.

- ATV-it UTV-llu atorlugit ingerlaffigineqarsinnaasumik ikaartarfiliortoqarnera pitsaasuuvoq. Motorinik ingerlatillit atorlugit nunap innarlerneqarnissaa pillugu ernumasoqarnera paasilluarsinnaavara.  

- Kisianni ATV-nut aqqutit aalajangersimasut pilersinneqarpata ernumanissamut tunngavissaqanngitsoq isumaqarpunga, Kasper Broberg oqarpoq.

Akerlianik ikaartarfik inuussutissarsiornikkut periarfissanik nutaanik ammaassissasoq, sumiiffinnilu aalajangersimasuni illuaqqat tupeqarfiillu pilersinneqarsinnaalissasut taanna isumaqarpoq.  

Paasiuminaatsoq

Ikaartarfiulli ammarneqarnerata aqaguani motorinik ingerlatilinnut matuneqarnera taassuma paasiuminaatsippaa.

- Ikaartarfik qaammatini arlalinni suliarineqarpoq. Kuussuup akiani assartuutit motorillit atorneqarsinnaanerat pillugu tusarniaanerit, ikaartarfimmik sanaartornerup aallartinnginnerani ingerlaneraniluunniit ingerlanneqarsimasariaqaraluarput.

- Tassami tusarniaanerit qangali ingerlanneqarsimasuuppata, piffissaq manna takornariat aappaagu aasaanerani tikeralernissaat sioqqullugu piareersarnermut atorsimasinnaagaluarparput, taanna oqarpoq.  

Ilulissani mittarfissuup nutaap oktobarimi atulernissaa naatsorsuutigineqarpoq. Tamannalu aappaagu takornariat amerlanerusut Qeqertarsuarmut tikittalernissaannut ammaassissasoq Kasper Broberg isumaqarpoq. Takornariaqarnerlu ineriartortinneqassappat ikaartarfiup ATV-nik UTV-nillu ikaarneqarsinnaalernissaa qulakkeerneqartariaqartoq taanna aamma isumaqarpoq.  

Pakatsinartoq

Kuussuaq qimussinit isumannaatsumik ingerlaffigisinnaalissappat, taava nutaamik silittumillu ikaartarfiliortoqartariaqarnissaa, Qimusseq 82-imiit qangali kissaatigineqartarsimasoq peqatigiiffiup siulittaasua Hansigne Broberg oqarpoq.

Ikaartarfiullu nutaap taamatut isikkoqarluni naammassineqarnera taassuma pakatsissutigaa.

- Qimusseq 82 ikaartarfiup nutarterneqarlunilu allilerneqarnissaa sioqqullugu siorna tusarniaavigineqarpoq. Ikaartarfik maanna allilerneqarluni nutarterneqartoq pinnagu kisianni qimussit aqqutaatigut nutaamik ikaartarfiliortoqarnissaa Qimusseq 82-imiit kissaatiginikuuarput.

- Ikaartarfik maanna naammassisoq qimussinit isumannaatsumik aqqutigineqarsinnaanngilaq, taamaammat tusaaniarneqarsimannginnerput assut pakatsissutigaarput, taanna oqarpoq.

Nutaamik qimussinullu isumannaatsumik ikaartarfiliortoqarnissaa Qimusseq 82-imiit suli kissaatigineqartoq Hansigne Broberg erseqqissaavoq.