Royal Greenland milliardip affaanik aningaasaliiniartoq

- Kalaallit Nunaanni nunami suliffissuarnut ukiuni tulliuttuni pingasuni tallimanilu 500-600 millionit koruunit akornanni aningaasaliissuteqarnissarput siulersuisunit aalajangerneqarpoq.

Namminersorlutik Oqartussat aalisakkerivissuanni pisortaanertaanngorlaaq Toke Binzer Sermitsiamit apersorneqarnermini taama oqarpoq.

Toke Binzerip taassumalu siuliata Preben Sunkep Royal Greenlandip siulersuisuinut aningaasaliinissamut pilersaarut annertooq, suliffeqarfimmik nukittorsaasussaq, juullinngitsiartoq saqqummiuppaat.

Siulersuisut akuersinerat tunngavigalugu aningaasaliinissamut pilersaarut inissippoq, tamannalu Royal Greenlandimut Kalaallillu Nunaannut nutaarsiassatsialaavoq.

Royal Greenlandip nunatsinni illoqarfinni nunaqarfinnilu tunisassiorfiisa tunitsiviillu 38-t ilarpassui ukiuni arlalinni nutarterneqartariaqalersimapput.

- Qanoq iliuuseqassanerluta pilersaaruteqarfigaarput, Toke Benzer oqarpoq.

Suliffeqarfiup Kalaallit Nunaanni tunisassiorfii suliffissuilu aserfallatsaalineqarluarsimannnginnermik pisoqaavallaarput. Allatut oqaatigalugu, piffissamut naleqqutinngitsutut oqaatigineqarsinnaapput. Suliffeqarfissuulli pisortaa aningaasaleeqqinnissamut pilersaarut nutaaq iluarsineqartariaqartoq, tunisassiornerlu pitsanngorsarniarlugu annertuumik aningaasaliisoqartariaqartoq isumaqarpoq.

Nutarterneqartariaqartut

- Royal Greenlandip nunami sumiiffinni suliffeqarfiutaani amerlasuuni iluarsaanneqarnissaminik pisariaqartitsinera takusinnaavarput, Toke Binzer oqarpoq.

Ukiuni kingullerni aalisakkerinermik ingerlatsisut amerlasuunik aningaasaliissuteqarput, kilisaatinillu nutaaliaasunik atortorissaarutinillu pitsaalluinnartunik sanaartornermut 2 milliardit koruunit missaannik aningaasartuuteqarlutik.

Nunami tunisassiorfiit aningaasaliiffigineqarnerat pissutigalugu Namminersorlutik Oqartussat erlinnartuutaat nutarterneqarlualerpoq.

Royal Greenlandip atortorissaarutit nutaat pitsaanerusullu atorlugit tunisassiornini pitsanngorsarnialerpaa.

Sisimiuni 20 millionit koruuninik aningaasaliisut

Royal Greenlandip Sisimiuni raajaleriffimmini raajanik tunisassiornermut inerisaanissamut 20 millionit koruunit missaannik aningaasaliiffigissallugu ukioq manna pilersaarutigigaa Toke Binzer oqarpoq.

Tankini raajat qalipaajarneqarlutillu uunneqartassapput.

Ingerlatseqatigiiffik Sisimiuni alliliinissamut suliariumannittussarsiuussinermik maanna piareersaleruttorpoq.

- Taakkua inerisarnerisigut raajanik tunisaqarnerusinnaavugut, tassami raajanik tunisassiornitsinni aningaasarsiorluartarpugut, Toke Binzer nassuiaavoq.

Attu Sarfannguillu

Royal Greenland nunaqarfinni Attumi Sarfannguanilu ukioq manna katillugit 30 millionit koruunit missaannik misileraanermut, tassa aalisakkerivinnut mikisunut, aamma aningaasaliissaaq.

Royal Greenland sumiiffinni taakkunani marlunni qerititsiviliorpoq, suliffissuillu sinneri pioreerlutik.

- Tasiilami siliffissuarmik alliliisimanerput assigalugu fabrikkini mikinerusuni alliliisoqarnissaa pilersaarusiorparput.

- Misileraatitut suliniutit sumiiffinni minnerni qanoq sukkatigisumik, eqaatsigisumik akikinnerusumillu suliaqartoqarsinnaanersoq paasinarsititsissapput, oqarpoq.

Kuulti nutaaq – Saarullik

Royal Greenlandip nunami atortorissaarutinut aningaasaliinera arlalinnik pissuteqartoq, Toke Binzer oqarpoq.

- Siullertut, nunami tunitsiviit aningaasaliiffigineqartarnerat aatsaat taama kinguussaaqqatigaat. Sumiiffiit ilarpassuini tunitsiviit aserfallassimaqaat iluarsaanneqartariaqarlutillu.

- Aappaattut tunisassiornerup ingerlanerata pitsaanerulernissaa kissaatigaarput. Tamanna suliffissuarni anginerusuni mikinerusunilu pingaaruteqarpoq, taamaalillutami tunisassiat pitsaanerpaamik pissarsiffigisinnaavavut.

- Pingajuattut, saarullittassiissutit amerlanerulernerisa raajartassiissutillu ikilineqarnerisa kingunerisaanik saarullinnik amerlanerusunik tunisassiornerorusuppugut, Toke Binzer oqarpoq.

Saarulliit nunarsuarmi aatsaat taama akisutigilernerat Royal Greenlandimut kuultinngorput, soorluttaaq qalerallit raajallu ukiorpassuarni taama inissisimasut.

- Taamaattumik nunami tunisassiatsinnik saarullinnik amerliartuinnartunik tunisisinnaaniassagatta allannguisariaqarpugut, tunisassiornerlu pitsaasuusariaqarluni.

Binzer Royal Greenlandip Nuummi qullersaqarfiani pisortaanertut decembarip aallaqqaataani atorfinitsinneqarpoq. Tusassimilu assingusumik atorfeqarnikuulluni.

Binzer: - Atorfik pissanganarluinnartoq

Namminersorlutik Oqartussat suliffeqarfiutaat Tusass 2024-mi akileraarutit ilanngaatigereerlugit 124 millionit koruuninik sinneqartooruteqarpoq, tassa ukiup siulianit amerlanerulaartunik.

Binzer misilittagaqarluarpoq, maannami Royal Greenlandip amigartooruteqangaartup aningaasaliissuteqarniarnerujussuanut siuttuuvoq.

Ingerlatseqatigiiffik nunani allani, ingammik Chilemi Norgemilu, ingerlatsinermini annaasaqaateqarpoq. Royal Greenlandip 2024-mi naatsorsuutaani amigartoorfiungaatsiarpoq. Suliffeqarfissuup siorna akileraarutit suli ilanngaatiginagit 200 millionit koruuningajannik amigartooruteqarpoq. 2025-mut naatsorsuutit upernaaru saqqummiunneqassapput.

Toke Binzer atorfittaani pillugu ima oqarpoq:

- Pissanganarluinnartumik atorfittaarpunga. 500 millionit koruunit missaannik aningaasaliissuteqareerutta Royal Greenland ingerlatseqatigiiffiussaaq niuernikkut iluanaaruteqarnerulersinnaasoq.