Royal Greenlandip ukiup affaani angusat malunnaatilimmik qaffakkai

Royal Greenland 2026-imi ukiup affaani siullermi akileraannginnermi 217 mio. kr.-nik angusaqarpoq, siorna piffissami tassani 11 mio. kr.-nik amigartooruteqarsimalluni

Siorna piffissami tassani angusatsinnut sanilliullugu malunnaatilimmik pitsaanerusumik angusaqarpugut, tamannalu naammagisimaarparput. Royal Greenlandimi pisortaaneq Toke Binzer ukiup affaani siullermi angusat saqqummiunneqarnerannut atatillugu oqarpoq.

Assi: Oscar Scott Carl

Thomas Munk Veirum Thomas Munk Veirum Tusagassiortoq

Saqqummersinneqarpoq 27. Aggusti 2026 - 12:26

Ussassaarut

Namminersorlutik Oqartussat pigisaat Royal Greenland ukioq manna qaammatini siullerni arfinilinni suliffeqarfiup angusaqarnera malunnaatilimmik pitsaanerulersimasoq nalunaarutigaa.

2025-mi ukioq affakkaarlugu angusaq 11 mio. kr.-inik amigartooruteqarfiusoq, maanna akileraaruteqartinnani 217 mio. kr.-inik sinneqartooruteqalerpoq.

Royal Greenlandip angusaq pillugu tusagassiuutinut nalunaarummi oqaatigaa ukioq manna affaani siullermi aningaasat kaaviiaartut 16,5 procentimik qaffariartut, tunisanulli annertussusaat kingullermik ukioq taamatut annertussuseqarlutik ingerlaannartut.

Pisortaaneq Toke Binzer angusanut naammagisimaarinnippoq, aammalu oqarpoq pitsaanerulerneq nunarsuarmi aalisakkanut akit pitsaanerulernerannik kiisalu aalisakkerinermut suliffeqarfissuarmi iluani pitsanngorsaanernik peqquteqartoq:

- Niuffaffinni akit pitsaasut annertuumik pingaaruteqarsimapput, angusarlu aamma suliffeqarfik

Ussassaarut

tamakkerlugu pitsanngorsaanerit ingerlassimasatta sunniutaanik ersersitsivoq, pisortaaneq oqarpoq nangillunilu:

-Royal Greenlandip nukittunerulernera ingerlatsinitsinnut aningaasaliinissamut aammalu pisuussutit uagutsinnut isumagisassanngortinneqarsimasut atorlugit nalilinnik pilersitsinissamut pitsaanerusunik periarfissaqalersippaatigut – suliffeqarfimmut inuiaqatigiinnullu kalaallinut iluaqutaasumik.

Ukiup affaani angusat pitsaagaluartut suli unammilligassaqarpoq. Royal Greenland naapertorlugu aningaasartuutit suli qaffasipput, ilaatigullu raajartassarititaasut ikiliartornerat tunisassiassanik pissarsisiniarnermut ajornakusoortitsivoq.

Ingerlatseqatigiiffiup aalisarnerup ineriartorneranut naleqqussarniarluni sinerissami tunisassiorfinnut aningaasaliinini ingerlatiinnassagaa Royal Greenlandimit erseqqissarneqarpoq. Ingerlatseqatigiiffik naapertorlugu Sisimiuni raajaleriffiup nutarternissaa pineqarpoq, ilaatigut Sarfannguanili, Attumi Paamiunilu ilaatigut aningaasaliinerit saarullinnik tigooraasinnaanermut suliarinnissinnaanermullu periarfissat nukittorsassavaat.