– Saarullineqqeratarsinnaavugut

- Suli paasinngilarput, kisianni nunatta kitaani saarullineqqeratarsinnaavugut. Tamanna paasiumallugu politikerit avataani aalisarnissamut pisassiissutit ukioq mannamut sanilliullugit 2027-mi qaffannerulaartariaqarpaat.

Svend Christensen 83-inik ukiulik, Kalaallit Nunaanni aalisarnermi misilittagartooq taama oqarpoq.

Niuertoq taanna umiarsuaatileqatigiiffimmi Niisa Trawl ApS-imi pingaarnertut piginnittuuvoq. Taanna nunatsinni inuussutissarsiutit pingaarnersaanni ukiuni 50-inngulersuni siuttooqataasimavoq.

Svend Christensenip tusagassiuutitigut oqaaseqarnissani tunuarsimaarfigiuarsimavaa. Maannali pingaarutilimmik oqariartuuteqarpoq.

Politikerit kingusinaartinnatik piffissaq iliuuseqarfissartik ilisimasariaqaraat

Kitaani avataasiorluni saarullittassiissutit 2027-mi TAC-iusut 2026-misut amerlatiginissaat Aalisarnermut Naalakkersuisoqarfiup siunnersuutigaa. Tassa 16.000 tonsit.

Niisa Trawl Sikuaq Trawlilu tusarniaanermut akissuteqarput. Matumani kitaani 2027-mi avataasiorluni saarullinniarsinnaaneq 22.000-24.000 tonsinut qaffanneqassasoq ingerlatseqatigiiffiit siunnersuutigaat.

Kitaani raajartassat tamarmiusut ukiuni kingullerni ikiliartorput. Tamatumali saniatigut saarulliit amerliartortut malunnarpoq. Kitaani avataani saarullinniarniarneq ukiunut siuliinut sanilliullugu 2025-mi 2026-milu qaffasinneruvoq.

Tamanna Svend Christensenip tupaallaatiginngilaa. Umiarsuit saarulleqangaarneranik takunnittarsimasut aalisartut umiarsuillu naalagaasa akornanni ukiorpassuarni oqallisigineqangaartarsimasoq oqaatigaa.

Taamaammat Svend Christensenip qanoq eqqortuliortoqassanersoq qularutiginngilaa.

- Inuunermi kingusinaartinnani qaqugukkut iliuuseqarnissaq ilisimassallugu pingaaruteqarpoq. Aalisarnermi tassani ilisimasaqarnerulernissarput pisariaqartikkatsigu politikkerit Kitaani avataasiorluni saarullinniarnermi pisassiissutit qaffappassuk eqqortuliornerussaaq, taanna oqarpoq.

Svend Christensenip Kitaani saarullittassiissutit pillugit uumassusililerisut siunnersuinerat nalorninartoq tikkuarpaa. Soorluttaaq ICES-ip (Nunani Tamalaani Imarsiornermik Misissueqqissaartartut Siunnersuisoqatigiivi) nammineq uumassusililerinikkut siunnersuutaanni tamanna allassimasoq.

- Suli paasinngilarput, kisianni saarullineqqeratarsinnaavugut. Tamanna paasiumallugu pisassiissutit qaffannerulaartariaqarpagut, Svend Christensen oqarpoq.

Svend Christensenip qaffaangaatsiarnissaq eqqarsaatiginagu erseqqissaavoq.

- Kitaani saarullittassiissutit 16.000 tonsinit naalakkersuisoqarfiup pisassiissutigisaanit 6.000-nit 8.000 tonsinut qaffanneqarnissaat innersuutigaarput. Tamanna aalisariutit ukiuni kingullerni raajartassiissutinik ikilisitsisoqarsimaneranit eqqugaasimasut saarullinniarnissamut nutarternissaannut periarfissaqalernissaannik taamaalillutillu raajarniarnermiit saarullinniarnermut nikissinnaanissaannik periarfissaqalernissaannik isumaqarpoq.

Inuiaqatigiinnut aningaasaqarnikkut annertuumik sunniuteqarsinnaasoq

Sikuaq Trawl A/S, Svendip qitornaasa pigisaat, aamma Niisa Trawl ApS Kitaani 2027-mi avataasiorluni saarullinniarsinnaanermut pisassiissutinik pissarsiniartut tamanit ilisimaneqarpoq.

Oqaaseqarninni Niisa Trawlip saarullinniarnermi pisassinneqarnissaat kisiat siunertarinngiliuk?

- Soorunami umiarsuaatileqatigiiffimmut kingulissannullu pitsaanerpaamik kissaateqarppunga. Utoqqaligamali saarullittassiissutit kinguneri nuannaarutiginaviarunanngilakka. Politikerit siunnersuutinnik tusarnissaat uannut pingaarnerpaavoq, taamaalippat saarullinniarneq nutaaq aallartissagaluarpat tamanna inuiaqatigiinnut tamanut aningaasaqarnikkut annertuumik sunniuteqassaaq, Svend Christensen oqarpoq.

Moses Olsen sapiilluni aalajangiussisarsimasoq

Politikerit sapiissuseqartariaqarnerat pingaartippaa. Svend Christensenip 1980-ikkunni Siumup politikkeriisa nuimasut tusaamasallu Moses Olsenip aalisarnermut naalakkersuisuunerata nalaa nuannaarutigalugu oqaluttuaraa.

- Moses Olsenilu isumaqatigiittuaannarneq ajorpugut, tusarnaarnissamulli piareersimajuaannarpoq. Pisariaqaleraangallu sapiissuseqartorujussuullunilu aalajangiisinnaasarpoq. Neriuppunga ullumikkut politikerit Kitaani saarullinnut tunngatillugu aamma taamaaliussasut, Svend Christensen oqarpoq.

Niisa Trawl ullumikkut 448 millionit koruuninik nammineq aningaasaateqarlunilu akiitsoqanngilluinnarpoq. Nammineq aningaasaatit annertussusaat Niisa Trawlip ileqqaarinissamik, tassa ingerlatseqatigiiffiup patajaallisarnissaanik, pingaartitsineranut ersiutaavoq.

Svend Christensenip Niisa Trawl ApS-ip 60 procentia ullumikkut pigaa, qitornaalu sisamat Betty Holm-Christensen, Carl, Klaus aamma Svend Christensen junior ataatstimoorlutik umiarsuaatileqatigiiffiup 40 procentianik piginneqataapput. Qitornaasattaaq ingerlatseqatigiiffik Sikuaq Trawl pigaat.