Savaatilik juunimi siallinngereersoq: Narsaatit toqorarput

Kujataani aasaq manna sialoqannginnerujussua savaatillit malugeqaat. Mads Kanuthsenikkut narsaataasa ilai ima panertigilersimapput allaat toqorarlutik. Panernerujussuani ivikkat nerukkaatissat amigaataassammata savat ukiumut "qallunaaminertortariaqarnissaat" ilimanarsilluinnarpoq.

Narsaatit nalinginnaasumik qorsooqqissuusaraluartut panernermit qalipaatissaasuaqaat.

Assiliisoq: Minik Møller

Arnaq Nielsen Arnaq Nielsen tusagassiortoq

Saqqummersinneqarpoq 15. Juuli 2026 - 11:44

Narsarsuarmi sialummut uuttuut juuni tamakkivillugu kuseriarnermilluunniit ataatsimik immersimanngilaq. Narsarsuullu ungasinngisaani Uummannartiivaqqami savaatillip Mads Kanuthsenip juuni kingumut qiviaruniuk narsaatini savaatinilu eqqarsaatigalugit nuannaarutissaqarfigivallaanngilaa.

- Juunimi panerujussuarnerani narsaatinut sunniuteqarujussuarpoq. Narsaatit ikkussornikuusagut panerujussuarlutik ilaatigut toqorarput, Mads Kanuthsen oqarpoq.

Mads Kanuthsenikkut 550-it missaannik savaateqarput, 17-inik nersussuaateqarlutik kiisalu arfineq-marlunnik hestiuteqarlutik. Taamaammat nerisitassaaleqinngeqigamik narsaatertik 30 hektaritut angitigisoq ivikkanut nerukkaatissanut isumalluutigisorujussuusarpaat.

Ussassaarut

Savaatillillu juunimi sialoqanngivissormat silasiortarsimaqaat.

- Savaatilinnik naapitaqatuaraangama oqarfigisarpakka: Savaatillit alla suliarinngilaat maannakkut mobiilerneq. Mobiiligut oqarsinnaasuugunik oqassagaluarput "iika silassaq", ullormut silassaq takoqattaarpiaannaavillugu. Tassa sialummik taama qinutigivugut, Mads Kanuthsen oqarpoq.

Mads Kanuthsen erninilu katillugit 550-it missaannik savaateqarput. Aakua taakkua ilaat.

Uumasuutaat nerukkaatissaasuassasut

Juunimi sialoqannginnerujussua uumasuutit ivikkanik ukiumut nerukkaatissaasuanerannik kinguneqassaaq.

- Narsaatigut naatsorsuutaarpiarsinnaajunnaarput, Mads Kanuthsen oqarpoq nangillunilu.

- Ivigartaassagut annikilligaangata qallunaaminernik tikisitsinissaq annertunerusunngortarpoq.

Qallunaaminernik taasai tassaapput savanut nerukkaatissat avataaniit tikisitat karrinik assigisaanillu akullit. Narsaatit sivisuumik attorneqarsimanatik ivikkanik naatitsivallaarunnaaraangata assanneqartarput, taamaaligaangamimmi ivikkat naalluarniassammata nuna silaannalerumallugu assanneqartarpoq. Ukioq mannalu assaanissaraluartik kinguartittariaqalerpaat.

- Nutarteriniarnissarput soorunami pakkersimaarfigisorujussuanngorparput. Narsaatit ilai nutartigassaagaluit nutarternaveersaarpagut, nuna ammarnaveersaarlugu panernera sakkortusitissagatsigu, aserortigassaraluagut aappaagumut kinguartiterpagut, Mads Kanuthsen oqarpoq.

Maajimi sialussuarnera annaassisoq

Juuni sialussaasuaqisoq qujanartumik maajimi siallerpoq.

- Maajimi sialussuarsimanngitsuugutta, savaatitta piarai oqittuaraasimassagaluarput. Neriniartitsivipput qorsunngunngitsoorluni toqorarujussuarsimassagaluarami. Maajimi sialussuarnerata annaappaatigut, Mads Kanuthsen oqarpoq.

Mads Kanuthsenikkut savaateqarfiat Igalikup akiatungaani Uummannartiivaqqamiippoq.

Taakku narsaataasa ilaat isugutasuuvoq, ilarujussuali panertumiimmat pinngortitap tunniussinnaasaa isumalluutigisorujussuusarpaat. Qaammat kingulleq nuna panerpallaaleqimmat imerterisariaqarsimapput.

- Eqqatsinniikkami kuuaramineerakasik, taanna iluaqutigalugu annikittunnguamik koorujunnerani imerterutigerujukkaluarparput. Kisianni aamma paqqerami susinnaajunnaarpugut, qaninnerulaartumi uatsinnut taseqartuuppat imerterisoqarsinnaagaluarpoq, kisianni uagutsinnut taamaannginnami, Mads Kanuthsen oqarpoq.

Savaatillit narsaatitik inuuniutiminnut pingaarutilerujussuummata sialuk maanna qinnutigiualerpaat. Juulimilu qujanartumik annikikkaluamik siallerpoq.

- Ippassaaneerannguaq siallernikuugami, taava tassa ernerput oqarpoq ajunngitsortaat aallakaapiluulissasut sukkasuukuluumik isugutseriarami nuna, Mads Kanuthsen feeriarluni maannakkorpiaq Danmarkimiittoq taama oqarpoq.